網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2020年3月20日 星期五

【獨家尊訪】鄧兆尊幾兄妹日日捱打 祥嫂用鞋拍打兆榮臉頰 #洪金梅 #祥嫂 #鄧兆尊

身為一代伶王新馬師曾之子,鄧兆尊可說是含着金鎖匙出世,但童年生活最難忘的回憶,卻是四兄弟姊妹捱打的日子!祥嫂洪金梅對子女的管教特別嚴格,兆尊和弟妹可說 ...






身為一代伶王新馬師曾之子,鄧兆尊可說是含着金鎖匙出世,但童年生活最難忘的回憶,卻是四兄弟姊妹捱打的日子!

祥嫂洪金梅對子女的管教特別嚴格,兆尊和弟妹可說是從小就給祥嫂打到大,而且是毫無道理的打,四兄弟姊妹常想如何逃過母親的藤條,但後來才發現,無論做得對或不對,結果都是一樣,媽咪今日會不會打完全是看心情,後來被打變得習以為常,兆尊他們都懶理了,他表示:「我阿媽係嚴到你唔信嘅,如果我哋考試或測驗唔夠80分,係唔可以睇電視,嗰時最細個妹未出世,我哋三兄妹如果其中一個唔合格,係一齊冇得睇電視,咁個妹成日都係70幾分,所以成日冇電視睇,不過有時會出下蠱惑叫醒阿爸,去阿爸間房睇,如果阿媽唔畀,咪喺窗口望隔離屋嘅電視囉!」

俗語說「無仇不成父子」,似乎用在母子身上都可以,兆尊說:「以前阿媽對我哋嚴到係一個犯事三個打,我成日無啦啦捱打,記得有一次我阿媽話:『我好民主嘅,我有乜做得唔啱,你哋就講出嚟,我就會改。』但我妹(小艾)係咁掹住我衫尾話:『唔好講!唔好講!會死人!』當時我仲同阿妹講唔怕嘅,佢好民主嘅!點知講唔夠兩句,佢已經一巴打過嚟!當時我只係想講:『唔好咁嚴,有時講下道理好啲!』但佢都聽唔入耳!」

兆尊曾經將自己童年時被母親打的經歷當笑話告訴朋友:「我曾經講過個笑話畀人聽,話放學返嚟,一入到門口就俾人打,咁俾人打梗係問點解俾人打,咁佢話因為你冇執床,想執死啲工人呀!咁當時我覺得都講得啱喎,真係唔應該做死啲工人,咁翌日咪起身執埋床先返學囉,點知放學返到嚟一入門又打,問點解?佢話你執晒啲床,工人邊有嘢做呀!」

當時兆尊只得12歲,要一個青少年去處理如此複雜的問題,自然不知所措:「慘嗰時我得12歲,咁深嘅問題我真係答唔到,直到喊住去問老竇,老竇話『畀我諗陣,轉頭答你。』後來老竇教我:『你好似我咁,唔好落床咪得,咪唔使俾人打囉!』佢啱嘅喎!如果件事擺喺佢身上⋯⋯但我唔得呢!我話老竇你唔使返學,我要呢!後來咪好似開大細,一時執吓,一時又唔執囉!其實我哋都知,到頭來都係因為我阿媽起身有時覺得腰酸骨痛,要搵人嚟鬧下,你唔好彩俾佢eye contact到咪死咗囉!呢啲咪係我哋細個又想笑又欲哭無淚嘅問題!」

小孩子也是很精靈的,兆尊和弟妹嘗試幫母親約朋友在外打牌,等她不在家就不會打他們,兆尊說:「好咗一輪,收尾佢都識破咗我哋,因為佢喺屋企打,不過有時佢差一隻麻雀腳,要我哋幫手砌牌,咁我就同佢講,幫完你唔好再打我哋,咁因為有朋友喺度,佢都會話ok嘅!」

從小到大,祥哥都沒有打過兆尊四兄妹:「我阿爸係好似一個細路,但又係一個聰明人。」祥嫂經常打子女,為何祥哥不管呢?兆尊說:「每次阿媽執行家法時,佢啱啱行緊出嚟,好自然會轉返身入房喎!佢好充份避免接觸呢啲畫面,我哋試過話佢冇義氣,佢就話:『我係冇義氣㗎你哋捱得打,我唔捱得嘛!你哋諗吓,我都喺背後支持你哋呀!』阿爸真係得啖笑囉!」

不過,現場沒有入鏡的小艾為父親辯護:「其實阿媽多數係揀老竇瞓緊覺嘅時候先打我哋,每次要我哋四個一字排開跪晒喺度,佢總係打我先,有次細佬(兆榮)俾阿媽打時話識童子功,打佢唔會痛,阿媽聽到仲嬲,成隻鞋車佢塊面幾下就問細佬:『唔痛吖嘛?唔痛吖嘛?』當時車到佢痛到流晒眼淚,佢先喊住話未練上塊面度,阿媽同我哋都忍唔住爆笑起嚟!」

祥哥和祥嫂相繼離世,沒有了父母這把保護傘,會否感受到人情冷暖?兆尊笑說:「你知我喺一個比較怪嘅家庭長大,細個時阿爸就帶住我見過唔同嘅人,有大哥級人物,又有啲好厲害嘅人,從小我就知道人脈關係好緊要,阿爸喺度時屋企當然係好多人畀面,人在人情在係事實嚟,記得以前屋企後巷係可以泊車嘅,阿爸走咗之後,後巷突然多咗兩條鐵柱唔畀泊車我覺得唔好咁計較呢啲嘢,永遠俾人保護住唔見得係好事,始終係要靠自己。偶然有掛住阿爸,諗返起細個成日伏喺阿爸背脊,好似好小朋友,但嗰時都幾開心,可惜我冇小朋友,唔知個仔伏喺隔籬自己會點!」

撰文:鍾國仁

攝影:沈健程

攝錄:林德雄、葉君海

-----------------------------

第三屆最港電影大獎

按此立即投票

-----------------------------

【武漢肺炎】專頁

全民自救 抗疫資訊盡在《蘋果》



兆尊在訪問中笑言自己生長在一個奇怪的家庭,一早洞悉人情冷暖。


祥嫂先後為祥哥生下兩子兩女,兆尊在專訪中,透露自己和弟妹幾乎日日被祥嫂打。 (資料圖片)


兆尊指當年若然不想被祥嫂打,最好不要和她有眼神接觸。(資料圖片)


四兄妹童年時為免被祥嫂打,各出奇謀鬥智鬥力。(資料圖片)


小艾透露曾向祥哥求救,但最終仍難逃被打命運。(資料圖片)


爭產事件告一段落後,祥嫂和四子女關係亦漸緩和。(資料圖片)



鍾意就快D Share啦!