全知言
有錢的煩惱 𢭃完利是點用好呢？
過年最期待之一嘅節目，當然係𢭃利是
有冇諗定啲利是錢點使好呢？
全知言趁過年𢭃利是之餘問咗不同藝人，睇吓佢哋有乜意見，可以參考吓喎。
蔡瀚億 請長輩飲茶
細個好想拆利是，人愈大愈唔想拆，上年嘅利是今年先拆，好似有種感覺係畀個意頭繼續落去，所以今年嘅利是出年至會拆，當你拆利是嘅時候會諗起一啲長輩，都係一種意義，可能因為咁搵佢飲吓茶，都幾好吖。
詩雅 捐出去
之前咁多年利是都係唔拆，儲咗 5年，上一年拆晒，因為想當係重新嚟過，都有成幾萬蚊。今年會拆嘅，一半以上會捐出去畀我助養嘅兒童，助養咗一個，另外會買啲自己鍾意嘅嘢送畀自己，但未諗到買乜。舊年大部份都係捐出去，其他畀晒媽咪，所以今年想買番份嘢回報自己嘅努力。
周柏豪 畀阿媽做零用
利是一年比一年多，因為每年識嘅人愈嚟愈多，係一個福氣，大個仔喇，會將所有利是錢畀晒爹哋、媽咪做零用錢，係時候報答番佢哋唔知佢哋有冇買嘢呀，可能買番嘢俾我食啦。反而過年會使好多錢，會出雙糧畀爹哋、媽咪啦，雖然自己未結婚，都會派利是畀同事同工作人員，派得多係開心事。
劉浩龍 入豬仔錢箱
細個會到初十五至開，人大咗冇咁等錢使，所以我有個好大嘅豬仔錢箱，將咁多年利是錢入晒落去，得軟嘢冇硬嘢嘅，睇下幾時劏咗呢隻豬睇下有幾錢。
最好笑係我搬屋唔會畀人搬隻豬仔嘅，我自己搬，都儲咗三、四年。印象中最大封係一萬蚊，唔記得邊個派。暫時冇結婚派利是計劃喎，想同新公司磨合多啲，努力啲要畀啲積極嘅態度新公司先，希望努力下先啦，五月中有演唱會，同埋要拍戲，所以都幾忙。
關楚耀 買禮物
細個一定去校長（譚詠麟）屋企崵利是，一定係最多，好多親戚都會年初一喺佢屋企，同埋校長好闊綽，但唔講得幾多，一定係 4位數每年利是錢一定會儲起，另外會買啲禮物畀同事，請下大家食飯同封開工利是，環球愈嚟愈多人，五位數走唔甩。
知無不言 言無不盡 我係全知言
|
鍾意就快D Share啦！
|
|
|
