【好fd呀好fd呀】樂易玲話同余詠珊好好傾 笑nowTV何麗全：佢點敢搵我？
2015-01-21 17:57:00
前年底，無綫高層兩大阿姐樂易玲同余詠珊仲鬥得難分難解之際(依家都市傳說中嘅派系鬥爭已變成珍姐曾勵珍同余詠珊之爭)，當時仲係無綫音樂總監兼樂小姐愛將嘅鄧智偉，突然同四位助手齊齊劈炮。當時有傳話係因為有人不滿珊姐隻手遮天，之後更加是非滿天飛。
原來呢，鄧智偉係同莊冬昕(即係「食軟雪糕雪糕雪糕」嗰個)合資開娛樂公司，今日喺中環開幕，六嬸方逸華、樂易玲同林峯都有出席。正所謂時移世易，之前同余詠珊惡鬥嘅樂易玲，已經被迫退下火線，最近更有報道話佢會帶埋胡杏兒同楊怡過檔nowTV (新聞連結: http://bit.ly/1ypYXeO )。今日問番樂小姐，佢話:「我都講咗三年幾，我都解釋過，唔再回應喇。使乜解釋啫？」
報道就話樂小姐會喺年中過檔，咁既然樂小姐否認，換言之即係2015年全年都會留喺無綫？佢就話:「唔返TVB去邊？」對於報道仲話佢會帶埋杏兒楊怡吳卓羲等過檔，樂小姐連聲否認:「唔係，冇咁嘅事。都有同事俾本周刊我睇，總之今次張相OK就算喇。」咁nowTV高層兼舊同事何麗全有冇斟你過檔？樂小姐都係呢句:「一定冇，何生點會呀？點敢呀？」
咁究竟家陣樂小姐喺無綫做得開唔開心呢？佢就話:「好呀，好呀。公司有好多新嘅發展新嘅方向，對台前幕後都係好事。」又話:「工作嚟講，最緊要係對一間公司嘅老闆信任，同事間相處融洽，同埋有得發展囉。依家都做到自己想做嘅嘢，我冇必要去換做嘢嘅環境。」
咁，直入再問多句，0依家同大權在握嘅余詠珊相處成點呢？樂小姐話:「珊姐係個性格率直嘅人，好會講，唔好亦都會講，我覺得我哋相處冇問題，乜嘢都會溝通，好似買衫呀咁。」可覺無綫頒獎禮家陣偏心晒去同珊姐關係密切嘅星夢幫同黃翠如？樂小姐表示:「做得好就應該攞獎，我覺得公司好公平嘅，唔覺得偏心。同埋我哋係公投㗎嘛！」
樂易玲表示同余詠珊好好傾（攝影：陳順禎）
樂小姐與方逸華（左）合照。
劉家豪夫婦
Bob
呢張舊照，不解釋。
|
鍾意就快D Share啦！
|
|
|
