2015年2月25日 星期三

[FACE - 405 - 外地娛樂] 越洋專訪 下月攻港開 FM 任時完提醒港女最緊要笑 MF,




現年 26歲的任時完,其實是韓國男子組合帝國之子的成員。入行 5年,除唱歌外,更拍過多部電視劇,但一直做配角,直至去年底擔正主演 tvN連續劇《未生》後即上位變一線男優。

韓飯台

越洋專訪 下月攻港開 FM 任時完提醒港女最緊要笑

韓劇威力真係唔講得笑。好似去年 12月中已大結局的 tvN連續劇《未生》,男主角任時元餘威仍在,除勁接廣告外,下月 28日更空降香港,殺入九展舉行首個香港見面會搵真銀。

來港前,新紮大勢男任時完,專程接受《 FACE》越洋專訪。對於上位作《未生》中沒有跟任何女演員有感情線,任時完都表示好遺憾,不過佢話下月來港開 FM時,會計劃好多互動環節同港女增進感情,更自爆鍾情有共同話題、尤其愛笑的女仔。各位港飯,見到時完男神,最緊要笑多啲

《未生》令你冒起成為大勢男,有什麼感覺?

好高興呢部電視劇得到大家支持。同劇組嘅演員亦得到觀眾厚愛,每位演員嘅演出活動也多起來,我好開心。遺憾係拍完劇後大家都好忙,所以好少時間見面。《未生》拍攝期間,導演、演員及工作人員對每個拍攝步驟都非常用心,所以先拍得出咁好嘅作品。

《未生》講打工仔在職場打拼的辛酸,引起唔少人共鳴,所以特別入屋。而劇中演員(左起)任時完、姜素拉及姜河那全部紅晒。

去年尾時完捧走 MBC演技大賞的「男新人獎」,不過呢個獎係佢憑 MBC劇集《 Triangle》而攞,同《未生》無關。

時完及素拉憑《未生》大受歡迎,唔只密密接廣告,連韓國政府都搵佢做韓國貿易宣傳大使。

劇中你同女演員冇任何感情線,會唔會感到遺憾?

我個人覺得真係非常遺憾。但如果加入感情線破壞整部作品嘅內容架構,我會覺得更加可惜。

下月 28日空降香港開 FM,到時冇乜特備節目?

任時完話來港開 FM時,想跟香港 fans多互動增進感情;而時完亦表示來港後,想去購物及坐纜車觀光,而且想品嚐燕窩。

今次香港粉絲見面會,唔單只將我個人形象展示給大家睇,為同港迷有更親密接觸,我現時已努力地去計劃更多同粉絲互動環節,請大家多多期待。

你喺香港有眾多女 fans,咁你自己鍾意邊類型女仔?

我會喜歡有共同話題,同我傾得埋嘅女仔,而愛笑嘅女仔就最吸引。至於我有冇女朋友?留給大家自己想像

你偶像係邊個呀?

時完自稱睇劉華電影長大,呢套劉華經典作《天若有情》,肯定有睇過

我非常鍾意劉德華,我想好似佢咁喺演戲、唱歌同社會公益活動等多方面發展。我小時候已睇佢嘅戲長大,佢對我影響好深。

鍾意就快D Share啦!
Related Posts Plugin for WordPress, Blogger...