吳若希老公何兆鴻（Alex）、關寶慧、劉玉翠（現名劉喬方）、劉倩婷（Sandy）等，今天於中環出席時裝騷，近日有消息指吳若希再陀B，並且成功追到兒子，湊成「好」字，但Alex今日在現場拒絕受訪。
關寶慧與劉玉翠同為舞台劇出身，提到蘇玉華與潘燦良終於結束24年愛情長跑，本月入紙登記結婚，二人聽後表現驚訝，關寶慧笑說：「係咩？以為你話同第2個結婚，咁就驚喜。我都整返齊啲牙，希望婚姻好啲，希望有生之年可以嫁得出。」劉玉翠續道：「要嘞，今年旺桃花。90歲結婚都冇問題，拍咁多年結婚係好浪漫，恭喜佢哋，身壯力健！百年好合、永結同心、幸幸福福！」關寶慧笑說：「祝佢哋兩年抱三，最緊要開心。」
劉玉翠透露獲姓名學大師改名，希望告別「藥煲」的命運，改善自己及家人健康，也當作送給自己入行30年的禮物。關寶慧笑指想改名「關人鬼事」，她說：「未入行前扶乩改過一個名，但我嫌太普通冇用，可能用咗就早啲紅，而家連個名係乜我都唔記得，我真係好衰，不過如果真係要改，我想用返滿州名『瓜爾佳寶慧』。」
另外，劉倩婷指近月因疫情少出街，主力網購衣服，承認有瘋狂「拆禮物」，她說：「自己喺屋企冇專登打扮，但小朋友唔方便出街，所以每日幫囡囡扮靚，就好似時裝騷。」她又透露囡囡讀K1，未能復課，幾個月來更當上老師，教她寫字及跳舞，她說：「廚藝進步咗，但唯一冇時間做……」是否沒時間造人？她說：「哎呀！講到我面紅喇！」劉倩婷不諱言想生多個，但造人大計因武漢肺炎疫情押後，她說：「老公話母親節禮物係送多個BB畀我，真係多謝晒。囡囡都想多個細妹，可以幫妹妹扮靚。」
採訪：羅慧敏
攝影：沈健程
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|