傾續約遭不禮貌對待 楊洛婷撇無綫
近期楊思琦、高鈞賢和石天欣相繼離巢，原來現年33歲的03年度港姐亞軍楊洛婷，上月約滿無綫後亦不獲續約。據悉，楊洛婷一直未接獲續約通知，於是約滿後主動致電藝員部主管級要員了解，豈料受到對方不禮貌對待說：「咪完咗囉！」有指楊洛婷有感不受尊重，一度向友人哭訴。
■楊洛婷上月約滿無綫後不續約，但她昨日聲稱是「和平分手」。資料圖片
曾公開表示忠心
事實上，今年6月楊洛婷與已離開無綫的李思欣主持新城節目時，還向記者表示不會效法李思欣離巢，揚言跟無綫有情意結，自己主持明珠台的《講生活．講享受》（Dolce Vita）已經8年，節目可算是她一手湊大，不介意做導師幫手培育新主持，可惜到頭來卻遭無綫一腳踢走。
記者昨致電楊洛婷了解，對於不獲無綫續約及受不禮貌對待而喊爆，楊洛婷笑說：「又冇講到咁誇張，其實個約完咗，唔係淨係話佢單方面唔簽我，都係雙方面嘅，咁多年我都係做緊《Dolce Vita》，都想有多啲新嘗試。又唔係唔受尊重，話個約完咗啦，我節目冇得做啦咁囉！」
■楊洛婷（左）奪得03年港姐亞軍，繼季軍戚黛黛（右）和冠軍曹敏莉（中）後離開無綫。
「係時候分手」
問到楊洛婷會否不開心，她說：「又冇唔開心，我喺TVB學到嘅嘢同攞番嚟嘅嘢，都係多過我預期。我自己本身出邊嘢都好忙，又做電台同MC，呢個節目都做得好耐，係時候分手。我一直都唔係簽經理人合約，係基本藝員合約。」提到高鈞賢不開心而離巢，楊洛婷謂：「佢講到好陰功咁，我又冇所謂，我從來冇做過主角，冇擔任過啲乜嘢角色，一直以嚟都係做旅遊特輯、飲食節目，同明珠台節目，對我嚟講冇乜大影響，始終我出邊做嘅活動好忙，咁所以個約完咗咪完咗囉。」
採訪：魯吉
■高鈞賢日前因不滿發展未如理想而離開無綫。
|
鍾意就快D Share啦！
|
|
|