2014年4月2日 星期三

[FACE 358] 配唔起 嫌綠葉王未夠班 胡杏兒藐爆 Bosco兄弟幫 Bosco,胡杏兒,黃宗澤,MF,




胡杏兒喺《陪》劇內飾演盲人,亦係張穎康同居女友。張穎康首日開工即同視後有對手戲,視後一埋位就出囧樣,反而張穎康要嚟幾個 take,導演先收貨!

真面目

配唔起 嫌綠葉王未夠班 胡杏兒藐爆 Bosco兄弟幫

當年以「劉德華契仔」身份入行嘅張穎康,喺 TVB捱足 12年,由茄喱啡做到最近幾套電視劇開始佔戲重,上年更於《貓屎媽媽》一劇成功埋到黃宗澤堆,跟一線小生做兄弟幫。

張穎康最近更頂替劇接劇冇期拍的王浩信,於新劇《陪著你走》榮升男二兼有 10集戲,對手仲係 Bosco舊愛胡杏兒。據知杏兒嫌張穎康未夠班上大枱;加上張係前男友老死,更加激起視後把火。

上週五( 28日)本刊直擊張穎康同胡杏兒開工,張更因頻食螺絲激到杏兒黑面唔睬,得罪視後真係好難有運行。

32歲張穎康於 02年出道, 06年加入無綫,初時多參演冇對白的茄喱啡角色。由於肯捱肯搏一直深受唔少監製賞識,戲分亦開始愈來愈多,之前有份主演的兩套劇《師父.明白了》和《貓屎媽媽》更同期播出,曝光率急升。

每拍完 1個鏡頭,導演都要同張穎康傾偈,悶到杏兒不停放蚊。

張穎康喺《貓屎媽媽》搶鏡,仲因此劇同 Bosco玩埋,難怪杏兒會唔鍾意佢!

榮升男二

捱了 12年終於出頭,本週播映的《愛我請留言》張穎康雖然只係配角,但表現深得監製陳耀全賞識,再獲欽點於新劇《陪著你走》榮升「男二」,演杏兒前男友,戲分更有 10集,取代忙拍《再戰明天》的王浩信,可惜有人仍嫌張穎康未夠呢上大枱。知情者說:「杏兒聽到個角色臨時變咗張穎康,即時藐咗下,仲問王浩信度唔到期咩?不過監製力撐,杏兒都冇再出聲。」

上週五《陪》劇喺大坑東運動場取景,當日杏兒同張穎康有對手戲。由於首次孭重飛,張穎康表現緊張,除咗頻頻食螺絲亦頻頻「 NG」,每拍完一個鏡頭都被導演叫停傾偈。原本一場簡單的兩頁紙戲,足足遲咗成個鐘先收工,令胡視後黑曬面,之後視後唔抵得,出手教張穎康做戲,場面都幾僵。張穎康回應本刊時直認自己當時好緊張:「嗰日第一日開工係好緊張,真係 NG咗好多次!(杏兒嫌你唔夠班喎?)講真!我係未夠班嘛!不過杏兒對我好好,仲叫我唔好緊張!我會做好啲!」態度積極,遲早實夠班嘅!

張穎康喺《陪》劇做男二,全靠監製陳耀全撐上位,當日監製亦有喺現場監督住張穎康首日表現。

《陪著你走》劇情講杏兒因一次交通意外失明,陳豪做領跑員,後期成為佢男友,之後仲跑馬拉松。

《蘋果日報》圖片

王浩信 冇期接

據知《陪》劇飾演杏兒前男友一角,原先想搵王浩信,可惜王浩信要開另一套劇冇期;而上週五( 28日)王浩信就喺旺角同何超趕拍《再戰明天》對手戲。

杏兒同王浩信喺《野蠻奶奶大戰戈師奶》合作過,加上對方近年穩佔男二,上年又攞埋「飛躍進步男藝員」,杏兒當然想對方喺新劇做其拍檔。

胡定欣同杏兒超 friend,早前更一齊去韓國旅行。有傳拍《貓屎媽媽》時,胡定欣就同 Bosco冇偈傾,力撐好姊妹杏兒。

劉華契仔捱出頭

張穎康 22歲由劉華帶入行,可惜一直發展平平, 06年加入 TVB捱騾仔,其間仲娶埋《東張西望》主持、港姐麥雅緻做老婆,現已懷孕 8個月。雖然張穎康事業發展唔太順利,但人緣就不俗,圈中好友有馬國明、黃宗澤同鄭俊弘等。由 12年的《回到三國》開始,戲分愈來愈多,喺上年的《貓屎媽媽》飾演前黑幫老大兼咖啡店烘焙師「發瘟哥」演出搶鏡,今年正式升呢於《陪著你走》做「男二」。

《師父.明白了》

《貓屎媽媽》

當年由劉華帶入行,可惜喺電影圈發展唔理想,完約後劉華就引薦佢入無綫。

《蘋果日報》圖片



鍾意就快D Share啦!
Related Posts Plugin for WordPress, Blogger...