武漢肺炎打殘全球經濟，香港各行各業都叫苦連天，在「限聚令」及6項規管食肆等措施下，經營小生意的藝人捲入血肉長城，鄧一君連執兩間麵店勁蝕200萬，李雨陽退股小食店及快餐店共蝕30多萬，十分肉赤。「限聚令」將於23日屆滿，各從商藝人為復市做準備，本希望絕處逢生，惟有消息指港府擬「加監」至5月初，不知如何撐下去！投資party room的前無綫小花陳潔玲感前路茫茫，每月勁蝕6位數的她直斥好荒謬：「我哋唔識得變錢，咁樣同逼我哋去死冇分別！」
【party room零資助】
因應疫情擴散，政府最先宣佈娛樂場所和party room強制關閉14天，經營兩間party room的陳潔玲連同香港派對場地協會的政策發展部創會副會長Ryan Wong，日前在觀塘接受《蘋果》訪問，提到party room在港場地總數超過500間，從業員有幾千人，是疫情下的重災區之一。陳潔玲說：「疫情開始時生意已經一路下跌，直到打邊爐家族事件發生後，生意係大跌九成甚至零生意。」
本身為經營者的Ryan表示如果政府延長關閉令，恐怕會有一輪倒閉潮，現時每月虧損已達6位數：「有啲兼職員工已經暫時停咗，但全職嘅總要繼續出糧，業主方面都肯減三成甚至一半租，但始終冇得營業，就算減一半租都係淨支出。」
提到政府早前公佈的兩輪千億救市抗疫基金，但派對場地業界卻不在支援和補助範圍行業內，陳潔玲直斥荒謬：「政府點名話party room行業有份要停業，但啲支援補助就冇我哋份，我哋唔識得變錢，咁樣同逼我哋去死冇分別。」派對場地乃新興行業，Ryan已四出聯絡議員，望可代表業界向政府發聲。陳潔玲希望關閉令不會延長：「再係咁一定做唔住，冇辦法之下都惟有止蝕，政府嘅政策唔該可唔可以周全同快少少？一日唔封關始終都阻止唔到。」
【戲院影片排期亂晒龍】
戲院在過去兩星期停業，但內部仍有限度開工，主要是操作放映機，以保持正常運作。據一院商向《蘋果》表示，戲院復業的首輪電影，理論上要先完成停擺前上映的戲，有院商說︰「不過有部份片主話，想知星期四（23號）係咪真係開得番，再決定係咪繼續上映，好似《喋血戰士》、《無痛斷捨離》都係上咗兩日就停咗。其實而家啲片已經排到亂晒，一堆片積咗喺度。」而已安排5月上映的電影包括有太保、袁富華主演的《叔．叔》和溫碧霞主演的《墮落花》，未知能否如期上映。
該院商還透露對戲院在解封後重開充滿信心，戲院的小食部也都會做出相關配合安排，暫時只出售包裝食品，而熟食類小食則會待疫情穩定後才供應︰「上次突然停業，熱狗包、腸仔、燒賣全部都要掉晒。今次費事入貨又嘥，而且而家都冇乜人會買呢類小食。」有戲院的小食部負責人抱怨政府慢半拍及臨急抱佛腳的作風︰「你話停就停，冇事先通知都算，你重開都早一星期講畀人知，等人有心理準備，開戲院你估開水喉咁，話開就開咩。」
【飲食業仍抱觀望態度】
吳啟明在上環經營的食肆「慢煮兩餐」，自2月疫情嚴峻期間已暫停晚巿，限聚令下只做午巿及外賣生意。吳啟明日前接受《蘋果》電話訪問時說：「我會睇住限聚令幾時完，真係完咗先考慮開唔開番晚巿，回復正常，一定要安全情況下，如果每日得番幾宗個案都會考慮，唔會限聚令完即開，我會睇多一個星期再決定。」
歌手鍾達茵（Pam）與友人合資，分別在觀塘、旺角經營酒吧餐廳及日本料理餐廳，疫情下仍堅持不裁員，望與員工共渡時艱，她說：「限聚令下，餐廳坐滿都係得一半，我睇到都心悒。」訪問當日，Pam一早返日本餐廳做準備，她稱早在政府要求食肆跟足防疫指令前，店舖已自發為所有入座食客量體溫及提供消毒搓手液，當條例實施後，亦要配合政府要求，枱與枱之間至少保持1.5米距離，她說：「疫情爆發時生意已經跌咗唔少，條例實施後再跌一半，惟有再推出一啲特價定食，營業時間亦縮短咗，總好過咩都唔做。」
對於政府的千億救市基金，Pam表示聊勝於無：「好多條例都寫得唔清晰，坦白講都唔知點為之合資格，計算方法又唔太清楚，事實上就算攞晒所有資助都係要蝕錢。」她稱餐廳可以閂門唔做，但她憂慮「閂咗開唔番」，她說：「寧願同大家一齊捱落去，員工亦願意調整薪金。」
【按摩店生意額下跌八、九成】
鄧洢玲（阿旦）在3年前與友人合資過百萬，於銅鑼灣開設按摩店Blossom，勉強捱過去年社運，今年再遇武漢肺炎，阿旦早前已自發停業14天，前後共停業28日，期待可以盡快恢復正常營業。阿旦已對員工做足心理輔導，確保不裁員，同時加緊店舖消毒，衞生工夫做足準備復巿。她坦言，雖然獲業主體諒減租，但仍要每月蝕6位數字，她說：「疫情下生意額下跌八、九成，自己冇最壞打算，唔會考慮止蝕執笠，因為唔係我營運生意方針錯誤，而家一個月蝕6位數，當然係肉痛同傷心。」
她指現在營運最困難是沒有現金流，希望政府對這些非傳統行業可以補貼租金。對於防疫，阿旦將客人飲用的水杯轉用紙杯，又添置一部空氣清新機，亦會為客人量體溫、提供消毒濕紙巾及搓手液等，希望疫情過後推出優惠自救。她說：「好擔心再停業，千祈唔好，希望就算限制空間同人數，多少生意都可以做。」
採訪：曹家誠、何永寧、陳杰、張明
攝影：仇志德、林賓尼、馮嘉銘、陳俊強
-----------------------------
App內1-Click訂閱《蘋果動新聞》
按此了解更多
來源 source: http://hk.entertainment.appledaily.com
|
鍾意就快D Share啦！
|
|
|