30/3
與胡百全所生的次女 Maggie（右）陪媽咪出院後即到灣仔大有商場餐廳醫肚，夏蕙 BB表示佢同 4仔 3女感情都 keep得好好，個個都好似朋友咁。
真面目
BB捱病 爭產 6年 出院頻撲 黃夏蕙影寫真沖喜
由夏蕙姨變 BB的黃夏蕙，上週四（ 27日）突然暈倒急入灣仔律敦治醫院留醫，其間更誤傳死訊，嚇死 fans！經過「全城祝福」，夏蕙 BB於上週六（ 29日）成功扭計出院，週日（ 30日）仲化行妝接受本刊訪問，細數未完心願。
「初時以為自己禽流感，死啦，我仲有心事未了喎！我要攞番我應得嘅嘢（律師男友胡百全遺產）！𠵱家真係要著手搵法援去搞，我仲想攞到啲錢之後開間老人院，等老人家有個安樂嘅地方生活，唔使好似胡百全晚年咁。」夏蕙 BB更宣布即將於書展推出寫真，娛人娛己當沖喜！
從來咩都肯扮嘅夏蕙 BB，上年就以美少女戰士造型受訪，仲即場跳 Gwiyomi。夏蕙 BB話其實自己都有底線，試過有次朋友叫佢扮兔女郎，夏蕙 BB死都唔制，「又要低胸，又要條裙好短，打出個 pat pat，有傷風化嘅我唔做㗎！」《蘋果日報》圖片
年屆 82歲的黃夏蕙（夏蕙 BB），近年多以騎呢造型現身，加上永遠大戲妝，一般 90後只會當夏蕙姨係笑話。「我只係做我想做嘅嘢，我唔介意人哋笑，但我無做啲傷害人嘅事，唔鍾意咪唔好睇囉！」
「攞番我應得啫！」
原於本月 29日開始一連兩晚，夏蕙 BB聯同其他大戲好友於北角新光戲院開騷，但上週四（ 27日）夏蕙 BB在其經理人 Simon家中練習時突然暈倒，即被經理人送往律敦治醫院搶救。
「我一向血壓低，不過我又硬頸，唔去到頂唔順都唔食藥，咁嗰日低得滯咪暈咗囉。其實之前都試過一次，我都知道失救會救唔番，𠵱家知驚喇。」夏蕙 BB被送到醫院，由於之前曾返過大陸兼食過雞，夏蕙 BB一度被誤以為是禽流感，死到臨頭，夏蕙 BB決定的起心肝了埋件心事。
「人（前「男友」胡百全）都死咗咁耐，份遺囑一路都唔肯公開，咁點啫？啲錢係 hold起咗嘅，佢哋（胡的家人）用唔到，但就係唔俾我攞。我只係想攞番我應得啫！今次病完我真係要搵法援著手處理。好在我啲仔女都好乖，唔會過問、唔會迫我。」
曾經係胡百全二奶，跟對方生下 4仔 3女，可惜由 04年胡百全病倒住院開始，便被其長女申請禁制令，不讓夏蕙 BB探望，直至 08年 4月胡百全因病離世，黃夏蕙亦未能送男友最後一程。翌年黃夏蕙稱胡百全於 80年 9月立下契約，答應於其家族基金內，屬於胡百全的部分會分成 5份，其中 4份會連利息分給夏蕙 BB及其仔女，但遺產至今仍未到她手。現與老公潘炳烈租住沙頭角村屋的夏蕙 BB，生活簡樸，出入多以火車代步，八達通傍身。
「泳衣上面畫三點！」
雖然夏蕙 BB仍有心結未了，但她一樣遊戲人間， 82歲的她更將於今年書展推出個人自傳寫真。「本來上年已經想出，但係實在太忙無時間，今年應該可以。等我休養番好身體就開始搞，書展都預咗位畀我。書入面除咗會有我扮番其他𡃁模嘅 pose之外，我仲會寫番由我出世，喺廣州讀書時點樣坎坷，到之後初戀遇上胡百全同潘生（現任老公潘炳烈）等等。」
既然出寫真，三點式點會少得？「哈哈哈！會，喺泳衣上面畫三點我有自知之明，咁搞法嚇死人咩？我都係行搞笑路線，寫真呢啲插圖嚟啫，笑嚇咪算囉！本書我都唔係要嚟賺錢，到時我會將收益捐出去做慈善。」
即使已經 82歲，但出院翌日即接受訪問的夏蕙 BB仍然十分精靈，識講笑，仲話自己入院前「晚晚淩晨 3、 4點先返屋企」。爭產呢啲擺埋一邊先
原來是美人
1933年出世的夏蕙 BB，原名黃蕙蓮，畢業於港島區女子名校庇理羅士女子中學，戰後曾在粵劇團及粵語電影演出， 51年搭上富商胡百全後漸漸息影，其間為胡百全生下 7名仔女； 82年才嫁給賽車手潘炳烈。
認識唔少圈中人的夏蕙 BB因經常出席藝人喪禮故被取笑係「殯儀之星」， 02年開始，夏蕙 BB多次以騎呢造形，於農曆新年與市民爭上「頭炷香」。其實後生時期的夏蕙 BB靚過𠵱家好多女星。
|
鍾意就快D Share啦！
|
|
|
