【爆相爆片】黃心穎去年4月被《蘋果》踢爆「安心偷食」轟動全城，她隨後避走美國，12月終於返港。心穎近日似乎已經走出陰霾，不時在Ig貼相，前日更被讀者李小姐捕獲，與樂隊RubberBand鼓手泥鯭到寵物店濕平。泥鯭大前年曾宣佈向女友求婚成功，昨日被爆與心穎濕平後，他無奈回覆稱已經分手。
黃心穎與許志安爆出「安心偷食」後，許志安火速開記招流淚道歉，獲老婆鄭秀文原諒，兩夫婦日前雙雙去跑馬地中藥舖買金銀花，鄭秀文昨日更事業上高峯，再獲香港金像獎最佳女主角雙提名。而心穎自事件後避走美國潛水八個月，於去年12月終於返港，之後有傳她為復出試水溫，惟事業未有起色之際，她被踢爆偷會RubberBand鼓手泥鯭（原名黎萬宏）。
狂掃狗糧
《蘋果》讀者李小姐透過「爆相爆片」直擊，心穎在前日下午3時許，孖住泥鯭在海怡工廈行寵物店買寵物用品。李小姐說：「開頭認唔到黃心穎，只係認到泥鯭，兩個一路行一路睇寵物嘢，又傾買乜，因為有狗仔吠得好大聲，黃心穎喺度睇狗仔，我趁機行到好埋一齊睇，聽到佢講嘢，先認得佢係黃心穎。」從相片見到，心穎和泥鯭都戴上口罩，不過心穎身上的白色衞衣，曾在她社交網出現，她曾着過同一件衫去旅行。
李小姐指心穎和泥鯭睇狗糧，又睇飲水器：「泥鯭問店員『有冇處方糧』，店員話要喺醫生度買，兩個傾買乜，黃心穎把聲好姣，一路行一路有講有笑，泥鯭負責推車仔，睇佢哋買嘅嘢，似養咗隻新寵物咁，最後黃心穎負責埋單畀錢，離去時泥鯭就搬一箱大紙盒，黃心穎攞住兩袋，泥鯭幫佢搬咁多嘢，唔該都冇講一句，明顯係『好朋友』。」心穎昨在Ig貼出狗仔相，原來她新養了3隻唐狗仔。問到兩人有否避忌？李小姐表示：「黃心穎有周圍望人，但泥鯭就警惕低，店裏面客人唔夠十個。」李小姐指兩人舉動並不親密，但感覺像情侶行街，李小姐又表示：「我有朋友話泥鯭住將軍澳，見過泥鯭同女友放狗。」
已拍婚照
泥鯭在大前年向拍拖多年的圈外女友阿欣求婚成功，當時在社交網晒求婚戒指放閃，前年兩人在西貢影婚紗相，有指為翌年婚禮做準備，但泥鯭之後卻沒公佈婚期。《蘋果》致電向泥鯭了解，泥鯭卻驚爆已和女友分手，他以短訊回覆：「多謝關心，我目前係單身，之前的確係諗住結婚，但最終結唔成，上年已經分開了，只係我一向都prefer低調處理私人事，所以冇特別公佈，呢個時勢，希望大家關注疫情小心身體。」
心穎昨日以短訊回覆《蘋果》：「只是一個有養唐狗經驗的朋友陪我買寵物用品。沒有其他回應，多謝。」提到泥鯭的感情事，心穎則表示：「交番畀佢自己回應吧。多謝關心，大家健康緊要，其他也不太重要。」心穎和泥鯭的「朋友」關係好低調，在心穎的Ig中，記者只找到一張兩人於2016年的大合照，泥鯭在相中只佔據後面靠邊位置。
採訪： 皓騫
來源 source: http://hk.entertainment.appledaily.com
|
鍾意就快D Share啦！
|
|
|
