2020年4月13日星期一

【頭條獨家】約友人Happy Hour吹水　張建聲放負後一身鬆晒 #張建聲

【頭條獨家】約友人Happy Hour吹水　張建聲放負後一身鬆晒

其間友人撳手機，張建聲悶到咬手指。

受社會運動和疫情影響，影視界進入了冰河時期，身為多產演員的張建聲（Justin）近來都十分愁，不時於社交網出Po放負。在酒吧停業令實施前，他就相約朋友到銅鑼灣飲酒兼吹水，在友人開解下，Justin終於識笑，再煲多幾口煙，成個人Relax晒！採訪：梁志明

張建聲為拍戲去到好盡！其主演的ViuTV新劇《打天下》昨日啟播，去年拍攝該劇期間，他不單止被武師凌空飛腳踢到爆缸，其後仲為自監自演的電影《作家的謊言：筆忠誘罪》撞崩牙，可謂極大犧牲！雖然《作》片上映期間，撞正社會運動致票房唔理想，但該片後來獲邀成為美國芝加哥「亞洲躍動電影展」閉幕電影，為Justin 打下強心針，近日更索性撈過界做「編劇練習生」，無奈又遇着新冠肺炎大爆發，他也坦言：「身心俱疲。」搞到日日靠煲煙同飲酒消愁！

悶到咬手指

早前傍晚5時許，Justin相約好友到銅鑼灣百德新街某餐廳Happy Hour，兩人於戶外茶座飲吓啤酒、吹吓水，暢談甚歡，其間他更不時放聲哈哈大笑，相信都舒了不少壓。中途友人行開，Justin即拎出電話狂撳，朋友返到嚟亦一齊做低頭族，悶到他都忍唔住咬手指，結果頂唔順Dead air，他都借尿遁去唞啖氣，不過從廁所回來後，Justin就開始邊傾邊扯煙。逗留約1小時，兩人才一起Call車離開，在等車的短短數分鐘，他又爭取時間企喺路邊「呼吸」一下，醒神晒！