掃呢頁CODE去手機

2015年5月27日 星期三

紅雨出院 隔離 3歲仔 楊千嬅借病講數壓 G.E.M. [FACE - 418] G.E.M.,G.E.M,楊千嬅,千嬅,鄧紫棋,MF,



由女助手陪出院兼揸車送返屋企,千嬅一落車即急步上樓。

封面

紅雨出院 隔離 3歲仔 楊千嬅借病講數壓 G.E.M.

自年頭開完演唱會後,一直忙到冇停手的楊千嬅,上星期突然發高燒,要立即入養和留院觀察,連老公丁子高亦同時病倒,兩公婆孖住入院。

千嬅捱到支氣管炎,為免傳染,焗住隔離快 3歲囝囝 Torres。留院近一星期,千嬅終在上週六( 23日)出院返屋企休息。當日撞正紅雨,千嬅冒住再淋病的危險都堅持出院,除了掛住囝囝,更因為隨時要以夫妻檔加入深圳衞視的綜藝節目《極速前進》第二季!

大病初癒,需要一段時間休養的千嬅,得知國際漿 G.E.M.都會參加,據知因為怕有比較而諗過推掉。但電視台不斷加碼利誘,又拍心口可以延期就千嬅入隊拍攝,多番講數下,令千嬅心郁郁。

雖然 1千萬人仔係好吸引,不過健康要緊,千祈唔好搵命博呀!

12年生完囝囝 Torres後,堅持一手一腳自己湊的楊千嬅,同時兼顧家庭事業,曾經因為抱仔搞到骨膜炎,日前又因發高燒引致支氣管炎同早期肺炎,要立即入院治療。

發燒加支氣管炎,千嬅被醫生勒令停工休息,焗住留院冇得湊仔。網上圖片

為免傳染其他人,千嬅全程戴住口罩,好有公德。

積勞成疾的千嬅,月前已經試過感冒發燒。網上圖片

派助手找數

要開工又唔肯放手將個仔俾人湊,連丁子高都呻老婆太緊張,「佢(千嬅)朝朝 7點起身湊仔返學,之後又開工,得 3、 4個鐘瞓,根本唔夠休息!(幾時生第二個?)佢未畀期我,最快下年」

上週六( 24日),千嬅秘密離開養和返屋企,當日撞正紅雨警告,不過丁子高要留在家中睇實囝囝,未有現身陪同,只得一名女助手開車送全程帶上口罩的千嬅返家。千嬅曾承諾醫生會返醫院覆診,但連續兩日亦未見露面,只在週一( 25日)派助手到醫院找數。

丁子高同千嬅孖住病,不過有做開運動嘅佢比較強壯,住咗一晚醫院就可以出院。

網上圖片

千嬅入院, Torres要交俾老公同媽咪照顧。

網上圖片

怕做 G.E.M.陪襯

急住出院,除了因為掛住 Torres,更主要係千嬅事業心太重,做了媽咪仍想繼續衝。早前千嬅獲深圳衞視邀請,參加真人綜藝騷《極速前進》第二季,有機會同老公丁子高夫妻檔上節目,玩勻全球多個國家接受挑戰。雖然電視台出 1千萬利誘,千嬅亦心知節目可以幫佢打入大陸市場,但得知 G.E.M.落實參加後,為免變成一早已在內地爆紅的小巨肺陪襯,一度打算以養病為由推掉。

不過深圳衞視非常有誠意,在千嬅留院期間仍死纏爛打,更承諾會加重宣傳,加上可以同丁子高夫妻檔,種種優厚待遇令千嬅再次心動,現時正考慮是否落實參加。

強國真人騷爭排名

千嬅喺微博 po咗留院相後,深圳衞視隨即表示會等千嬅好番, 7月正式開機。《美聯社》圖片

深圳衞視公布 G.E.M.落實參加後, G.E.M.立刻落足鞋油話自己好期待上節目。《蘋果日報》圖片

買下美國高收視節目《 Amazing Race》版權的《極速前進》,在內地一向極受歡迎,人氣拍住《爸爸去哪兒》。早前因堅持在《我是歌手》雙年巔峰會唱新歌而得罪湖南衞視的 G.E.M.,梗係唔執輸黐住另一個大碼頭深圳衞視,寧願推幾場巡迴騷都要參加,仲不斷在微博放風話自己好努力準備,練習練到腳傷添!

