2015年4月30日 星期四

演協賬目混亂 劉家輝 20萬善款下落不明 [壹週刊 - 1312] 演協,張家輝,家輝,劉家輝,演藝人協會,M1,



劉家輝出事後,妻離子散,更被無良前助手呃錢,近年在療養院養病的他,出入要人照顧,去年底,樊亦敏聯同王喜帶他到山頂飲茶。

探熱針

演協賬目混亂 劉家輝 20萬善款下落不明

演藝人協會人多是非多,四屆會長曾志偉,因免費電視牌風波觸發會員內訌,索性提早劈炮唔撈後,又再上演黃秋生競選會長被拒入門鬧劇;今年四月,成龍被指以大比數跑出做新一任會長,以為是非可以告一段落,點知演協會又發生懷疑有人「穿櫃桶」。

之所以揭出「漏財」,事緣早在一三年曾有位圈中有心人,透過協會捐出二十萬予中風導致行動不便的劉家輝,但有關捐款至今下落不明,翻查賬目期間,更發現高達六百多萬的營運費不知去向,已離任的曾志偉要孭鑊,唯有自掏二百萬填氹。

有人做手腳

曾志偉辭任會長後,其間一切會務轉交由秘書處負責,真空五個月,今年四月初,成龍正式接棒,但會中問題,已愈滾愈大。繼一一年傳出有甘草會員利用協會名義搵着數後,近日再盛傳,會中六百多萬的營運費不知去向;為令大事化小,曾任四屆會長的曾志偉,唯有私下攞二百萬出來填氹。

「因為前年有個唔願出名嘅圈中人,透過演藝人協會捐咗二十萬俾劉家輝,隔咗一段時間佢問番志偉,先發現啲錢唔知去咗邊,加上換新會長,志偉要搞清楚盤數交俾下一屆,搵核數師一 check,先發現有六百幾萬唔見咗。其實志偉八足咁多爪,成日飛來飛去,所以做會長呢幾年,啲嘢都係搵全職秘書幫手做,例如開支票,如果銀碼係一萬幾千就會簽,根本冇諗過有人做手腳。」知情者說。

二百萬!我俾得起!(設計對白)

曾志偉劈炮唔做會長,新一屆由成龍接手,不過大部分時間以內地為基地的成龍,被指唔得閒處理會務。

今年四月演協會搞周年籌款晚宴以懷舊為主題,一班藝人以八十年代打扮出席。

曾志偉做善事出錢出力,早前孖住張學友搞籌款演唱會向梅艷芳致敬,二人最後再共捐十四萬,以總數五十萬給《香港兒童癌病基金》。

對於廿萬捐款一事,樊亦敏表示至今未有協會人員聯絡他。

秘書請辭

據了解,其中一個秘書在事發後已經辭職。「其實好難追番條數,因為有法律效力嘅會員簽咗名,件事就係合法,同埋每次要會長簽支票銀碼只係一萬、兩萬,好難即時察覺有問題。」

在任期間出問題,曾志偉責無旁貸,於是自動波攞出二百萬救急填數,支持日常會務開支,但有關劉家輝捐款一事,至今仍未有人跟進。本週一(四月二十七日)下午,記者向近年負責照顧劉家輝的樊亦敏問反應。

「完全唔知呢件事。(會唔會去了解?)首先多謝捐款人,我都係啱啱知道,遲啲會去求證同了解。其實家輝哥出事之後,演藝人協會每隔一段時間都會搵佢,最初志偉有幫手叫埋無綫同律師開會,但法律程序太複雜,但佢一直都有搵人問家輝哥有咩需要,中秋又會送月餅。但捐款呢件事演藝人協會從來冇提過,但點都好,多謝大家關心師傅。」返大台開工的樊亦敏說。

對於有心人捐出廿萬給劉家輝一事,演藝人協會的新任秘書 Pamela在電話中表示,已向曾志偉及秘書長陳芷菁求證,二人均回覆「冇聽過」。

演藝人協會去年是非多,發生黃秋生入門被拒後,曾志偉集齊一班副會長及委員見傳媒,以示團結。

一一年,傳出有甘草會員瞞住演協會在外搞活動搵銀,更刻意魚目混珠,將會徽的「演」字由黑變白混淆視聽,曾志偉更因此決定整頓風氣。

劉家輝一一年出事後,圈中有不少藝人關心他,同是打星出身的陳觀泰(左一)曾經到療養院跟他一起過中秋節。

鄺佐輝去年患癌,演藝人協會也有資助數萬元醫藥費。

隱疾現形

曾志偉任會長期間,演藝人協會一直有協助有需要的演藝同行,包括資助鄺佐輝患癌醫藥貴,又定時向一班甘草演員發放茶錢等,但掛萬漏一,內部積存問題風波,包括六百多萬不翼而飛,驚爆!

權力過大

去年初,曾志偉點名接班做候選會長的黃秋生,帶住一班藝員到場投票,竟遭秘書長陳芷菁阻攔食閉門羮,黃秋生即場表演典地扮死嘔白泡,依然不得其門而入,事後他公開指責秘書長權力過大。

跟導演會決裂

13年底,就政府拒發牌王維基的香港電視,導致十二萬人上街抗議,身為同業的演藝人協會在翌日發出遲來的聲明,會長曾志偉表示,因未能與導演會就聲明內容達成共識,未能圓滿地處理事件,決定辭任會長一職。

制度混亂

有指只要填報名表,就可以即時加入演藝人協會,但黃秋生申請做會員當日,卻突然變成要兩日時間批核,令他被拒諸門外;有指至去年四月,經正式手續入會的會員根本不足一百人,可見制度七國咁亂。

鍾意就快D Share啦!
Related Posts Plugin for WordPress, Blogger...