婚禮籌備得如火如荼，但本週日，亞男與祖藍仍到藝術中心睇舞台劇。
娛頭
500萬禮金氹掂外母 同李亞男婚前驗身 王祖藍親認腸癌高危：過得一日多一日！
今個情人節，李亞男正式成為王祖藍太太，要成功娶得美人歸，其實過程一點不易。
原來五呎三吋高的他一直不為女方父母接受，去年二月首次提出婚事被拒，到七月，王祖藍親身飛去加拿大再次提親，答應會搞三地婚禮外，又以五百萬做禮金，最終誠意打動外父外母。
除了外形差異，王祖藍還要面對家族遺傳的風險。原來王父在他二十三歲腸癌病逝，承認是腸癌高危的他說：「唔知㗎！始終家族有呢啲嘢，腸癌自己係五十五十，唯有盡量做好啲，養好身體，過得一日多一日！」
防患未然，王祖藍帶埋準太太一齊做婚前身體檢查，平安大吉！
三地擺酒
得五呎三吋高的王祖藍，能夠成功打動五呎九吋國際華裔小姐冠軍李亞男，這半呎距離，亦一度令他不為李亞男父母所接受。
「亞男生得靚身形又好，父母當然希望自己個女搵個登對嘅做對象。第一次見祖藍，竟然矮過個女咁多，真係好難接受，加上亞男思想好單純，佢父母對佢同圈中人拍拖係比較擔心！後來見祖藍對個女好真心，先開始改觀。」李亞男身邊人說。
拍拖六年，現年三十五歲的王祖藍一早想娶李亞男做老婆，但即使雙方認定，亦一定要過父母一關。去年二月，趁李亞男父母來港，王祖藍曾提出婚事，不過卻被拒絕。
「祖藍一三年已開始有 planning結婚，所以一直好努力儲錢買樓，想俾亞男父母覺得佢係個有承擔嘅男人。舊年年頭，亞男父母嚟香港，佢就鼓起勇氣同兩老提親，點知被佢哋拒絕，嗰陣祖藍又擔心又心急。」知情者說。
為成功娶李亞男做老婆，王祖藍只好再接再厲，甚至做足準備功夫。
「舊年七月，祖藍陪亞男一齊返去加拿大探屋企人，因為試過被拒絕，準備再提婚事嘅祖藍心情好緊張，對住兩個長輩硬晒軚，又唔敢講笑！亞男係上海人，喺上海同加拿大都有唔少親朋戚友，所以祖藍自動提出，除咗喺香港大搞，仲會喺上海同加拿大擺酒，當時祖藍仲準備五百萬，作為娶亞男嘅禮金；其實唔係錢嘅問題，但老人家會覺得佢好有誠意，可以俾到安全感自己個女，所以就搞掂咗！」
婚前檢查
婚禮在即，王祖藍與李亞男日前忽然去做婚前檢查。
原來王祖藍的父親，在四十六歲時因腸癌病逝，亦有親人患過腸癌，面對家族遺傳風險，他要特別小心飲食，每年做身體檢查。
日前，王祖藍應大埔神召會堂邀請講見證，其間提到父親患腸癌經過，一度講到眼紅紅。「嗰時我讀演藝學院尾三嗰年，去咗廣州交流，老豆失咗踪成個月，後來我交流返嚟，佢同我講話佢患咗腸癌，係第三期，原來佢失踪，話自己去潛水，就係唔想我擔心，自己匿埋做咗手術，切咗條腸，有個造口，開始接受治療……○○年到○二年，阿爸好努力醫病，○二年再做一次掃描，醫生同佢講，話佢癌細胞無晒，只要做手術補番個造口就冇事。
「嗰晚成家人好開心，點知第二日做手術，話幾粒鐘，但做咗十幾個鐘都出唔返嚟，醫生話係掃描睇唔到，話佢癌細胞已經擴散，我喊咗成晚，心情跌落到谷底。」
遺傳率高
在眾多癌症中，腸癌已被證實遺傳率最高。患者中， 75%是後天形成，而 25%是遺傳有關。據腸胃專科李玉棠醫生表示，腸癌屬基因性的遺傳，其特徵是大腸上長滿數以百計或千計的瘜肉以致腸癌，只要有家庭成員 50歲前患腸癌，下一代患腸癌的機會是比一般人高出兩倍，而發病年齡亦可以相當年輕，二十多歲的案例經常出現。
大部分腸癌於早期並無任何跡象，為預防腸癌，除多做運動、注意飲食生活習慣外，亦應提早接受體檢，如及早發現腸內出現瘜肉，可接受切腸手術，以防萬一。
家族陰影
父親英年早逝，王祖藍心目中，父親是個有承擔、盡責的人，自己亦以他為榜樣。
「我諗唔到咁矮嘅王祖藍，而家可以有啲名氣，有養到屋企嘅能力。我相信係阿爸幫我哋祈禱，他日我會同佢喺天家對質。」
見證會尾聲，王祖藍更承認自己是腸癌高危人士。
「唔知㗎！始終家族有呢啲遺傳，自己腸癌係五十五十，唯有盡力養好身體，做好啲，過得一日多一日。」
此外，王祖藍亦有提到外界指他在台慶求婚，是幫公司谷收視的說法。
「啲人話我，求婚攞收視，如果你哋記得，嗰日我講過，人生當中，就係要搵一個人，同你過得一日多一日，而每一日都係神嘅恩典，大家唔知我有過呢啲經歷。點解求婚要喺十一月？我其實想喺十月，或者九月，但九月我有個親人突然走咗，我喺美國，連返嚟見最後一面都趕唔到。」據了解，九月去世的是王祖藍姨媽，當年王父病逝，祖藍一家與姨媽感情特別要好，親人猝逝，對王祖藍母子，同是大打擊。
擔起頭家
35歲的王祖藍，父親早逝，有兩名弟妹的他，要獨力撐起成頭家。 03年，演藝學院畢業後加入無綫，憑主持節目《荃加福祿壽》，扮女人深入民心。一三年推出編劇兼主演的《老表，你好嘢！》，事業推向新高，加上在湖南衞視的綜藝節目《百變大咖秀》中扮 G.E.M.，獲網民大讚，令他火速成為內地市場搶手貨。
福祿壽旺屋
情人節娶老婆，刻意令婚禮留下特別回憶的王祖藍，近期卻為愛巢裝修一鑊泡，浪漫變大頭痕，搞到要報警求助，但一對準新人並冇匿埋屋企㓤大髀，連日來反而不停開 party，搵人踩旺屋。
上星期日（一月二十五日），阮兆祥、李思捷便帶埋自己個老媽子，到王祖藍的新居，玩「福祿壽」旺屋，只見祖藍媽與李亞男不斷在廚房氹氹轉，準備晚餐，「兩婆媳」有傾有講，相處融洽。等咗杯新抱茶六年，終於到口！
|
鍾意就快D Share啦！
|
|
|