探熱針
林建岳查數 陳冠希限期還 1500萬
08年爆發淫照事件後，事業由高峰直插谷底的陳冠希，仍得到老闆林建岳不離不棄，當時更墊支 1500萬，為 Edison解決多個廣告賠償及律師費，不過，事隔多年， Edison富貴生活依舊，但欠下老闆的巨債，一直拖得就拖。直至去年，林建岳見 Edison時裝生意做得有聲有色，加上頻密接內地酒吧騷賺錢，仍不斷扮窮拖數，於是下令要 Edison將 CMD（岳少科水 Edison合資開設的公司）收入上報，限期要他清還 1500萬欠債。老細做嘢， Edison係咁意，先還 200萬！
岳少墊支
○四年簽約林建岳紅館經理人公司旗下的陳冠希，○七年更冧掂老闆科水，合作開設 CMD多媒體公司，事業如日方中，電影、廣告、時裝瓣瓣掂，不過，○八年因為維修電腦，自己與女藝人的秘密艷照流出，引爆一場淫照風暴後， Edison事業重挫，要潛居美國避風頭；當時，林建岳更代他墊支了 1500萬，作為廣告客戶損失賠償，和到加拿大出庭的律師費。
「爆發淫照， Edison形象衰晒，班廣告客要求賠償係理所當然，寰亞幫手執拾呢個爛攤子，啲賠償金全部都係岳少墊支出嚟，公司又要幫佢請保鑣，之後佢搬去四季酒店住，去加拿大出庭，啲錢都係公司俾住先！」知情者說。
拖足八年
一轉眼，八年前的淫照風暴已平息，雖然 Edison人氣不再，內地亦未全面解封，但他生財有道，電影、電視劇攞唔到批文，就轉唱夜場搵錢，創辦的潮牌 Clot愈做愈有， Juice時裝店更由上海進駐埋北京，加埋台灣等其他地方，已經有六間店。
「頭兩年 Edison的確近乎零收入，岳少好體諒佢，有乜需要都會幫手，當時合資 CMD公司無乜大動作，好多嘢都可以側側膊，但近呢幾年 Edison成日返內地唱酒吧騷，個個月走七、八個場，每個月收入平均都有幾百萬，好和味！加上時裝生意又穩定番，但佢就好似冇事發生咁，幾年來咪講話還錢，連賺嘅錢亦唔分清分楚。」
會計師查數
雖然身兼旅發局主席、經民聯監事會主席的林建岳，亦忙到根本冇時間理會 Edison，但寰亞是上市公司，要向其他股東交代。
「岳少周身唔得閒，但身邊好多人會同佢報告，呢幾年 Edison收入真係多咗，佢唔交數，寰亞就叫會計師查數， Edison無得再拖，舊年開始被迫向總公司上報收入，終於還咗二百幾萬。」知情者說。
陳冠希有錢拖住唔還，老豆陳澤民同樣有鋪拖數癮，○九年陳澤民因為欠債二千萬而申請破產，但破產後生活仍然富貴，住豪宅揸靚車，出入半島過上等人生活，情況同 Edison一樣，欠人錢，照樣住月租十萬的南灣豪宅。錢，都係自己袋住好！
大後台
有自稱奇拿的人於 08年 1月上載一張陳冠希與鍾欣桐的艷照上網，令「淫照風波」一觸即發，往後被牽連女星愈來愈多，包括張栢芝、陳文媛、顏穎思、楊永晴、陳思慧等，短短兩星期，奇拿一共上載 433張淫照。事件爆出後， Edison形象破產，廣告包括 EPS、 Manhattan信用卡、 Jacob& Co手錶全部被抽，令起用他的廣告商損失慘重，當年 Edison惟有付上千三萬作賠償，平息事件，其後回港交代，為安全理由， Edison出入都有保鑣跟身，加加埋埋使咗近千五萬，全靠有老闆林建岳條大水喉射住， Edison先有本事撐咁耐。
有錢唔還
欠債還錢天公地道，但有人有錢唔還之餘，生活依然富貴，無賴！
鍾鎮濤 章小蕙
96年，鍾鎮濤跟前妻章小蕙向裕泰興財務借錢炒樓，結果欠下 2.5億巨債，裕泰興入稟法庭， 02年，阿 B以無力償還為由申請破產，其間一樣住豪宅，出入有工人司機服侍，至於章小蕙於第一次敗訴被追還款期間，仍豪買七十多萬寶馬，生活冇變。
撰文、攝影、攝錄：娛樂組
|
鍾意就快D Share啦！
|
|
|
