全知言
6定 6+ iPhone買唔買？
上週五（ 12日） iPhone 6開賣，相信大家都見識過，成班朋友、同事下晝 3點個個都狂㩒 F5或者狂㩒手機 Apple Store app，新 iPhone瘋癲全城。
有人話新機冇新意、得個貴字，不過依然抄得勁。除咗一眾「果農」外，連一眾星都想做果粉。心悠 BB最想有部 6 Plus，仲話最想 iPhone可以幫手開門，唔使帶鎖匙出街。估唔到一班女神都咁「 phone」癲。
劉心悠：開埋門就最好
兩部機對我嚟講都好吸引，但如果要買一部，當然揀 6 Plus，因為有「 Plus」嘛。今次最吸引我嘅係用電量，可以用得長時間。如果以後對手機講開門佢就開門，就咁返到屋企，唔使帶鎖匙就最好喇。
莊思敏：最想有得換電
已經出盡力搜羅，諗計攞第一批機。我覺得金色同太空灰色都好靚，會考慮金色嘅 6 Plus和同太空灰嘅 6。 iPhone最吸引我係 user freindly， Android機對我來講有點複雜。總之 iPhone出新機會不斷買，但 iPhone最想有嘅 function就係可以換電，唔想成日要帶住叉電綫，插蘇、尿袋出街，有得換電就最好。
陳嘉桓：眨眼影靚相
睇完發布會對 iPhone 6熱情冇以前咁大，我想等朋友買咗，再摸吓實物感受吓先。我覺得 iPhone原先 size係最好，但𠵱家對女仔嚟講好難揸，今次絕對唔係早買早享受。我會買金色 64GB， 128GB對我來說太多了。我想佢有眨眼影相嘅功能。
王敏奕：想 check埋心跳
我會等我部電話進一步損壞先啦，潮流呢啲追唔晒嘅。我每次都係等新款出咗，舊款機就平喇，對我嚟講用到就得，咩色都冇所謂，因為我會將電話貼滿粉紅色貼紙。我最想 iPhone有 check心跳功能，因為做運動時知道心跳好有幫助，有埋呢個功能就正。
港女愛細 size
未有 iPhone 6前，個個都嫌 iPhone嘅 mon太細，但𠵱家 iPhone 6出咗大 mon，同其他手機睇齊，點知就有唔少人話佢太大，尤其係女仔。當然女仔最緊張係影相功能，同埋想部手機顏色 sharp啲，講到尾都係要靚。
|
鍾意就快D Share啦！
|
|
|