43歲才子徐緣（徐俊文）疑背妻偷食，跟34歲前港姐鍾溥敏（Mandy）傳緋聞，Mandy被疑似徐太在去年12月於FB點名「拆散了我的家」，直到本月初，徐緣在FB承認「做錯了」：「過往一直不懂得好好維繫感情，對太太和女兒有所虧欠，現在需要為自己的行為負責。」惟言猶在耳，昨晚徐緣和Mandy在旺角蹺手行街斷正，肆無忌憚玩婚外情。
《蘋果》收到讀者提供相片和短片，指昨晚約7時許，在旺角砵蘭街附近見到徐緣和Mandy：「佢哋喺等過馬路嘅時候，齊齊戴上口罩，之後行向朗豪坊方向。」從讀者提供的相片和短片來看，雖然只得兩人的背面，但徐緣的一頭灰白髮好易認，而相中的長髮女子着短裙騷腿，蹺實徐緣的左手行街，表現親密，讀者指她的樣子很似Mandy。
今日《蘋果》致電Mandy求證，指昨晚有讀者在旺角見到他們，Mandy在措手不及下咿咿哦哦：「喺旺角？哦，er...」停頓數秒：「係呀，好似開完會，喺朗豪坊。」問到不怕被指做第三者？影響了徐緣的屋企？她說：「er，怕唔怕呀？都⋯⋯都有啲困擾嘅。」追問兩人的關係？Mandy說：「都係工作上面囉，不過而家工作上都有啲影響，可能好多project都停咗，噚日喺朗豪坊傾project，傾完分開咗。」
雖然蹺手行街，但Mandy死撐兩人沒有拍拖，不涉及男女感情，對於徐緣在社交網承認虧欠太太和女兒，問Mandy有甚麼想解釋？她支吾說：「我諗佢哋兩個嘅感情事，佢哋處理番，但係我就⋯⋯應該唔係好關我事，我只可以咁講。」
問徐緣有否追求她？Mandy停頓5秒：「唔⋯⋯我諗⋯⋯呢個⋯⋯總之我哋而家冇任何發展。」之前呢？她說：「之前都冇。」問她會否做第三者？她說：「我唔會啦梗係。」會否發誓跟徐緣真的冇關係、冇男女感情？她靜了一會，說：「我只可以發誓，佢離婚，佢嘅感情，我係冇介入佢嘅婚姻。」
由於徐緣在FB中沒透露會離婚，只稱「懇請大家給予一點空間，讓我們私下好好處理婚姻後續及生活安排。」而堅稱跟他只是工作關係的Mandy，卻率先代爆徐緣離婚，問到是徐緣跟她說會離婚？Mandy知道衰多口後緊張說：「我淨係知佢哋傾緊，唔係太知佢嘅決定係點。」如果他離婚後，兩人會否有機會發展？她說：「嘩，呢個，我諗而家都係顧好份工先。」問到現在有否男友？她說：「分開咗一段時間，舊年嘅事。」分手是否跟徐緣緋聞有關？她說：「唔關事，都拍咗幾年，大家有啲嘢唔夾。」
雖然Mandy口口聲聲不認跟徐緣偷食，但有聲稱是徐太的胞妹，在徐緣FB留言鬧爆：「你呢個人渣，由始至終你有冇同我家姐及緣緣親自道歉過⋯⋯呢頭叫我家姐畀時間你諗清楚，嗰頭同鍾溥敏去高雄。」
來源 source: http://hk.entertainment.appledaily.com
|
鍾意就快D Share啦！
|
|
|