真人騷
簽大台似落注 高鈞賢：連輸九年仲唔走咩？
從首屆香港先生冠軍做到變御用斯文敗類，從 21歲做到 30歲，高鈞賢說他離開大台的消息一傳開，收到的電話和訊息清一色是恭賀，其次就是傳媒想誘導他數臭前東家的，都被他一口拒絕。而訪問全程，他也的確是出盡氣力念大台的好：「去到最後，余詠珊好出力挽留我，真係好動搖，不過人事部打俾我，叫我喺兩個鐘之內簽名。」得兩個鐘決定？我覺得似威脅多過似挽留。
「其實機會唔係冇，舊年本來可以去北極跑步，但撞咗要剃頭開《食為奴》，經理人勸我唔好推，一推會得罪好多人。」
有劇你拍仲唔當啲監製神咁拜，你個二打六學人推劇，係唔係唔想撈？
「諗諗下我形象太乖、缺乏特點，可能佢哋特登俾多啲咸濕佬、呃女人錢嘅角色我做，都係想我個性鮮明啲，都係為咗我好。」
一片苦心咁都俾你睇得穿，咁好又點解要走呢？
「有人話，做娛樂圈就似喺賭場賭錢，臨約滿時我不停諗呢句說話，九年喇，我不停落注不停咁輸，輸淨唔係好多咋，係唔係應該要出去行個圈換個場再落注呢？」
係囉，呢句講得至有道理，打麻雀食極唔出都識去個廁所轉個運，賭足九年輸足九年，難道還要貪個輸家位坐得耐有感情，傻的嗎？
大台係……女朋友
無綫同我，其實有啲似拍拖，總係 Timing錯咗，搞到最後段關係唔 work。
點解咁講呢？
我入行第二年，就被派去演《幕後大老爺》，但係我根本唔識做戲，根本唔知咩叫古裝，經過呢次，好正常，仲邊有監製夠膽俾機會我？跟住就係前幾個月就嚟滿約，余詠珊親自留我，我當下非常之動搖。但係人事部打俾我叫我喺兩個鐘頭之內決定……我已經花咗九年時間喺呢度，未來叫我喺兩個鐘頭內決定，咁輕率，我覺得過唔到自己嗰關。
余詠珊點留你？
佢叫我唔好走，佢話我等咗咁多年就係等呢一下，佢甚至話如果一年唔得，出年入返呢間 office搵返佢……嗰下聽到一定會動搖。但係好可惜，事後有日我想搵佢，佢又咁啱唔喺 office，所以我話似拍拖，大家 timing唔啱。
點解你會信余詠珊？
我好信佢，因為好多機會都真係因為佢得到，係佢搵我去北極跑步、係佢派我去巴西做世界杯。雖然北極最終因為要開劇去唔到，但係去巴西，真係我入呢四年過得最開心最有希望嘅一個月。
點解去巴西係四年來最開心嘅一個月？
因為我最近四年角色都唔多，每套劇得一兩集，甚至係得幾場，呢場拍完換個場，已經係唔同導演唔同班底。喺巴西，我四年嚟第一次可以同同一班人磨合、 build up感情，四年嚟第一次覺得自己係一個團體嘅一份子。所以我話要多謝余詠珊，我都話走囉，呢個機會佢大可以俾第二個。就算係約滿最後一日，都係佢親自打嚟，話未試過擺咁多心機留一個人，話出邊遇到咩事， TVB嘅大門隨時為我打開。喺呢度，俾個機會我多謝佢……我係諗唔通，點解到最後一年至做呢個動作。
係囉，點解呢？
唔怪得佢，我都有做生意，我一個細細間嘅鋪頭仔，人事關係處理上嚟都好複雜，無綫咁大間公司，佢哋咁嘅位，又的確好難下下同我哋面對面嘅。
大台係……我阿媽
下一步計劃是甚麼？
同一間內地經理人公司傾咗七八成，做埋手頭上嘅嘢，就會飛去北京住一段時間。上面機會多，但係地方更大人更多，決定咗上去，我就要成個人投入先至可以融入當地文化，得到更多機會。
