爆老婆驚叫第二個男人名字…… 周柏豪自認絕世醋外父
周柏豪今個月初由「多功能Oppa」升呢為「多功能阿爸」，自評分數有95分之高！其實婚後的柏豪有了很大轉變，而夫妻融洽的要訣，往往隱藏在相處的細節上。
周柏豪在劇集《多功能老婆》的演技備受稱讚，更連獲「最佳男主角」、「最受歡迎電視男角色」和「最受歡迎電視歌曲」三項提名。
劇中的柏豪是一位「多功能Oppa」，全方位守護楊千嬅、陳煒和朱晨麗三位娘娘，成為「閨蜜四人組」。柏豪直認在家人和朋友心目中都稱得上多功能，經常會問他意見，因本身夠八卦又極度好奇，對不同範疇都有點認識。他坦承以好友而言，的確女仔較男仔多，頭號閨密有情同兄妹的連詩雅，但重點是所有的閨密都一定會介紹給太太認識。不過有一點與角色人物剛好相反，柏豪飾演一個任性的大細路、直至遇上真愛才變得成熟；「同太太一起，我反而像個細路仔，因為太太分析能力好強，負責家中的行政及打理我的公司，而我屬行動組負責實現她做的任何決定，大家各自分工、裏應外合。」
忽然叫「阿強」
有了家室，男人成個世界都唔同晒。「我跟太太相處了10多年、一直都互相尊重，但婚前會保留多些自己的私人時間，而結婚後就會想得更多，並不是太太要我改變，而是自己想盡一家之主的責任，會主動了解屋企有甚麼需要，如果每次都要太太開口，我會好sad，太太都話我變得更細心和溫柔；還有一件趣事可分享，事緣以前太太叫我唔會即刻應，特別是太投入用手機時，更會完全聽唔到，點知有次她突然叫『阿強』，聽到第二個男人名，自然會即刻問她叫邊個？她就說『叫你唔應，咪求其叫個人名囉』！我們相處就係咁幽默，到現在她改口跟BB叫我爸爸，一聽到即刻彈起身，覺得個女需要我……一切毋須刻意，只要有心、就會自然改變。」明顯成功男人的背後，都有個多功能老婆。
絕對係呷醋外父
月初生了囡囡的柏豪雖然是新手爸爸，但原來早已積存了十年的湊仔經驗。「我一向都好鍾意逗小朋友和老人家開心，加上和太太經常照顧三個分別由4歲到11歲的侄仔侄女，所以這些年可算是一直在為做老竇作綵排，就連『小朋友的走佬袋』要準備甚麼都好清楚。」面對囡囡，柏豪也猶如大細路，他自爆日前才跟囡囡說，「不如我們一齊向媽媽扭計要出街囉，我們好多日無出街了，哈哈。湊BB真係好好玩，每日睇住自己個小朋友有改變、有進步，感覺好開心，每天還會影好多相和記錄BB的成長過程。」
子女是父母的鏡子，笑問最擔心囡囡重演其甚麼「曳」事？「很好彩阿媽話我無反叛期，由細到大都係咁樣，最多都係多嘴、好動坐唔定，但唔難教，而且阿媽教得好，令我們三兄弟與家人的關係都好好；所以我都會效法阿媽的教育方針。但始終做爸爸的一定會被個女『騎住』；不過我和太太有共識，會好好照顧個女，但不會太過於協助其成長，即不會凡事都幫囡囡完成，希望教會囡囡貼地的生活，學習忍耐、堅持、自立，能自己處理事情；不用囡囡做出甚麼特別的成績，最重要小朋友開心健康、做一個好人已經好足夠。」
始終是前世情人，從老竇角度，柏豪已預計到自己一定不會做怪獸爸爸，但絕對係呷醋外父！「由於我是天蠍座，本身已經係呷醋大王，好希望成為女兒的中心，但女仔拍拖後，男朋友就係她的整個世界，感覺好似原本屬於自己的東西要畀咗個男仔……。外母已開始向我輔導，說不是個女畀人攞走，而是多咗個仔。」
發功追鼠B
提到囡囡很旺自己，柏豪高興指，「真的，自從有了囡囡後，我已中過三次六合彩的安慰獎！」他不諱言想再追小朋友，但太太傷口仍有點痛，所以讓太太先休息，明年再發功追鼠B，如果成功追個仔湊成「好」字固然好，但和太太都崇尚自然，生仔生女都無所謂。
作為老公和老竇，柏豪自評值95分！「因為我問心無愧，真係去到盡，將所有嘢都畀晒她們，尚欠的五分是半夜餵奶時會太攰起不到身，但太太即使睡着，只要BB有少少聲音，都會很敏感的立即醒過來，可能BB在媽媽肚內已建立了這份聯繫，相信好多男人都會很羨幕，不過女人生bb真的很辛苦很危險，由懷孕到生育、再到餵母乳，都要作出許多的犧牲。所以男人對女人或太太真的不應有任何投訴！」
撰文∣林子棠攝影∣鄧國良
原文《星島日報》名人雜誌（逢周日見報）
|
鍾意就快D Share啦！
|
|
|
