2015年1月21日 星期三

[FACE - 400 - 專訪] 62歲 4度離婚 老頑童夏韶聲:同前妻拍拖四日就結婚! 夏韶聲,MF,




真人騷

62歲 4度離婚 老頑童夏韶聲:同前妻拍拖四日就結婚!

資料顯示,夏韶聲生於 52年 12月,剛過 62歲。

一講到年紀,他就扮傻:「邊個 60歲?我唔係 60歲!點解一個人幾多歲咁重要?」

換着第二個,年齡的確不重要,不過呢個係夏韶聲: 50歲之前他是香港搖滾教父; 50歲打後在電台、電視講 UFO、陰謀論引人入勝,突然打入年輕市場,成為講故佬、 UFO專家; 60歲人,失驚無神出了本以 UFO為主題的熱賣漫畫《天眼》,畫功一鳴驚人;今個月,發燒碟新作《諳 V》推出前,又驚爆第四度離婚,放棄有錢前妻同萬呎 dream house,回流返港住幾百呎村屋……

比起年輕幾輩的人還衝動、還激情,怎能不提醒讀者,這位跟前妻拍拖四日就結婚的老頑童,今年已經 62?

我啲歌老中青都啱!

剛過 62歲?

我個女成日提我,嗲哋你 62咋,因為以前啲人興幫個仔報大數……點解歲數咁緊要?點解真名咁緊要?講音樂就要喇,因為音樂係我職業,如果我音樂做得唔好,都唔會生存到今日,俾我講到咩 UFO講到離婚、係音樂令我企喺度。 60歲?邊個 60歲?我嘅心態仲同三十年前一樣。

所以你結婚、離婚、沉迷 UFO,做音樂都係當自己三十歲一樣?

有時瞓喺張床度,會諗嘅:係喎,我去到六字頭喇喎……但係我一起身,一擘大眼,就停唔到去做嘢,係咁做……我啲朋友都同我講,叫我唔好行咁快,行得快會死得快,我冇研究過係唔係真。你哋講我幾多歲,我都唔覺我幾多歲,我唔係我老竇。

你老竇係點?

我移民去美國後都好少同佢講嘢,直到佢過身。以前唱〈空櫈〉冇乜感覺,𠵱家我唱就真係有啲心嗡。我老竇係木匠,佢同我生嘅一個樣,把聲又一模一樣,我就真係唔知佢做咩唔去唱歌。

《諳 V》點解揀咗唱〈味道〉?係因為懷念前任?

點解你要問我〈味道〉?我係唯一一隻歌唔講俾人知點解唱。如果我講俾人聽我唱呢首係因為掛住以前嗰啲,咁新嚟嘅女人會同我嗌交㗎喇!

乜你咁快已經有新女人喇?

未有,不過可能嚟緊你唔知呢?女人好鍾意妒忌,就算係同我發生過夫妻關係都會詐型。所有感情開始都一樣,開始嘅時候甜過朱古力,再食埋落去,就好似洋䓤咁越搣越流眼淚,味道對我嚟講,就係呢層意思。我出第一隻《諳》已經 17年前,嗰陣時好多人都未出世,我今次揀歌唔係質啲舊歌俾後生聽,係想老中青都鍾意。陳慧嫻後生喇啩?陳慧嫻唔後生,辛曉琪後生喇啩?

辛曉琪都 52歲喇!

唉,我喺呢個圈,我唔可以咁講。成日喺街見到啲人,一嚟就同我講,你覺唔覺呀?𠵱家啲歌點聽啫, 18歲至 26歲都咁同我講,好似你哋以前啲歌好聽啲喎……掉轉頭,我哋 80年代都有歌唔好聽㗎,好似我都同死鬼羅文講過,〈激光中〉唔啱佢唱㗎!

現今樂壇你點睇?

我強項就係音樂,我敢話我夏韶聲對音樂嘅睇法最尖銳,見過嘅高手最多。除咗包以正(香港爵士樂結他手),我係香港唯一出去夾 band嘅人。比較俗啲嘅講法,啲人話,喂細路,你見過大蛇痾尿未呀?大蛇見過,你有冇見過一堆大蛇呀?就知道震憾喺邊。出去同外國人夾 band,冇番咁上下點去?我唔知𠵱家啲歌手三十年之後仲可唔可以企喺度,但係我知我做音樂好似賣橙一樣,一係唔賣,一賣榨出嚟就包甜多汁。我唔嘩眾取寵、出咁多隻《諳》都唔做宣傳,曾經有一隻仲要係 fans夾錢幫我出咗個細細格嘅廣告……𠵱家唔係買花讚花香,係啲花香但係離得太遠啲人聞唔到香,要推埋少少俾人聞。

講到妒忌,你做咗啲乜搞到身邊女人妒忌?

呷醋每個女人都有,我過去呢段婚姻,佢覺得我身邊每個女人都有問題,包括我阿媽。佢錫我,就唔想第二個人又錫我。實情我阿媽都老、未死前人又喺三藩市,講句你有冇煲乜煲物,老婆都會嬲。好似啲粵語殘片都做得多,婆媳中間夾住個仔,呢啲呷醋,個男人幸福時梗係享受啦,但反則,就係心理壓力。就算我經理人,佢(前妻)都會驚我哋有路……其實我都好長情,上一個八年,第三任十八年,第一任都十年啦,係第二個短啲,得年幾兩年。咁都睇到我唔係詐詐諦諦,話結就結

同前任拍拖四日就結婚。

咁點解離咗咁多次婚,你都仲敢再結?

講最近呢一次,佢話佢好想做我老婆,話要坐呢個位,我係男人,佢係女人,我冇所謂,咪娶你囉。都幾快,個過程。

有幾快?

