熱爆娛樂: 嫩男友陪天倫樂　鍾麗緹主動做「老細」 [壹週刊

2016年2月25日星期四

嫩男友陪天倫樂　鍾麗緹主動做「老細」 [壹週刊 - 1355] __,鍾麗緹,鍾麗,M1,

情人節翌日， Christy同男友 Shawn加埋兩個女，「一家人」現身中環 shopping。

娛樂偵訊

嫩男友陪天倫樂　鍾麗緹主動做「老細」

經歷兩次婚姻失敗的鍾麗緹，雖然要孭住養育三個女的責任，但她並未因此而放下鬥心，反而積極留住索樣同身材，為第三春做好準備；去年參加內地真人騷《如果愛》，更成功搭上足足細自己十二年的型男張倫碩（ Shawn）。

上週一（二月十五日），鍾麗緹拖住男友仔同兩個囡囡現身中環，買嘢食飯，鍾麗緹自動波俾錢， Shawn就幫手湊女，各司其職！

香港過情人節

單親媽咪有市場！四十五歲鍾麗緹（ Christy）同內地型男張倫碩打得火熱，寧願留守北京瘟仔而放棄接拍荷李活電影，拍拖大過天！

情人節翌日（十五日）傍晚， Christy帶住兩個細女 Jaden及 Cayla現身中環的 Zara時裝店，三母女直上三樓童裝部，原來男友 Shawn（張倫碩）同其親友早已在店內行住等，行多半個鐘後，一行人再轉戰附近的平價化妝店，繼續掃。

女友在化妝店內血拼成粒鐘， Shawn等到放蚊，買到一手戰利品的 Christy離開時即拿着贈品向男友撒嬌。

再戰運動鋪， Shawn就幫女友拎嘢，好有風度。

三催四請

買化妝品扮靚， Christy買到唔願走，男友於是企在門口，照顧兩個老人家同小朋友，中途等得唔耐煩， Shawn幾次走入鋪頭催促，終於捨得俾錢走的 Christy，使錢後心情特別靚，離開店鋪時主動繑實男友氹番，邊行邊開籠雀般。

之後一行人去埋運動鋪，直到兩個女嗌肚餓，一行人去了威靈頓街一間越南餐廳坐低醫肚，其間 Shawn主動夾餸俾 Christy同兩個女，「一家人」相處融洽。

食足一小時，離開餐廳時，二人繼續雞啄唔斷， Christy含春望住男友甜笑，最後一同坐保母車離開。

在越南餐廳醫肚， Shawn主動為大家夾餸， Christy望住男友甜笑。

食飽走，二人雞啄唔斷， Christy成個春樣。

當日無論買嘢定食飯， Christy都主動爭埋單，男友就慣晒雙手插袋。

見男友行得唔耐煩， Christy主動上前繑實呵番。

同居生活

被指年齡、成就、賺錢能力有差距，但卻無損這段姊弟戀關係，早前二人更雙雙在微博宣布，將名字改為鍾麗雅和張浩銘，寫下「我們會長長久久幸幸福福的喔」，兩人戀情升溫，已同居生活多月。

「 Christy雖然離咗兩次婚，但對愛情依然好有憧憬，佢同 Shawn都鍾意做運動，大家有共同興趣，溝通絕對冇問題，更何況 Shawn都卅幾歲，並唔係所謂嘅『小鮮肉』，不過佢哋都冇將啲閒言閒語放喺心上面， Shawn好短時間已經融入女友家人關係，同三個囡囡相處得好好，呢一點， Christy特別珍惜！」知情者說。