2016年2月25日 星期四

旺角騷亂後 水房擺夜宴 [壹週刊 - 1355] __,M1,

水房睇來好疊水,個個都食到咁大隻嘅。爆壹爆旺角騷亂後 水房擺夜宴年初一旺角騷亂事件後,旺角一帶多咗警員巡邏,不過年初九,爆哥見到有一大班古惑仔又喺太子聯合廣場聚集,隔籬就係旺角差館,唔通又有人打算掟磚?望真啲,原來係水房老叔父「老鬼權」七十歲生日,門生喺聯合廣場幫佢擺酒慶祝,筵開超過六十席。當晚都有幾位黑幫大哥到場,勝和現任坐館「沙田Me」身穿潮牌紅色運動套裝,新正頭著到成個利是封咁,好難認佢唔到 ...


水房睇來好疊水,個個都食到咁大隻嘅。

爆壹爆

旺角騷亂後 水房擺夜宴

年初一旺角騷亂事件後,旺角一帶多咗警員巡邏,不過年初九,爆哥見到有一大班古惑仔又喺太子聯合廣場聚集,隔籬就係旺角差館,唔通又有人打算掟磚?望真啲,原來係水房老叔父「老鬼權」七十歲生日,門生喺聯合廣場幫佢擺酒慶祝,筵開超過六十席。

當晚都有幾位黑幫大哥到場,勝和現任坐館「沙田 Me」身穿潮牌紅色運動套裝,新正頭著到成個利是封咁,好難認佢唔到囉,佢同班古惑佬企喺條街,煲煙兼吹水,有古惑仔講笑都不離時事:「呢度係旺角,小心俾磚頭掟中!」勝和「薯仔」都有到場,反而同一陣線嘅「上海仔」就繼續潛水冇到場,平時佢好鍾意 social㗎喎,現場班古惑仔得閒冇事做就估吓上海仔身在何方,大家都陰陰嘴笑。

講開老鬼權,佢撈外圍馬上位,旗下門生都好猛,包括號令半邊水房嘅紅棍「業仔」同前坐館「大孖」,早前同高佬發互劈到七彩,不過兩個都因為洗黑錢罪而喺獄中坐監,惟有靠幫中兄弟同老鬼權祝壽啦。

掃走瘟神  D7689

爆哥農曆新年鍾意打牌、玩吓「魚蝦蟹」,今年有手下推介一種新 card game叫「 D7689」,個 game以最 hit時事為元素,包括一帶一路、銅鑼灣書店事件、暗角打鑊、等埋發叔,仲有令人反胃嘅政治人物,包括 689、吳克儉班傻佬。

三十六歲的阿耀係 card game設計師,港大主修工程學系,後來到美國完成博士課程,佢話:「我覺得香港荒謬情況日漸加深,沒有最荒謬只有更荒謬,到近期銅鑼灣書店五子失蹤事件,估唔到連香港百年基業嘅香港大學也淪陷了,其實我唔想李國章做主席。」

講多無謂,叫佢解釋玩法:「副牌叫『 D7689』, 689喺遊戲入面係一個瘟神,我哋要想辦法避開 689惡魔,若果抽到佢,玩家便會死。」正所謂一物治一物,有一張王牌「 D7」,即係 D7689,咁就唔使死喎,真係想抽到呢隻牌 D7佢。

爭泊錶位 火爆開拖

因爭車位打架,你話係咪好無聊吖?

早幾日爆哥入屯門搵班村佬拜年順便探吓村姑,去到鹿苑街一個錶位停車場時,就見到兩條麻甩佬為爭錶位泊車大打出手。事緣貨 van男等咗個錶位好耐,後來終於等到人哋走,貨 van男就好心駛開架車,俾人哋容易出車。當錶位架車駛出後,貨 van男準備泊架車入去時,突然一架啱啱駛到嘅私家車衝入去截胡。嘩,當人透明呀,學 689擺明挑你機喎,咁一二三打得啦,兩條友落車嘈嘈吓着晒火,開始你打我一拳,我踢番你一腳。

見慣大場面嘅爆哥,當堂睇到冇晒癮,兩條友得把聲,愈打愈冇力,喺度互相鍊骨咁。最後其他車主都睇唔過眼,走過嚟勸交,將兩人分開先冇事。其實無論邊個啱邊個錯都好,打交就唔係太好。尤其是新正頭,搞到上差館更加唔老黎啦。所以,凡事忍得咪忍讓吓囉,忍唔到要打都認真啲俾啲戲呀大佬。

爆哥乜料

金融界撈家,穿梭黑白政商界,朋友遍布旺角至中環,每星期都八到

唔同料,同《壹》仔讀者過吓癮!


鍾意就快D Share啦!
Related Posts Plugin for WordPress, Blogger...