樂壇天后麥當娜首次於香港及澳門舉行演唱會，無論係歌曲、舞蹈、舞台效果都係頂級水準，門票破紀錄咁貴係有理由嘅。
外太空
麥當娜延續傳奇
期待已久，美國天后麥當娜（ Madonna）終於首次登陸香港舉行演唱會！能夠喺樂壇屹立不倒 30年， sell嘅已經唔只係歌曲及舞蹈，大膽破格創新嘅風格先至係令佢成為傳奇嘅重要原因！麥當娜帶着佢嘅第十個世界巡迴「 Rebel Heart Tour」嚟到香港及澳門，各開兩場，除咗有最新歌曲《 Rebel Heart》、《 Iconic》之外，仲有耳熟能詳嘅《 Like a Virgin》、《 Material Girl》，加上世界級嘅舞台製作，等足咁多年都係值得！
寶刀未老
自上年宣布麥當娜會到訪港澳開騷， fans等到頸都長，開騷大日子終於來臨！例牌等兩個鐘先開騷，娜姐排場零舍唔同。演唱會沿用日本場嘅歌單，分為四個部分：「 Joan of Arc/ Samurai」、「 Rockabilly Meets Tokyo」、「 Latin/ Gypsy」及「 Party/ Flapper」，一開場坐住吊籠從天而降唱出《 Iconic》，全場尖叫聲不絕！娜姐今年已經 57歲，依然寶刀未老，又唱又跳足足兩個鐘，體力消耗非常厲害，不過都毫不氣喘，專業精神令人佩服！
娜姐嘅演唱會當然唔少得大膽及挑逗性嘅演出，唱出《 Holy Water》時，娜姐換上黑絲，連同四位修女打扮嘅女 dancer，於十字架上大跳鋼管舞，意識大膽，挑戰禁忌底線，加上以娜姐嘅年紀可以喺鋼管上狂轉，整個演出令觀眾嘆為觀止！今次演唱會以新歌為主，亦有將舊歌重新編曲， fans始終都係對舊歌情有獨鍾，當一響起《 Like a Virgin》，現場一齊大合唱，娜姐仲除去外套大晒不倒胸，令氣氛推向高峰！
製作超班
娜姐嘅演唱會門票開天價，其中一個原因係佢嘅舞台，由大屏幕以至各式機關，全部都係世界頂級之選。每一個部分有一條短片過場，製作非常認真，帶出整個表演主題，唔係為播而播。另外一定要讚係娜姐嘅一班 dancer，水準相當高，跳舞功力唔在講，有一段多位 dancer緊扣於彈性長杆上，不停揈來揈去做出高難度動作，猶如馬戲團，令觀眾拍爛手掌。可以將所有最 top嘅表演集合於一個演唱會，只有娜姐做得到。
香港同澳門演唱會雖然相隔兩日舉行，不過整個舞台布置完全唔一樣，香港場比較大，舞台效果睇得更清楚，可以喺台上搭建旋轉樓梯唱《 Heartbreak City》，澳門觀眾就睇唔到；新濠影滙綜藝館得五千個座位，票價係亞洲最貴，不過都係值得，因為個場好細，觀眾可以更近距離接觸娜姐，比起睇大銀幕或者睇手機，梗係睇真人開心啲！
撰文：關錦雯
|
鍾意就快D Share啦！
|
|
|
