插圖：詹震寰
中環人語
爆煲論到期 湯文亮潛水
湯文亮近日爆紅，先是二月發表了細價樓爆煲論，引起全城熱話，三月時睇淡滙豐，睇好「生發發」港交所，立時被封為「新股神」。
賺一大筆應該大事慶祝，不過湯文亮出席完一早約好嘅浸大講座之後，除咗繼續寫文章就無聲無氣。佢同《壹》仔講，佢俾「股神」稱號嚇親，叫做「估神」好啦。事關封咗做「股神」之後一日，佢就收到五十幾個電話，佢年紀大覺得太刺激，心臟頂唔順，要專程去養和睇心臟科醫生。
計計吓，仲有兩個星期就到三個月爆煲論限期，想訪問番湯文亮點睇嚟緊樓市。佢話醫生建議佢應該多休息、少應酬，三個月內不能接受訪問。之後仲特登影張醫生紙俾《壹》仔，證明真係睇咗心臟科醫生。睇嚟佢去玩潛水適合過坐過山車。
21影業不日上畫
細價股 21控股（ 1003）早前宣布易主，引入多名「星級股東」。單刁由蔡東豪舊老細、精電主席高振順及阿里影業前主席董平牽頭，二人乃金魚缸常客，最奇怪是，連「公職王」、貿發局主席蘇澤光都大拿拿攞咗近二千萬入股，另外仲有拍過《人在囧途之泰囧》的影星徐崢、《瘋狂的石頭》導演寧浩等，噱頭十足。小宗第一時間打俾高振順索料，佢話佢既是股東，亦是單刁的財務顧問，唔方便講嘢。不過，心情靚靚嘅佢，不忘提醒小宗，蘇澤光做過幾年電影發展局主席，好熟媒體，而徐崢等人都是內地票房過十億的電影人。畫公仔唔使畫出腸，而家做緊地產代理及投資業務的 21控股，睇來好快變 21影業。
揸滙豐當攬新女
嘩，禮拜六走去上環衣紙鋪買金銀衣紙，幾鬼多名車喺門口排晒隊，一路買衣紙一路噏股票，我睇啲人心虛，個市升得咁急；我係睇住一、兩隻心水股，平保喺$141、$144做兩轉 decumulator，分多幾轉做等個銀行佬日日有得向上頭交數嘛，唉，滙豐吹話遷離英國股價反彈吓，我啲棺材本都仲有滙豐，呢隻股即係等如年老色衰嘅老婆，有 downside，無 upside，咪整吓呢度，搞吓嗰度，披件靚衫，咁做老公嘅攬住咪當係條新女囉！但走勢始終向下。之前我見滙豐同中石化兩隻嘢鬥殘咁，就押注落去中石化，起碼都有古講吓嘛，家陣都有啲斬獲。
呢排有啲金融界老友，約我去 happy hour，你慌唔係想索我啲料呀。 Happy hour唔去啦，日日睇住個市，你估唔攰呀？搵到錢，點你去食又抵又威嘅嘢，嗱，平日喺中環食個晏，唔好講錢住，訂唔訂到位都唔知，喺遮打大廈間 Armani Aqua，週六、日 brunch抵食㗎，唔使同人逼，啲任食嘅日式刺身、壽司幾靚㗎，仲有意式主菜，臨尾上客甜品，最盞鬼係香檳、白酒、紅酒任飲，而家冇乜高級餐廳咁做，大人五百幾蚊位，唔飲酒四百幾，細路仔半價添。嗱，週六少人，週日好多細路仔。齋飲酒都抵番啦。
死人股
七三年已上市嘅安全貨倉（ 237），肯定係老股，公司資產豐厚。最正係位於荃灣嘅安全貨倉，十幾年前本來話向城規會改為住宅，但董事局忽然褪軚；咁筍嘅建議都唔做，梗有阻力啦。剛過身嘅主席、年屆九十五的呂辛本來同個仔呂自龍（年屆六十三）拍住上坐喺董事局，後來細仔呂榮義加入集團任經理，論年紀，阿哥呂自龍大細佬廿幾年，生得出佢喎，細佬入局，阿哥亦因病退任董事；今年四十歲嘅呂榮義會計師出身，數口精，照計唔會睇唔到公司資產同股價大折讓；董事局無晒雜音，做嘢應該暢順啲，有小股東揸住安全貨倉多年，講到明同主席鬥長命；家陣卒之等到了，相信股價有所發圍。
金牙大狀講嘢
和稀泥闖禍
一葉知秋。先前我哋憑中大嘅英文水平，判定呢間大學江河日下。果然，佢哋深圳研究院爆出「穿櫃桶底」、為人要脅嘅醜聞。沈祖堯為此辯護，話冇就此報公安，皆因唔熟悉上邊情況云云。然而出事唔報警，沈校長早有前科。
冇耐前，中大發生咗單刑事毀壞案。事緣八大學院連同學生會同意加宿費，但有個別學生唔順超，非但反對大學上下嘅集體決定，更衝擊校長室、打爛保安監察系統。結果？沈校長罔顧大學最高當局加宿費嘅決定，反而以和為貴，冇報警追究責任。摸清校長之底細，難怪深圳有人「穿櫃桶底」亦冇有怕矣。
校長處事唔講原則，萬一出事亦和稀泥、努力冚實，咁啲人有乜辦法唔膽生毛呢。做好人容易，但姑息養奸，到有一日紙包不住火，揚晒出嚟啦，但一切為時已晚。睇怕深圳都只係個開頭而已。
中環人語迷你版
“香港冇以前咁受歡迎，一鋪清袋”
估中邊個中環人講呢句說話，送你 plantronics Voyager Legend Signature Black藍牙耳機一個
有意參加者，請於四月二十九日（星期三）下午一時後，將答案、姓名及聯絡電話電郵至centralman@nextmedia.com
小宗只接受電郵，郵寄免問。
本刊員工及直系親屬不得參加。
為求公平及杜絕偷步搶答起見，請於每個星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於下期本欄揭曉。
廣告時間
你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！
爆料熱線/whatsapp:6829 5929
|
鍾意就快D Share啦！
|
|
|
