上月底亞視搞撲水騷出糧，誰知又係做假騷招呼內地客，根本冇收入，令員工空歡喜，好在得央視打救。
探熱針
逃過一劫 良心王征自肥 央視放水打救亞視
有五十八年歷史的亞視，由前身麗的經歷不下一次財困，最終在騎呢老細王征的朝代，走上絕路。近年以做假騷招待內地老細的亞視早前又搞籌款騷，但有傳又係搵人做「枚」扮競投、收益數目作假的一場戲。員工份糧一直拖，王征就象拔蚌、鮑魚、海參醫肚，自肥！
直到上週，亞視忽然有水出糧，據悉幕後救星是中央電視台。阿爺暗中打救，助亞視暫逃被清盤一劫。
心腹傑作
老細唔願科水出糧，拖足兩個月糧的亞視，垂死掙扎。上月底，與王征屬名譽會長的亞洲會搞咗個似足公屋騎呢騷的《萬眾同心撐亞視》節目，事後亞視執行董事葉家寶稱活動為公司帶來近五百萬廣告進賬，還有六、七十萬的拍賣收益，亞視員工以為出糧有望，點知空歡喜一場。
何以有入無出？據悉上月底一眾員工向公司追糧時，又再揭發有前科的亞視，連打氣騷公布的收入都係假！當日在場競投拍賣品的「善長人翁」，據了解是由「良心老闆」王征吹雞搵嚟撐場的內地「枚」；出面撐住爛攤子的葉家寶，為顧公司顏面，唯有硬住頭皮向外報大數。
「同事聽到話有四、五百萬收入，即刻追問係咪有半個月糧出，點知問落去先知嗰晚個騷坐喺頭兩行嘅所謂內地賓客，其實都係『枚』，佢哋出幾十萬競投啲畫同扇，全部都係扮嘢，冇俾錢，就算有部分真係買嘅，都只係出得一萬幾千，話拍賣收益有六、七十萬，講吓㗎咋！搵埋啲團體嚟做騎呢騷，啲廣告客點會肯俾錢贊助，所以葉家寶公布有四、五百萬進賬，全部齋吹。
「大家冇怪葉家寶，因為知佢撐得好辛苦。搞呢個騷嘅原意係想為員工打氣，點知落咗喺王征心腹、亞視副總裁趙汝強手，搞到個節目好似做緊亞洲會嘉年華咁，趙汝強唔係第一次，上年亞視向空櫈掟壽包嘅內地台慶騷，咪係佢傑作囉；係佢幫老細安排亞視先生去船 P，同事冇糧出呢段時間，公司仲將佢由助理副總裁升做副總裁，管埋製作，烏煙瘴氣！」亞視前員工爆。
央視忽然找數
已到死期，亞視仍未見白武士出現，以為十二月份薪金凍過水，但上週突然出現戲劇性轉機，執行董事葉家寶宣布，收到一筆來自廣告、頻道管理費資金，上週六（一月三十一日）已向二萬二千元月薪以下的員工發放十二月薪金。
據悉，亞視有錢應急原來是 CCTV（中央電視台）背後放水，由阿爺暗中相救。
「 CCTV嘅轉播費一直未找，追咗一段時間，數目都好大，上個禮拜緊急關頭佢哋忽然肯俾錢，簡直救星一樣。不過救得十二月份，一月筆數又唔知點撲返嚟。」亞視前員工續說。
本週一（二月二日），勞資審裁處召開首場亞視前員工追討欠薪聆訊，據悉不少員工願意與公司達成協議，以欠薪及遣散費作為和解費，暫免亞視被申請清盤。
|
鍾意就快D Share啦！
|
|
|