【頭條獨家】回蘇格蘭定居前再做義工 喬寶寶入羅湖懲教所製口罩
新冠肺炎肆虐，香港一罩難求，生於香港的印度人喬寶寶上周六幫在港經營印度餐廳的好兄弟派口罩畀長者，引起好多正面迴響，個個大讚寶寶有善心。不過，受疫情影響下，喬寶寶由二月至三月的周年晚宴工作全部被取消，捐失慘重！既然留港冇收入仲要交租，因此，寶寶決定做埋手頭幾個慈善工作後提早於3月離港返回蘇格蘭定居：「我都想做多幾次義工先走，幫吓人，畀多啲正能量囉。」採訪：方騫平
喬寶寶上周喺印度返嚟後即馬上去派口罩：「因為大伯娶新抱，我去負責拍手掌，其實每次返印度都係有喜慶。第一次係我4歲、第2次結婚、第3次大仔印度豹出世、第4次姐姐嫁女、第5次細仔誕生、第6次結婚25周年，今次係第7次喇。」寶寶表示印度疫情唔算嚴重，「可能地方大，啲人都冇乜戴口罩，但我都有喺印度買咗百幾個口罩返嚟派畀有需要嘅人，因為只得兩層，每個大概4毫子港幣，之前朋友買嘅三層口罩就全數用嚟捐出去。」
同港人齊抗疫
至於蘇格蘭情況，寶寶就話都ok，「老婆知香港狀況，佢見我想幫啲老人家，做吓善事留多一陣，故冇催我快閃，我冇理由喺香港呢個逆境時間走，咁樣同做逃兵冇乜分別，作為鍚克教徒，要保護弱者，招呼窮人。」他又透露 3月初會跟幾位退休印度懲教員去羅湖懲教所做一日義工，加入趕製口罩大軍：「我哋朝九晚五落手落腳做，同心抗疫，呢次算係告別作，因為之後會飛去韓國幫ViuTV拍旅遊特輯，拍完喺韓國直接返蘇格蘭，我都好唔捨得香港，第日有嘢拍就返嚟，唔想咁早退休。」
來源 source: http://hd.stheadline.com
|
鍾意就快D Share啦！
|
|
|
