香港導演陳木勝今早不幸因鼻咽癌離世，終年58歲，遺下太太及1子1女。擅於拍攝警匪商業動作電影如《新警察故事》、《保持通話》及《掃毒》的陳木勝，曾5度獲香港電影金像獎最佳導演獎提名，是香港電影界的重要一員。
寰宇電影公司老闆林小明與陳木勝共合作了7部電影，兩人關係十分要好，今日陳木勝去世，林小明接受《蘋果》電話訪問時表示：「上個星期先同佢通過電話，知道佢有病都一時間，經常進出醫院，佢上年拍戲時已知有病，但佢仲堅持要拍埋部戲先，我一直勸佢醫病先，後尾知佢都試好多方法去醫。今日聽到呢個消息係好唔開心，佢係一個非常好嘅人，佢嘅離開，係電影圈又損失一位人才，58歲係好年青，係最光輝時候，真係好可惜。木勝係一位好專業導演，要求好高，係無止境嘅對自己要求，有時我都覺得佢太過執着，不過呢個執着亦可能係佢成功之處。」
電影工作者總會會長田啟文（田雞）與陳木勝識於微時，今日聽到這噩耗感到突然，他表示：「當年木勝喺麗的電視做信差時，我仲做緊場務，後來有人鼓勵佢做導演，佢就喺麗的跟蕭生做PA，後來佢跟埋蕭生去無綫發展，輾轉又跟咗杜琪峯做PA，到梁李少霞搞珠城，木勝就正式出去影壇發展，識佢咁耐，佢性格都係比較溫文爾雅，好內斂，因工作關係近年耐不耐同佢會有聯絡，知道佢有病，但冇諗到咁嚴重。」
黃百鳴1987導演的《呷醋大丈夫》時曾與陳木勝合作，兩人交情很好，今日黃百鳴表示：「聽到呢個消息好驚訝！佢第一部戲就係同我聯合執導《呷醋大丈夫》，後來我同杜琪峯合作搞百嘉峰影業，木勝就拍咗部好出色電影《天若有情》，我係從來唔知佢有病，佢係一位非常好嘅導演，係新藝城最後一期入嚟嘅導演，今日聽到呢個消息，真係好難過。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於《蘋果日報》你的優惠網上獨家發售！
來源 source: http://hk.appledaily.com
|
鍾意就快D Share啦！
|
|
|