千嬅入院前最後一個公開活動,係撐老友黎芷珊的太陽眼鏡活動。

丁子高週一( 25日)同姚子羚男友鄭子邦(右)一齊出席活動,精神唔錯,可以全力照顧老婆。

網上圖片

千嬅冇返醫院覆診,本週一淨係派助手去找數。

捱壞身子

其實千嬅年頭開完演唱會,體重幾個月內激減 15磅,又連續開拍《五個小孩的校長》同王修平執導的《愛的根源》,加上宣傳、錄音出碟,仲有湊 Torres,千嬅已差唔多一年冇休息。對於今次係咪會夫妻檔賺人仔,丁子高就未肯講住,「我唔方便答,你問番寰亞」而千嬅經理人 Alex就表示一切仲未落實,「深圳衞視有搵過千嬅兩公婆,但仲傾緊,未落實接! G.E.M.參加唔會影響千嬅嘅決定!」

今次夫妻同心出戰,如果都撼唔贏國際漿,睇怕千嬅都可以疊埋心水,養好身體生第二胎喇!

千嬅經理人林珊珊話千嬅今年頭搞演唱會時已經發病,之後一直冇好好調理,令身體愈來愈差。

網上圖片

忙住宣傳《五個小孩》,千嬅上週被影到要搭港鐵趕去電影分享會。

網上圖片

G.E.M.今次好易話為喎!

叫得做「宇宙漿」, G.E.M.的態度同氣場當然有番咁上下!不過今次為了《極速前進》第二季, G.E.M.罕有地非常合作,不時上微博幫手宣傳節目,又話自己備戰備到腳都傷埋,咁落力,唔通知道有千嬅,所以唔可以蝕底?

參加完《我是歌手 2》後人氣暴升的 G.E.M.,亦獲邀參加其他綜藝節目《天天向上》。

網上圖片

今年 3月啱啱考到車牌的 G.E.M.,將要在《極》中揸車周圍去完成挑戰。

網上圖片

聲稱為準備《極速前進》第 2季而練到腳傷,好誇張喎!

網上圖片

韓星都玩

楊千嬅同丁子高有機會參加的《極速前進》,係中國版《 Amazing Race》,參賽者要飛去世界各地接受挑戰完成任務,例如搵陌生人影自拍、獨自在河上漂流等。第一季陣容有鄭伊健、陳小春、應采兒同鍾漢良等,收視唔錯。

網上圖片

G.E.M.將會同一個神秘台灣朋友做拍檔,斷估唔會係林宥嘉啩?

《蘋果日報》圖片

曾志偉盛傳會同囡囡曾寶儀父女檔參賽。

圖片

《 Running Man》的金鐘國(左)同李光洙(右)亦會參加,到時肯定成為焦點

網上圖片

港星夫妻搶人仔

一向唔鍾意高調晒恩愛的楊千嬅,今次罕有同丁子高一齊接拍內地真人騷《極速前進》第二季,除了可以賺人仔,更可以打入龐大的內地市場,到時真係大把人仔送上門!其實唔少港星都愛以夫妻檔參加節目,一來唔使分隔兩地,二來叫價又高好多, why not?

網上圖片

張智霖袁詠儀

張智霖袁詠儀傳聞以 3,600萬接拍浙江衞視的《一路上有你》,兩人去到韓國晒恩愛, Chilam間中 chok住講愛妻宣言,被網友激讚係「中國好丈夫」,賺到錢又賺到面!

王祖藍李亞男

王祖藍憑《百變大咖秀》成功在大陸打響名堂,其後上埋《奔跑吧兄弟》,人氣強勁!雖然李亞男在內地零知名度,但有祖藍照住,上年都有得孖住老公上節目《與星共舞》。

網上圖片

陳小春應采兒

一早已北上拍劇又係惠州市政協的陳小春,人脈夠廣,上年獲深圳衞視邀請佢同老婆應采兒參加《極速前進》第一季,兩公婆被分拆成兩隊,但仍然可以一齊飛去意大利等國家比賽,寓工作於旅行!

網上圖片

張晉蔡少芬

憑《甄嬛傳》皇后一角爆紅的蔡少芬,帶挈老公拍住上搵銀。早前兩公婆接拍江蘇衞視的《為她而戰》,據知酬勞過千萬,名氣唔大的張晉更趁機大騷身手,加晒分!

鍾意就快D Share啦!