真人騷
唔玩收購真身 殺入高登 蕭定一：我一定叻過腦燒
一走進中國 3D數碼和謎米位於鰂魚涌的總部，第一個感覺好繽紛：
個 pantry成千幾呎，有得篤波有得打乒乓波，有跑步機有跑馬機，成村員工圍住張大圓枱食午飯，還有人洗緊料煲緊老火湯。
一走進蕭定一的辦公室，第一個感覺好日理萬機：
大班椅的後面放滿了家庭照，蕭定一面前對着兩部電腦，一邊 mon住股市，另一邊 mon住高登討論區……
冇錯，就在訪問前一天（ 19日）， 3D數碼主席蕭定一用全朵開通高登戶口，第一個 post表面係同 11年意圖收購高登，結果得罪高登仔的父親蕭若元劃清界線（雖然老蕭間房就喺小蕭隔籬），實情曲線宣傳旗下第二部改編自高登小說的大電影《壹獄壹世界》。
真的非常看重班高登仔意見和意願，《壹獄壹世界》不但有高登專屬優先場，蕭定一還十分識做地跟班高登仔一齊稱呼父親為「腦燒」。咁啱這天全城熱議大劉仔劉鳴煒教儲錢買樓，我於是也問問 01年與父親成立創作室，如今剛滿 40歲已經是上市公司主席、娛樂圈大人物，年少得志的蕭定一覺得自己算唔算「成功需父幹」。
「我嘅成功絕對係父幹，但唔係錢，係佢俾我嘅智慧同知識。其實理論來來去去都係嗰啲，最好笑係，蕭生永遠做唔到。」
「即係你覺得自己叻過老蕭？」
「一定係！佢比我聰明、讀書比我多，聰明嘅人就唔會專心，睇唔起人寧願孤獨，相對我專心過佢、 EQ高佢好多、人際交往又好過佢，做人做生意最重要就係呢幾樣。」
問心嗰句，俾同一個老蕭你做爸爸，你又做唔做到小蕭今天的成績？
再問一句，劉鳴煒會唔會夠薑話自己叻過大劉？
我嘅優點係識 cut loss
蕭定一的廿四小時點過？
你呢個問題真係問得好好，我諗大多數人都唔知，我近半年生活習慣改晒。𠵱家我每朝七點半起身，一個星期有四日，七點九去打個半鐘乒乓波，星期三就送女返學。每日九點半至七點返工，如果冇應酬，七點半一定準時返屋企食飯、陪女。
點解半年前有改變？
其實囡囡出世三年作息都差唔多，分別只係更早起咗。
聽聞你為享家庭樂，夜晚七點半後唔開電話？（三年前結婚，大女現時兩歲半，一對孖仔七月報到）
唔係唔開電話，只不過係將個電話校成勿擾模式，淨係常聯絡人打嚟至會聽，唔緊要嗰啲就第二日返工至覆。
嗰個半鐘乒乓波除咗愛好，仲有咩意思？
我好懶，每日個半鐘乒乓波對我嚟講係好重要嘅運動，今年踏入四十歲，我成日覺得再唔做運動好快死。男仔四十歲係一個好好嘅年紀改變自己，以前放縱放任嘅生活要收喇。
乜你有放縱過咩？
男仔梗係有啦，我 26去到結婚前 36歲嗰十年， party、飲酒、溝女……理所當然。
點溝嘅呢？你有錢又有名，會唔會好易？
都唔易㗎，成日見報、好多女朋友，越係咁嘅形象越係正經女仔驚咗我。唔正經嘅女仔就話冇所謂啫……
你唔玩一夜情？ target係正經女仔？
一直係，其實我好早……三十歲已經渴望結婚。我一直係想開展一段新關係、睇下有冇得發展，從來都唔係為咗性。
太太點識？
蘭桂坊識，朋友嘅朋友，頭一晚喺酒吧淨係 say個 hi，第二朝瞓醒仲諗住佢，於是打去問下個朋友：你個 friend幾好喎，做咩㗎？可唔可以約佢食個飯！
你追女仔咁直接？
我係㗎，有個朋友都話我嘅方法好特別，唔會死𦧲，得就係得、唔得就係唔得。因為我覺得係咁，死𦧲返嚟嘅愛情唔會美滿，我成日都同人講，如果愛情要乞求，只會做兵。你會長期處於一個下把嘅狀態，唔會開心，女仔，唔係對佢好就得㗎喇。
你從來未試過做兵？
我嘅優點就係，從來都識得 cut loss，同賭錢買股票一樣，輸咪輸咗囉，輸一個月好過輸半年、輸一萬好過輸十萬。
所以你真係輸過？
梗係有！謝霆鋒話佢成功率都係得七成咋嘛！人生本來充滿挫折同艱難，包括溝女都係。
我嘅父幹唔係錢
有冇諗過到咗四十歲，你會咁睇重家庭？
