真人騷
來忘掉錯對 來懷念過去 孫佳君：以前嘅嘢，唔做都做咗！
難言之隱誰都有，不過孫佳君似乎特別多。
或者說，大家最想知道的，就剛好都是她不能說的秘密。
02年哄動全港的富豪相簿，她是最常上鏡、在鏡頭裡最惹火的女主角， sorry，訪問之前，公關已經代通知：「孫小姐話，羅兆輝嘅問題唔問得！」
09年，與兩個兒子的父親、富商劉貴喬家暴鬧到上法庭，現在關係如何、對方有沒有份教養兒子？她也說：「嗯，我哋有協議，都係唔好講佢。」
於是，整個訪問裡，孫佳君最常掛在口邊的是：「以前嘅嘢，唔做都做咗，又冇得返轉頭，唔好睇得太重；未來嘅嘢，唔好 plan十年廿年，邊有人知自己幾長命？
最緊要係呢一刻活得開心，最緊要係活好每一刻！」
就看這一刻的孫佳君：四十歲，保養得宜，美麗且風騷；一對兒子，甜蜜蜜都是她的小情人；五個月前，戀上法籍米芝蓮大廚，愛得痴纏日日曬命；家住前度南區豪宅，不愁吃不愁穿，閒時買下鞋打下美容針；三年前再為興趣復出影圈，新作《雛妓》演三十歲阿 Sa母親，挑戰下自己演技……應有盡有，何其疏乾？
難怪，她說要忘掉過去，說要盡情活在當下。
只不過，沒有過去，有哪來的現在？
我整容係氹自己開心
點解要返出嚟拍戲呢？
我簽咗英皇兩年幾，返出嚟係因為真係好鍾意演戲，成日都覺得有啲未完成嘅使命喺度。再講我都好鍾意做嘢，唔鍾意淨係喺屋企。
冇拍戲嗰十年有幾身痕？
成日搵戲睇囉，睇親都鍾意執人啲戲。成日都好想做嘢，唔想淨係留喺屋企。
拍《雛妓》，做阿 Sa阿媽，我想像唔到你可以做一個咁嘅弱質女流，仲有個 30歲女。
呢個就係點解我咁想拍戲，咁想做呢個角色。以前我做親嘅角色都好 strong，呢個角色 soft啲，老啲。我唔係你哋以為咁貪靚，我可以接受到自己喺鏡頭前生活化，老又得、唔化妝都得，演員就係要生活化，最驚嗰啲女星喺鏡頭前面不停補粉。
四十歲都 keep得咁好，點做到？
我覺得有兩樣嘢，個天會幫你，但自己都要努力。
有關微整型，你都好坦白，大膽過好多女藝人。
我連啲圈外朋友，每日淨係湊小朋友返學放學，都去過加工，唔好話咩，有人十六、七歲都去割雙眼皮啦，有乜嘢啫？我會 keep住去（打針）嘅，有啲位嘅靚樣係要保持。
係想追求靚？想延長美麗？定係因為你做呢行咁樣係專業？
我覺得最重要係會令自己開心，好多人會唔滿意呢度、唔滿意嗰度，做下令自己開心有咩問題？但係淨係增值自己嘅外貌無用，都要無時無刻增值自己內涵同個性。有好多演員，我覺得好奇怪，覺得無嘢重要得過靚，演員唔應該係咁，唔係淨係需要照鏡囉。
年輕時唔知咩叫做愛情
現實中嘅你，係唔係真係咁 strong？
係，個個朋友都係咁話我，生活造成，我好細個就冇咗爹哋媽咪。
點解嘅？
我歲半時，佢哋已經因為意外過身。跟住阿嫲湊大我，大我兩歲嘅家姐就交咗俾阿婆湊，太細個喇，我對父母嘅記憶可以話等於零。所以話做人唔好諗咁多， plan十年、二十年，不如淨係 plan今日同聽日嘅嘢。我都會諗，如果佢哋仲喺度就好喇……但邊有咁多如果啫？你只可以諗，其實我都有好多嘢多過人、豐富過人，已經好好多，做人唔可以擁有全部。啲人成日大驚小乖，父母離婚又話啲小朋友幾咁陰功，當然家庭完整係一件好事，我覺得有咩咁陰功啫，都係要咁過㗎 whatever it comes，件事都要繼續。
小朋友幾多歲？
一個十歲，一個六歲。
佢哋嘅爸爸有冇經常來往？你同佢關係如何？有冇聯絡？
冇……嗯，我哋有協議，唔好講咁多，都係唔好講佢。
兩個仔乖唔乖？
永遠對媽咪嚟講，佢哋都係唔夠乖㗎啦。但人哋覺得佢哋好乖，頭一下識扮嘢，成日唔交功課。
做一個媽咪，你教育佢哋睇得最重係咩？
因為我有兩個，我最常同佢哋講，係分享。我成日都話，媽咪有一日會唔喺度，咁就淨番你哋兩個，你哋一定要愛錫對方。佢哋日日打交，但又好好笑，一唔見人就會不停問：做咩仲未見佢？佢幾點返？但返到嚟和平五分鐘，又再打過。
你成日都話，佢哋兩個都好甜，甜過男朋友？
