【《東周刊》聖誕Party】Mani代楊生送獎金 王浩信向海嵐興奮送禮
昨日，王浩信(Vincent)、向海嵐(Anne)、霍汶希(Mani)、楊天宇、黃浩然、曾航生及李天翔親臨星島新聞集團大廈參加《東周刊》聖誕Party，有食有飲仲有獎抽，員工抽到獎固然開心，負責抽獎的一眾藝人亦非常興奮。將會開拍《踩過界II》的王浩信表示自己無抽到獎，但好開心可以做聖誕老人，「送禮開心過收禮物。」而Anne就抽到一個小擺設，「我影完相，攞咗個Luck就送返出去再抽。」
撰文:廖思慧 採訪:杜淑霞
昨日的雜誌聖誕Party玩咗個幾鐘，一大半時間抽獎，眾藝人及經理人都有帶禮物或利是現身Party，約50份禮物，一半美容中心禮品，另外就係約3萬元現金獎，而英皇集團主席楊受成先生送出一萬蚊作抽獎之用，Mani帶埋畢業於美國西雅圖華盛頓大學，17年簽約英皇的藝人楊天宇到場負責抽獎，每份一千蚊，員工們非常興奮。
Vincent聖誕匿埋背劇本
全程表現雀躍的Vincent表示呢個Party應該係今年唯一參加嘅聖誕Party，「下星期開始拍《踩過界II》，收到劇本，好多法庭戲好多嘢記，所以聖誕要努力背劇本，無時間去玩嘞。」問到回顧19年發展，Vincent覺得好充實好開心，因為Summer去咗紐約讀咗一個兩個月的演藝課程，「同學嚟自世界各地，好多都有演戲經驗，入行前試過上堂係單對單，今次學到好多嘢，因為同學都有唔同背景及演戲方法，好大收穫，絕對可以幫到我喺演藝生涯上再進步。」
Anne滿意19年工作成績
至於展望2020年，Vincent透露已接三套劇，《踩過界II》外還有一套懸疑劇及另一套並非TVB製作的劇，所以希望自己及身邊人都可以身體健康，因為狀態好先可以做好自己嘅工作。而向海嵐表示聖誕前後都有工作，聖誕反而無，可以約朋友開Party。講到19年工作，Anne坦好滿意。「好多新嘗試，例如可以上電視唱歌，又可以喺賈思樂演唱會自彈自唱。」問到跟朋友合資的珠寶生意，Anne坦言上半年OK，但下半年唔好，「但拉勻都OK，所以呢期會喺舖頭打躉，因為聖誕除夕應該好多人會揀珠寶送禮，所以要努力啲爭取營業額。」
|
鍾意就快D Share啦！
|
|
|