其實係一個兩難嘅取捨。有人問我係唔係想做電影大亨……要做電影大亨，可能就要放棄家庭生活，𠵱家嘅我唔會囉。我努力去做，我深信個天俾我嘅回報一定公平，但係真係冇一個明確目標，咩幾多年去雄霸香港……𠵱家嘅我已經冇咁嘅野心，以前都唔會咁諗，美國（荷里活）都有八大公司啦，咁大嘅市場，點雄霸得晒？唔好開名，有一個朋友，非常之成功，但係同個女關係疏離，佢話佢好後悔……我唔想做最後後悔嗰個人。
大劉個仔教人儲錢買樓，你點睇？
我覺得佢可以試下真係自己去搵份工養自己，兩三年後，佢就有資格講呢番說話喇。下一代唔係想買豪宅，買個三百呎嘅安樂窩啫，都要去到咁變態捱麵包？你話呢個係唔係一個正常社會？俾我係大學生，要儲十五年首期再用三十年供樓……我都同你反面
唔想咁，又冇個有錢老竇，你話啲年輕人可以點？
香港先天優勢已經冇咗，政府有好多嘢做但係唔做，我覺得……只可以諗下移民，去一個公平嘅地方，嗰度唔係香港，香港只會俾一班既得利益者操控住。
當然，無人質疑你嘅能力同魄力，但係你可以起步，算唔算「成功需父幹」？
我從來冇認真討論過呢個問題，今次第一次講，當然蕭生喺我生命中好重要，教識我好多理論、介紹人脈俾我識，但係其實呢一代嘅人知唔知，我哋屋企喺二千年時已經乜都輸晒（ 2000年蕭若元搞「天網」慘遇科網股爆破）。雖然冇爭人錢，但係已經輸到零，本來赤柱八千呎間屋冇咗，一家人要去碧瑤灣一千呎間屋住，係租。我一個人住銅鑼灣，四千幾蚊租舊大廈，靠自己……冇人想像到我可以接受到咁嘅環境。你問我係唔係成功需父幹，我嘅父幹我認，但係唔係錢，係佢俾我嘅智慧同知識。
爸爸教曉咗啲咩，令你一世受用？
佢喺最唔好嘅時候，俾咗兩本書我，一本係《人性的弱點》，一本係黎智英先生寫嘅《事實與偏見》，呢十幾年我做嘢嘅所有理論都嚟自呢兩本書。仲有一本猶太人嘅致富聖經《塔木德》，淨係呢三本書，所有嘅理論都喺度，不過理解容易做就難。最好笑嘅地方，蕭生永遠做唔到。
腦燒聰明我專心
你係話你做得好過爸爸？
一定係！佢書讀得多過我、聰明過我，但係佢因為咁心底高傲，其實係睇唔起人，覺得自己可以孤獨，我交往技能好過佢，我覺得需要喺人哋身上學嘢； EQ啦，自控能力我比佢好好多，係佢教我：唔通隻狗吠，你又陪佢吠咩？但係佢次次都同人嘈、又 block人 account；比如話專心，佢聰明過我，聰明嘅人好難專心，黎智英先生都係㗎，搞下電視台、又搞下免費報紙，嗰啲咪失敗囉！《事實與偏見》講嘅係專心，但寫書嗰個人都失敗
點解喺屋企輸淨零嘅時候俾呢幾本書你？
因為嗰年我廿五、六歲，佢覺得我需要進步。呢個係外界一個更大誤解，其實我三歲父母已經離婚，我係跟阿嬤大，十幾歲佢會帶我出去見世面，到我呢十幾年出嚟做嘢，樣樣嘢都係我自己解決。佢更大作用係對我身教，俾我自己解決問題，有起事上嚟唔會騰。
你爸爸好明顯教仔同教女係兩套方法。
佢等我自己吸收，但對我個妹，係去到縱嘅地步，任何嘢，一扭就會俾。
應唔應該仔同女兩套教法？
我唔會，我個女同就快出世嘅兩個仔，我會公平。公平對父母嚟講最重要，其實佢心裏邊錫我知，但佢講出嚟唔同，簡單嚟講，就係講一套做一套。我個女三歲唔夠，我同佢講嘢當佢乜都明，點解會落雨，佢未夠三歲已經明，我會俾佢自己攞張八達通去買維他奶，我飲酒照俾佢知，但係同佢講要過咗十八歲至可以飲。我唔會乜都唔俾，淨係會灌輸正確觀念俾佢。
你試過家道中落，但你個女未試過，你唔怕縱壞子女？
呢樣好重要，我會俾佢跌俾佢錯，俾佢接觸社會。佢𠵱家咁細，有司機車，我同老婆有共識，去到小學就一定要搭校車，要識坐所有交通工具，我俾咗錢你，你就要識自己返屋企。
唔怕俾人綁票？
邊有得驚？第一，我未有錢到去呢個階段，第二，冇得咁樣驚。喂！真係要綁， 29歲（ Bossini後人 2800萬綁票案）都可以俾人綁
腦燒踩車
這天下午在老小兩個蕭的總部一待就是四小時，其實講真，食完餐晏全體員工都歸晒位，你有你嘅忙碌。到處都見的遊戲設施和健身器材，一直無人掂，直至我離開總算見到有人踩上單車機……嗰個，係老蕭。
有得揀，我都係想由投胎揀起。
|
鍾意就快D Share啦！
|
|
|
