2015年4月30日 星期四

日韓到會 首爾直擊  BIGBANG回歸得兩首新歌 [壹週刊 - 1312] BIGBANG,M1,



BIGBANG相隔三年強勢回歸,世界巡迴《 MADE》喺首爾揭幕。隊中靈魂人物 G-Dragon表現特別落力,仲唔小心俾頸鏈整親, fans心痛死。

探熱針

日韓到會 首爾直擊  BIGBANG回歸得兩首新歌

千呼萬喚始出來!等咗差唔多三年,韓國天團 BIGBANG終於合體,回歸樂壇出新碟,第一擊先喺韓國舉行兩場演唱會,世界各地嘅 VIP( BIGBANG歌迷名稱)梗係即刻齊集首爾迎接五子!唱足三個鐘, VIP想聽嘅新歌有兩首,其餘都係唱舊歌,已經 high爆全場!

唔夠喉?每個月 plug兩首,吊吓大家癮先出碟,真不愧為最賺錢嘅組合!

舊歌重新編曲

BIGBANG今次巡迴演唱會名為《 MADE》,將會巡迴 15個國家演出超過 70場,第一站當然喺家鄉首爾誓師。其實 BIGBANG已經好耐無新歌,過去 3年五子專注個人發展, G-Dragon同太陽出 solo, T.O.P密密拍戲,所以今次嘅新碟令人相當期待。新歌都未出,就已經開演唱會, VIP好想第一時間聽到新歌,一連兩場嘅演唱會,全場爆滿容乜易! BIGBANG五子以帥氣西裝 look出場,以首本名曲《 Fantastic Baby》揭開序幕!吓?又係呢首?係呀!其實今次韓國騷,基本上以舊歌為主,不過唔代表無誠意,一啲早期作品好似《 How Gee》、《 Lies》等等,就以重新編曲帶來新鮮感,近期少少嘅《 Blue》、《 Stupid Liar》,喺燈光同舞台裝置之下,一樣令 fans有驚喜!最犀利係喺 standing區有兩個移動舞台,五個成員就唱住歌跳住舞喺頭頂經過,而且舞台大概得 3米高,男觀眾伸高手已經可以掂到,有咩可能唔 high?

比起其他韓國男團, BIGBANG出碟嘅頻率堪稱最低,一年都出唔到一隻碟,佢哋都講笑咁話自己唔上電視宣傳, fans都唔記得咗佢哋。

星期日係大聲 27歲正日,佢賣口乖話可以同 fans過好幸福呀!

兩首新歌 繼續洗腦

唱到演唱會中段,先至唱新歌。演唱會開始之前,幾位成員已經事先喺 Instagram公布新歌歌名,首先喺 5月 1日推出係《 Loser》及《 Bae Bae》,《 Loser》係中慢版失戀情歌,早前佢哋飛咗去美國拍嘅 MV,亦率先曝光,五個失戀男俾女飛,睇到 fans心都痛。睇完 MV輪到現場演繹, BIGBANG現身喺一個旋轉嘅大鏡盒入面,繼續頹廢做失戀男。明明係第一次唱,不過 fans睇過 MV已經識跟住哼,可見中毒極高!第二首《 Bae Bae》之後,連 MV都未有, Hip Hop加上 rap,係 BIGBANG招牌曲風, VIP當然受落! Encore時再唱多一次兩首新歌,已經幾乎可以全場一齊哼,連台上嘅成員都嚇一跳,依然不忘叫大家記得背歌詞!

G-Dragon同太陽過去兩年專注個人發展,上年年尾合體推出《 Good Boy》,橫掃各大流行榜,今次 BIGBANG齊人,成績應該會更好!

勝利喺演唱會上挑戰打碟,將《 Feeling》重新編曲,效果好好,現場氣氛更高漲!

第一次唱新歌《 Loser》,勝利話 GD最近特別鍾意自己,所以俾佢唱多啲,但係都無損太陽嘅主音地位。

創作遇樽頸 愧對歌迷

今次 BIGBANG推出《 MADE》,起初公布嘅時候,只係俾咗幾個日子,五月至九月嘅一號,無人知佢哋咩葫蘆賣咩藥,原來係佢哋諗出嚟嘅新歌宣傳大計,每個月出兩隻歌,五個月就出晒十隻歌,換句說話即係首首都係主打歌,每一首都有 MV,佢哋出咗名製作認真,製作費閒閒哋都過百萬,認真落重本!隊長 G-Dragon話三年無出碟,今次俾咗好大壓力自己,希望做到最好,仲喺創作上遇上樽頸,唔想對唔住等咗咁耐嘅歌迷,好彩最後大家都喜歡新作品! T.O.P就話好耐無試過喺韓國演出,講韓文都特別緊張喎。不過好快佢哋又要轉 channel講其他語言,因為世界巡迴隨即展開,而香港站已經定咗喺 6月 12至 14號, VIP唔使等到頸都長!

G-Dragon係 BIGBANG嘅創作核心,為咗今次專輯,由上年已經開始埋首創作,不過就算作晒歌都仲有好多後期要配合,下半年有排忙。

T.O.P每次出新歌都有新髮型,今次電咗爆炸頭,繼續 sell靚仔。

大碟名《 MADE》,每個月兩首,分 M、 A、 D、 E咁出, fans勒緊褲頭儲錢吧啦。

《 MADE Tour》嘅預告片早前率先曝光,演唱會上仲有得睇更長版,又爆破又追車,水準直逼荷李活電影!

鍾意就快D Share啦!
Related Posts Plugin for WordPress, Blogger...