屈就九年，怕不怕一旦重新開始，雄心壯志期望過高？
咁又唔會，我唔再係 21歲，唔再係嗰個啱啱選完港男嘅𡃁仔。人人話無綫似少林寺，我覺得呢句話係真，呢九年我真係咩都做過、咩都試過，我出去，係抱住學習嘅心態，最想搵個真正瞭解我嘅經理人，陪我一齊經歷高低。
高大靚仔，一出道就係香港先生冠軍，你無諗過九年後自己係咁呢？
真係冇諗過，當年一返香港就攞香港先生冠軍、一出嚟就有二百幾個 fans幫我搞活動、全香港人都知我叫高鈞賢，真係覺得乜都唔使驚。入行前做 model，我仲記得當年攞份無綫合約俾個 model同行睇，有銜頭、有底薪、一簽就八年，佢不知幾羨慕：「你就好啦……」結果呢？九年之後，嗰個朋友轉咗行、結咗婚、生咗三個女，人哋一早已經撈得好掂……
其實你有冇照下鏡，問下自己係唔係真係有咸濕佬、呃女人錢氣質？
冇喎……我有諗過呢個問題，可能係我形象一直太乖，冇乜新聞又冇乜個性，公司都係特登俾我賞試呢啲角色，等我性格鮮明啲啫……
原來無綫用心良苦，你咁都睇得出？
我覺得無綫似係我親生阿媽，係佢生我出嚟、養到我咁大、又幫我實現夢想，但係佢親生仔女實在太多，我要等佢再留意我、再寵愛我，真係要花好多時間。
大台係……老虎機
聽講你曾經患上情緒病？
係，四年前。當時工作唔如意，八成角色都係嗰啲（斯文敗類），又俾公司凍薪。我唔開心，又要死撐唔俾人知，於是出盡力去打籃球尋求嗰一下掌聲同快感，點知仲要打跛腳，搞到半年無工開、騷錢唔夠倒爭返公司三萬蚊。
最低潮時期你銀行淨返五萬蚊，其實都唔算好窮。
唔係窮到燶，但冇工開又要供車供樓供保險壓力好大。人哋以為我好掂，但係我實質掂唔掂，阿媽一眼已經睇穿。我仲記得當時瞓喺醫院張床，阿爸阿媽話叫我攞個銀行簿仔出嚟想幫我，真係喊咗出嚟……我十五歲就開始打工，十八歲自己買車，連大學都係自己供自己讀，冇諗過倒咗廿六、七歲反而幫唔補唔到屋企，掉轉頭靠父母。
病情最後能靠吃藥看醫生解決嗎？
我睇咗一次醫生咋，每個月覆診貴，每次攞藥成千蚊仲貴，結果都係唔敢再睇醫生，決定靠自己解決。其實香港人邊個無壓力，啲朋友個個月搵十萬一樣覺得壓力大、唔夠使。又係咁啱，就喺最低潮時，朋友開車房預埋我一小份，開鋪頭賣衫又預咗我一小份。有人話過，做娛樂圈就好似賭錢落注。都咁多年囉，我不停落注不停輸錢，都係時候要學下分散投資。喺同一個地方落咗九年注都仲係未有回報，喂，我啲本錢就嚟無晒，係唔係應該要出去行個圈呢？
而家車房同賣衫生意做成點？
幾好，有啲錢搵。賣衫本來賣女裝，嚟緊我哋想設計埋男裝，我自己做 model，慳返個錢請 model仲可以代埋言。車房兩間分店都唔錯，年頭就係因為車房有錢分，我買到自己第一架二手波子。
所以你其實應該多謝無綫，唔係佢投閒致散，你又邊有時間搞副業？
你咁講都啱。所以好多人話我喺無綫浪費九年青春，我唔同意。青春本來就係攞嚟浪費，唔浪費又邊有得成長？人生就係咁，每一步都會賺到經驗賺到經歷，有危自然會有機。電視台入面好多人想走，但係又驚呢樣驚嗰樣，怕未知唔敢走，我喺加拿大參加 Sunshine Boy選舉係第一屆，返香港參加港男又係第一屆，我覺得我有 guts，你唔敢，就等我行第一步去做第一個。
|
鍾意就快D Share啦！
|
|
|