2019年12月12日星期四

【頭條獨家】阿媽掛住食同玩電話劉曉彤囡囡悶到托晒頭 __,

【頭條獨家】阿媽掛住食同玩電話劉曉彤囡囡悶到托晒頭

婚後做「全職媽咪」的劉曉彤帶囡囡去朋友飯局，結果悶到阿女托晒頭！

前無線藝人劉曉彤（Bell）自04年結婚後，便退出做「全職媽咪」專心湊仔女，曾揚言不是少奶奶的她一直都親力親為照顧家庭，仲養到三個小朋友又乖又黐身。不過，早前見她帶埋囡囡跟朋友飯聚，Bell不是做「低頭族」，就是低頭密密扒飯，悶到阿女托晒頭兼翻白眼！採訪：梁志明

劉曉彤下嫁從事鞋業嚴姓商人後，便淡出幕前專心相夫教子，即使貴為少奶奶，照顧三個仔女都絕不假手於人，經常湊住啲小朋友周圍去，好似日前傍晚6點幾，Bell就帶住囡囡現身銅鑼灣鬧市。經常話啲後生仔女淨係識得玩電話，估唔到50歲的Bell都一樣係「低頭族」！話說，當日孭住個背囊、一抽二褦的她，站在街頭一路掛住睇手機，未知是忙住覆Message，抑或開App覓食呢？搞到在旁被冷落的囡囡嘟晒嘴，惟有挨住媽咪撒吓嬌啦，點知媽咪都係零反應，阿女即刻翻晒白眼冇晒符！

跟阿媽去聚會好悶

見交通燈一轉，Bell立刻拖實囡囡過馬路，之後兩母女在附近的翡翠明珠廣場，搵了一間日本餐廳坐低醫肚。Bell拎住本Menu「O晒嘴」，應該都是花多眼亂，結果她終於望一望個女求救，不過囡囡就專注隊支檸檬茶，阿媽惟有自己發辦啦，隊到一半，囡囡都好孝順咁遞支茶畀媽咪飲，可惜對方唔領情。其後一班長輩、好友陸續抵達，見Auntie和Uncle一坐低，囡囡即笑晒口轉攻跟他們玩，其間又舉起盒玩具Show畀大家睇，而坐在側邊的Bell繼續睬你都傻，耷低頭大啖食。不過冇耐一班大人開始自己傾，搞到囡囡好冇癮雙手托腮，連可愛的笑容都收番埋！