好 sweet㗎，兩個都話想同我結婚。成日都覺得媽咪就係最靚、最叻、最好嘅女人，我諗異性相吸，仔係特別黐媽咪。我成日換完衫出街，佢哋就會行埋嚟：媽咪你好靚呀！你去邊呀？可唔可以帶埋我呀！
佢哋會唔會妒忌你嘅新男朋友？
咁又唔會喎，佢係外國人，好鍾意同小朋友玩，好識同佢哋相處。
同法國大廚前，幾耐冇拍拖？
好耐喇，自從有咗小朋友之後，都冇再拍拖直到𠵱家。
感覺如何？久旱逢甘露？
好似咩都唔識咁，好似 BB咁，𠵱家微信、 WhatsApp、又咩 facetime，以前邊度有？但係好開心，好需要，每一個人都需要愛情。
當呢段愛情開始時，需唔需要諗好耐？
原來當你遇到嗰個人，好自然就會開始，唔需要諗。要諗，即係話嗰個人唔啱你。
熱戀五個月，會唔會諗未來？諗太多？
會，會諗，但係要提自己，唔好淨係希望可以行到幾耐，最想係行緊嘅每一刻都開心，都係好 quality嘅 time，如果你問結婚，我從來冇諗過結婚。行到幾耐呢個問題我成日都問自己，但我諗唔會有答案，呢個世界冇永遠，要用心維繫，但唔好 force可以維繫到幾耐，最緊要係將呢一刻活得開心。等於問你自己可以有幾長命，邊度知？不如活好每一刻。
年輕時有冇咁活在當下？
後生反而唔知咩叫愛情，好多時人哋追我、我就去，話 date下， ok，就去 date，其實係唔係真係鍾意，我都有懷疑。亦都可能我隔咗太耐冇拍拖，以前嘅愛都模糊咗，我都唔係好肯定。同埋長大，你至知咩叫愛，後生時，總以為愛就係佔有，佔有唔代表真係愛。成日唔俾人呢樣、唔俾人嗰樣，大個至識，要俾佢做佢想做嘅嘢，嘗試欣賞佢嘅缺點，將佢嘅缺點盡量化到最細。
錯誤決定冇得返轉頭
當年孫佳君真係好索，其實今日見到都係咁索，幾時至係你最好的時光？
廿幾歲時真係快樂，唔使有好多責任，唔使有好多負擔。但係真正最好係幾時，未到最後一刻都未知。當然廿幾歲時後生啲、又靚啲、身體都好啲，但𠵱家更有自信，更知道自己想要啲咩。
難道你廿歲時信心少過𠵱家？
係㗎，冇信心㗎。拍《百變星君》時驕傲過𠵱家，但驕傲唔代表有自信。廿歲覺得好似冇乜嘢難到自己，到四十歲係各樣都睇得冇咁重，比較容易放手。最好的時光，我覺得每個年紀都有嘢勝過之前，但一樣會有嘢蝕咗，所有嘢都係有得又有失。
廿歲時冇嘢會難到你？比如話呢？
比較容易相信，唔怕輸。𠵱家唔敢試，唔敢相信。好似拍拖，𠵱家少咗衝動，冇咗 believe。
呢行咁多年，一路覺得順暢嗎？
人人都話呢一行洪水猛獸一樣，邊有咁恐怖啫？又有好多朋友問我，喂，你哋做藝人，好多人離婚喎！邊度冇人離婚啫？分別在於呢一行係公開啲啫。
分別就係在於新聞報導，有啲新聞發生咗，係會跟你一世。
我都試過呢啲階段，細個真係會為啲新聞唔開心。大個就識諗，你唔使取悅每個人，亦都唔好介意人哋點睇你，最緊要做好自己，最緊要自己同意自己。
唔係每個決定你都同意自己啩？
當然，有啲嘢事後睇番，會覺得 that was not a good choice， not a good move。但嗰一步你唔做都做咗，又冇得返轉頭，惟有繼續向前行。我覺得做人就係咁簡單，唔好睇過去睇得咁重，唔好生活喺過去，要向前看。
就算係做咗當年搞到滿城風雨娛樂新聞嘅女主角，你都係可以咁諗？
你可以話我鬼妹仔性格，我唔係會俾嗰啲嘢困擾住自己嘅人，就算嗰段日子，我都係咁過，最多都係去少啲街，費時俾人見到。我又唔覺得自己行差踏錯，係啲報導誇大嚟講，我唔會執着。人哋寫，寫嗰個又唔會唔開心，我做咩要搞到自己唔開心？做咩要咁蝕呢？你對得住自己良心，就 ok。
20
30
40
漂亮得過火
21歲，在《百變星君》裡初亮相，當年的孫佳君年輕又冶艷，是一代女神。
40歲，風情萬種，更有味道，不過老實說句，上鏡剛剛好，可是面對面，總覺得兩片豐唇加工下了重手，立體得滯。
我問她，美容針到底打在哪裡，她眨眨眼：「你哋唔會唔知嘅！」
我是真的沒有經驗，不敢肯定，也覺得有點兒過頭。
不過我想這就是孫佳君為甚麼活得漂亮、過得自在的真正原因：既然老娘喜歡，別人接不接受得來，需要理會嗎？
|
鍾意就快D Share啦！
|
|
|
