提起鄧兆尊的名字，除了想起轟動一時的鄧家爭產事件外，可能最快勾起印象的，就是他的風流韻事，沒有6呎高的兆尊，卻同時坐擁3位女朋友，比梅開四度的爸爸更本事。
鄧兆尊在4兄妹之中，感情生活最多姿多采，眾所周知3位女友的生活全部由他照顧，難得的是，3女相處和諧，至少沒有爭風呷醋而讓兆尊覺得煩惱。但多女友並非一定是好事，結婚就是一個大難題，你跟哪一個結婚，其餘兩個都不會開心，就算妹妹小艾和弟弟兆榮曾向兆尊催婚，但兆尊卻無成家立室之意，因為不想得罪其中一位女友！兆尊笑說：「好多人同樣問過我呢個問題，首先我唔可以下下滿足到大家嘅要求，我結唔結婚係我將來生活嘅事。香港嘅一夫一妻制係幾困擾我，兩個人一齊唔係一定要在乎一紙婚書，我見到好多後生嘅結咗，唔夠3、4年就離婚，離婚率係相當高，反而我哋呢啲捱到10年、20年嘅就係另一回事，已經唔係愛情，係感情。佢哋亦唔係話要爭乜嘢名份，其實每個人追求嘅嘢都唔同，但我相信佢哋已經唔係追求轟烈愛情嗰種人，反而係想安穩同開心，我哋可以喺埋一齊咁耐係一種機緣。」
兆尊3位女友Carmen、Cherry（車厘子）和Claire，前2位跟他超過20年，只有阿三Claire於3年前才開始跟他，不過，最近有傳阿三要的東西越來越多，最終令兆尊受不了，結果把阿三Claire飛掉，但空位很快又被另一位新歡補上。求證兆尊，他承認其中一位女友是分手了：「耐咗，志向唔同咪和平分手囉！至於係咪有新女友，咁睇睇貴報仲有冇咁多人手去跟我嘅，應該好快可以跟到同見到嘅！咁多女朋友唔係一件好事，我好嚮往自由，鍾意一個人，但你越追求呢樣嘢，上天實整蠱你，到頭來係冇嘅！同埋同幾個人一齊，係好忙㗎，嗰啲煩亦係比普通人乘大幾倍，習慣咗就冇乜嘢，但奉勸啲人最好唔好試囉，試會幾大問題㗎！」
兆尊覺得女人煩，但為何甩了一個，又去交回一個？他說：「當你年紀大咗，你會發現有緣份來到，啲嘢係好落力去避都避唔到，好似你哋幫我宣傳有咁多錢（傳祥嫂留下15億遺產）時，啲狂蜂浪蝶衝晒埋嚟，真係擋都擋唔住，好多，有好多同我好耐冇聯絡嘅女仔，突然換晒頭像相打嚟搵我，我係覺得好奇怪，總之唔好搵我，3個已經好夠，冇可能再有第四或第五個。」
有本錢花弗享齊人福的兆尊，揚言對女友的要求好簡單：「就係人品要好，樣貌係次要，幾時都話女人到50、60歲，個樣好難仲keep到好靚，除咗鍾楚紅嘅啫！其次話咩人都好，最重要個人係好係純嘅，如果人唔好，我畀你幾靚都好，返到去盞日日嗌交，所以喺埋一齊性格同生活模式係要夾。」
3女共侍一夫，爭風呷醋是必然定律，他哈哈笑說：「話冇就呃你嘅！不過有時你見到佢哋3個會同我一齊出嚟食飯、行街，因為好簡單，當佢哋有一個共同敵人，即係我呀！佢哋就會好合拍，感情會好啲，好似過時過節，各人想買一份禮物，咁唔係好過份，咁敵人係我，咁想嚟鋸我條頸，咁咪去俾佢哋鋸囉！」
現時3位女友都是住在灣仔區，方便兆尊出入，但他卻沒想過一屋三妻，他搖頭說：「我爸好早講過，呢樣嘢只有劉克宣做得到，呢樣嘢就唔好博我媽生前都講過要買間有三層高嘅屋畀我同3個女朋友住，我就同我媽講，咁收樓時記住將啲刀刀碗碗收埋晒，仲要小心會火燭！咁呢啲情形好難講，好難避免，我覺得盡量留啲空間畀大家，個人有個人嘅生活方式，你冇理由夾硬擺埋一齊，係錯嘅，冇咁嘅必要。如果連中間屋過屋嘅路程位都冇埋會好慘，因為中間嗰個路程我可以好自由，做乜都得。」
撰文：鍾國仁
攝影：沈健程
攝錄：林德雄、葉君海
-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com
|
鍾意就快D Share啦！
|
|
|
