掃呢頁CODE去手機

2014年4月2日 星期三

[FACE 358] 未發育  MKPOP鬥 肌模捧奀瘦 FAITH MF,




真面目

未發育  MK-POP鬥 肌模捧奀瘦 FAITH

MK-Pop忽然爆 hit,繼男子組合天堂鳥之後,再有 3人未成年組合 FAITH,同樣黑眼線妖味濃, 3位成員身高 5呎多少少,骨瘦如柴似未完全發育,比起平均身高 6呎的天堂鳥十足饑荒兒童。

一手捧「紅」 FAITH的經理人 Percy Wong,據知往台灣發展多年,曾任模特兒, facebook內有大量騷肌猛男照,回港一心踏足娛樂事業,雖然製作水準業餘,但頭炮 FAITH成為 MK-Pop代表,算踏出育成第一步



其他影片: >>處男唱 live










胳肋底未生毛

FAITH身材矮小又奀又瘦,跳舞唔夠力水,隊長 Hiuyong說:「我哋有好大嘅進步空間,過幾年同天堂鳥撼過。」

香港樂壇再現火花,近日 MK-Pop「寒流」湧現,聞者心寒!妖男組有天堂鳥,幼齒組代表則有 3人組合 FAITH,成員最細 Sky得 14歲仲讀緊中三,身形最奀瘦,約 155cm,隊長 Hiuyong頭大大亦顯得骨瘦如柴, 17歲的 Wave身形叫最標準,但也不過 166cm!著雞翼袖,連胳肋底毛都冇。

朋友

〈 Stop Peeping〉 MV低成本製作,服裝、布景簡陋,化妝就用無名化妝師幫手,連飾演粉絲和女主角的都是 FAITH成員的朋友,拍膊頭演出。

一萬個 dislike? so what?(真實對白)

經理人 Percy曾在台灣紮根做生意,又拍了不少 model照,肌男程度遠遠超越旗下的 FAITH。對於市民狂踩, Percy說:「只係香港好多人聽韓國歌,我想呢班聽眾知道香港都做到呢種格啫。」

嫌瘦壓唔到場

同期出 MV的騎呢組合還有來自廣州的 2人男子組合拾音社,其 MV〈 kiss kiss kiss〉同樣舞步騎呢、成本低,只在一間屋內拍攝。

FAITH週日( 30日)在尖東星光大道開小型音樂會見歌迷,一首 30萬點擊但 dislike過萬的〈 Stop Peeping〉梗係要現場唱,難得 FAITH堅持唱 live唔咪嘴勇氣可嘉,國語屎、走音、甩 beat、入錯 key就難免,幸好舞步比 MV跳得齊,現場半百 fans睇得投入更識得一齊唱, MK-Pop抬頭咁款! FAITH首次開騷,經理人 Percy(黃振忠)當然要全程睇實,其實 Percy於前年成立製作公司 Wode Creative,之前一直在台灣生活,做過兼職模特兒, facebook內有多張型男照及騷肌照,大隻又有型過 FAITH三子。

另據知,原本 Percy只想捧 Hiuyong一個,但嫌他太瘦削壓唔到場,才加入其他成員。當日騷後隊長 Hiuyong就回應:「 Percy一路係想我單飛出嚟做歌手嘅,但覺得𠵱家市場好少呢類組合喎,所以就搵多兩個人。」原來 Percy是 Hiuyong的歌唱老師, 2人認識已 6年;眼見韓流襲港, Hiuyong又單眼皮, Percy於是找來有跳舞經驗而又剛巧是單眼皮的 Wave和 Sky合組 FAITH,兼且跟足韓風拍跳舞 MV,但沒料到 MV一出即被彈到飛起。

正宗 MK仔

要捧人但 Percy卻自爆因慳錢出事:「其實我搵咗個新晉導演至搞出咁嘅事,起用新人可以慳啲啦,導演係喺宣明會微電影比賽攞過亞軍,可能跳舞 MV佢未有經驗去處理啦,剪咗好多次至出到街。」

負評不斷又被叫 MK仔,隊長 Hiuyong曾匿埋屋企流淚,諗過退出算數:「係有喊過,想退出㗎!不過屋企人安慰我,叫我唔好理啲人講乜。我住旺角,係正宗 MK仔;見到今日咁多 fans嚟到都有番信心」佢哋更話會繼續 MK-Pop,保證下首會係廣東歌,真係好等睇!

紙板身 Sky

年紀最輕的 Sky仍在何文田胡兆熾中學讀中三,身高 155cm兼超瘦削 A字膊身形,隨時唔夠 100磅。

化韓妝

Sky學習跳舞及經常在學校表演及比賽;平時也喜歡韓式打扮,畫深眼線出街是平常事。

Hiuyong

隊長 Hiuyong是半工讀學生,曾經在 Häagen-Dazs雪糕公司工作,現早上在設計公司任職文員,下午是香港設計學院高級文憑生,晚上則排舞練唱歌,好辛苦喎!

跳舞柔弱

週日( 30日) FAITH在星光大道首次現場騷,有近半百 fans捧場,大部分 16歲以下,邊睇邊跟住唱非常投入,不過 FAITH 3子唔夠體力,到後段愈跳愈 hea!

6呎天堂鳥外國回流

MK-Pop仲有隊天堂鳥,個個身高超過 6呎,其中 Lincoln和 Tyrese是籃球健將, Tyrese曾經在美國西雅圖讀書,隊長 Gordon在新西蘭大專畢業, 3個平時聽開歐美流行曲,較少聽 K-pop,走韓風都只不過試嚇水溫。

FAITH則愛聽韓語歌,隊長 Hiuyong喜歡 B.A.P,年紀最細的 Sky是 BIGBANG粉絲,韓風啱曬!

天堂鳥會員 6呎以上,擺起型格 pose影相都似模似樣。

天堂鳥平時造型亦超浮跨,雖自稱少聽 K-pop,但 MV擺明抄韓風,則被網友狂踩,聲言下次將考慮轉形象。

MK-Pop元祖 Tommy:點會留意唔到!

打不死的前 E-Kids成員 Tommy,原來都有留意近期的 MK-Pop,他笑嘻嘻地說:「咁 hit點會留意唔到呀!咩天堂鳥咩 FAITH嘛,幾得意吖,又唔好話騎呢,形象特別啲啫,我都想去睇嚇佢哋現場表演呀!」如果合唱會唔會變 MK-P-Kids呢?



鍾意就快D Share啦!