【頭條獨家】以前掛住湊女忽略朋友 龔慈恩有工開有Fd好滿足
繼劇集《牛下女高音》後，56歲龔慈恩喺TVB新劇《大醬園》中跟吳岱融再成為「夫妻」，兩人早年喺《嬴單傳奇》開始結緣，估唔到呢對「夫妻」做足32年，認真有默契。不過，龔姐坦言公私分明，失婚事冇同吳岱融傾訴，就算拍《大》劇期間被傳媒踼爆已離婚，她只會專心拍戲，唔會將私人負面情緒帶入工作中：「我OK嘅，知道應該點做，咁大個人係有啲EQ嘅，我有分寸。」採訪：方騫平 服裝：magazzingroup
龔慈恩喺TVB新劇《大醬園》中飾演大當家夫人席德容，雖然順從老公，但當家道中落要挺身持家，係個堅毅女人，同《牛下女高音》大女人嘅角色好唔同：「現實版我冇大當家夫人咁有本事，通常我只係follow小朋友(子女) 嘅指令。其實同經營家人、男女朋友關係，要互相了解同遷就，開心唔開心攞出嚟講，一齊面對。」
快樂最重要
龔姐又形容拍《大醬園》好辛苦，但返嚟TVB感覺好開心。問到係咪寄情工作？她堅持有工作永遠係開心嘅：「以前有段時間主力湊小朋友，忽略咗朋友，𠵱家工作時搵到舊朋友，又識到好多新朋友，咁咪開心囉。啱啱拍《香港愛情故事》入面有句對白好犀利：『咁你就要更加努力令到自己有更多開心嘅時間！』對自己好有提示，人當然有開心唔開心嘅事，不過，喺適當環境下要有適當安排囉，其實呢個年代有冇拍拖，有冇另一半都冇乜所謂，最緊要生活過得自在開心，有自己工作，仲可以選擇同志同道合嘅朋友一齊，有愛錫嘅子女，做人簡單快樂經已好滿足。」
來源 source: http://hd.stheadline.com
|
鍾意就快D Share啦！
|
|
|