四日,佢同我一齊四日就話想嫁俾我。所以正式嚟講,係結咗婚後至開始拍拖,至發現嘴型唔啱。最簡單,我係音樂人,我聽嘅歌、我彈嘅歌,佢唔啱聽。興趣唔啱,就會嘈吵,意見不合,就係自掘墳墓,個墳墓仲要係肉酸嘅。諗落都衝動嘅,佢都係一個好靚嘅女人,見到靚嘢,邊個唔想買啫?

下次遇到人,仲結唔結?

結!啱就結㗎但係搵唔到,我都覺得一個人好開心,我 19歲就俾女人綁住,都未自由過。

得唔得呀一個人?你過去四十年都未試過!

得!但係四十年都未靜過都係真,因為啲女人係咁出現,自然會出現。即係咁,我𠵱家風頭火勢唔係好敢講前度,佢已經打嚟詐型,好暴燥嘅詐型。佢 24小時都轟炸我,已經炸咗我八年。佢愛到你癲咗,話唔聽我把聲會瞓唔着。冧嘅時候梗係冧,但我要做嘢㗎嘛,錄錄下音電話響,拍拍下戲電話又響,我拍《殺破狼》,同吳京一齊俾人打到仆街,個電話又響。所以我對屋企嘅 ring tone,一聽就驚,會彈起㗎。啲婚姻有一日會喺我自傳寫清楚,唔係每段婚姻都係女人錯,男人都有唔啱。我第一段婚姻因為太後生經唔起誘惑,第三任太太我真係對唔住佢,但係真係冇第三者。

你兩個女𠵱家幾大個?

咁就要計下先,真係唔係好記得。我成日都同個女講,趁住老竇未老到冇記性,要嗱嗱聲寫低啲人幾時生日。其實兩個女同第一個老婆生,都係跟我、由我湊大,佢哋都成家立室,兩個加埋生咗三個小朋友,我最大個孫都五歲。

點解你記得每任老婆婚期,唔記得兩個女幾大?

係囉……點解呢?我都真係俾個女管仲多過我管佢哋。我次次結婚打俾佢哋,阿女都話:又結?老竇,你唔係吖嘛……

有冇同啲孫仔講下 UFO同鬼故?

冇,我一世人都係用音樂影響人,我最想用音樂影響埋我啲孫,第二樣我唔知,但係音樂一定係好嘢。

你玩音樂唔係受父母影響?

冇,佢哋冇呢樣嘢,我十幾歲坐埋個琴度我彈到、坐埋個鼓度我又打到、細細個就畫公仔,一、兩毫子賣俾人。我有三個家姐,其實我阿媽話我仲有五個阿哥,但全部未見過就死咗,有一個阿哥,我阿媽話係發燒死,老竇抱咗佢去屯門埋咗……我發過一次夢,搭渡海輪,望去後邊有五個細路仔喺度。我唔記得佢哋講過啲乜,但係我覺得佢哋五個,每個每人俾個 talent我,所以我坐喺度識打鼓、攞起支筆識畫畫。

阿女話老竇你唔係吖嘛?

你開口埋口 UFO、陰謀論,連講自己才華來歷都好似講鬼故!

睇你個人知幾多、識幾多,去分析咋嘛。 UFO,因為我見過所以冇得唔信。你睇 911,機頭都未到,世貿大廈裡面已經着光,點會啫?大把專家都研究,大廈無可能咁樣冧,係要逐層爆先會咁咋嘛!事實上話俾你聽係有陰謀,世貿嘅業主仲要買重保險喎!講真,好多電影都暴露咗美國政府嘅嘢出嚟,佢要做世界警察,佢梗係咁霸道。有關呢啲嘢,我已經寫咗一個電影劇本,喺三藩市註冊咗,你哋唔可以偷橋,一偷,古天樂就會做嘢。因為我俾咗一個副本古天樂幫我 keep。

咁雨傘運動你又點睇,有冇陰謀論?

雨傘運動我直情唔理,我唔理你係咩顏色嘅絲帶,最緊要係因為大家唔同色,我未曾見過香港咁分裂。政治係一場陰謀,你冇可能喺一兩個月之間惡補到咩係政治。你哋唔知政府應該點做,但係許仕仁單嘢亦都證明香港多貪官,所以我兩邊都唔幫,淨係覺得好痛心。

愛.尋.迷

19歲就同第一任妻子結婚,夏韶聲話,一任老婆接住另一任老婆,四十多年沒有試過單身、沒閒下來過。

我問:「搵咗一世都搵唔到,所以你應該唔信 soulmate嗰一套?」

佢答:「第三任老婆,我哋曾經有過一段日子,佢都做過我嘅 soulmate。就算係上一任,都美好過,所以新碟我有一首歌係揀俾佢,感激佢都俾我經歷過呢一段美好。不過咩白頭到老、咩一生一世,講出嚟好聽啫,邊有啫?後生時會經唔起誘惑,到老又實有一個死先……除非有一次我喺灣仔見到一對公公婆婆,真係八、九十歲、企都企唔直仲拖住行;除非嗰時新聞講,老伴過身幫佢沖乾淨涼換好哂衫,伴屍七日……嗰啲就真係愛情,連我都好羨慕。」

我好懷疑夏韶聲話佢享受單身,我唔排除佢好快又會結第五次婚。

《童年時》

《華僑日報》最佳新人獎

《天眼》

《大兇兆》電視圖片

前前妻

前妻

寶貝女(網上圖片)

寶貝孫(網上圖片)



鍾意就快D Share啦!
Related Posts Plugin for WordPress, Blogger...