周顯聲稱最近和拍檔炒股贏了幾百萬，便投資搞報紙，並用李嘉誠比喻自己，認為這盤生意應該賺硬錢。
財經坦白講
賣股套現搞報紙 周顯
每逢港股大牛市，都會有人走出來辦財經報。今次的老闆，是周顯。周顯，作家，曾寫過武俠小說《碳六十之劍》，被倪匡盛讚，現為多間傳媒機構的專欄作家，專講股票及財經界秘聞，他出版的《炒股密碼》由○七年至今不斷再版。擅長吹水搵老闆的他，最近聯同三個後生仔創立報刊《六合投資王》，本週四面世，以六合彩、馬經及炒股貼士為主，在港股大時代中分一杯羮。
最近我同幾個後生仔，黃敬凱、梅偉琛同史丹利，炒股賺咗幾百萬，於是同幾個股東夾份一千萬，諗住搞一份報紙《六合投資王》，六合即係東南西北上下加埋。為咗贏人哋，份報紙除咗六合彩，仲要有馬經、股票貼士、政治社論同副刊。你話我哋同主流報紙或者六合彩報有咩唔同？我哋係走「賭」路線，好多六合彩報都會走私返大陸，但我哋絕對唔會返大陸，因為會講政治，根本返唔到。你話我係黃絲帶定藍絲帶？我覺得無論係左中右，我哋都以香港人利益行先，即係——講錢。
幾時收皮
個個話要搞網媒，做傳統嘅傳媒冇得撈。其實做傳統報紙係有錢賺嘅，你話有邊間網媒有錢賺？冇錯，初初搞份報紙係難啲賺錢，而且我哋搵咗好多「猛人」寫稿，人工高過市價兩成，總成本貴過一般六合彩報五倍，但你問我一千萬可以燒幾耐？我都唔知點答你。我覺得你個問題有啲 insult，不如你問吓李嘉誠，如果長江實業一間樓都賣唔出，可以做幾耐？你咁問就好似問我：「幾耐執笠？你幾時收皮呀？」出嚟搞盤生意應該 positive啲，就算燒晒我哋贏返嚟嘅幾百萬，我都唔會在乎。
不過你要問，我可以講一千萬能夠燒嘅時間係以年計。雖然我諗住做日報，但保守啲一星期出住三日先，用兩張紙做四版，遲啲穩定咗客路，咪出三張、四張紙，變埋做日報囉，而家已經搵到好多廣告啦，不過因為太多專欄作家，根本出唔晒啲稿，所以焗住落兩個細廣告。
一日一隻貼士
我啱啱請咗前校對老師孔先生，佢會負責做編輯同校對，計埋我，其他全部係後生仔，咁先貼市。你可以話睇《經濟日報》、《信報》嘅人好有錢，但未必捨得使錢，但睇六合彩、馬經，即係我哋嘅客，係視錢財如糞土嘅人，點會慳嗰七蚊呢？報紙檔而家幾百蚊一份嘅貼士，都仲有人買緊，咁你話有冇市場？其實我已計晒數，初期會印一萬份，點解我咁老定？因為半年前，有一個人自己搞咗份六合彩報，銷量有四千份，我而家全職員工有五位，你估賣得多唔多過佢？
我以前喺一份細報寫社論同專欄，佢哋馬經版好受歡迎，有讀者同我講，就係貪份報紙資料夠少！人哋啲馬經每場貼幾隻馬，即係大包圍啦，你講晒我就每場貼一隻。寫股票都係一樣，有人同我講唔好寫垃圾股俾啲讀者，要推介藍籌股。我話你都傻嘅！啲讀者炒藍籌，唔使日日睇專欄啦，淨係睇財經新聞咪得囉！其他報紙，有三十個專欄，每個專欄貼一兩隻股票，即係你每日要買五十隻股票呀？佢有冇咁多資金呢？點樣吸引佢每日要睇你份報紙，就係貼一隻股票俾佢當日炒。揀股票就好似跑馬咁，一隻九十分，一隻八十分，一隻七十分，我會貼隻九十分，雖然可能八十分贏，但起碼跑前揀九十分贏嘅機會大啲。
搵白姐姐代言
我辦報觀念係，只要講最精嘅，得就得，唔得就唔得。白姐姐有抽獎運，喺六合彩界好出名，我搵咗佢做代言人，每期揀六個冧巴俾大家，你信佢就買我份報紙啦。我兩個月前構思，有朋友支持都有朋友反對，佢哋話邊會有人用七蚊買。喂，「小炒王」梁心欣，舊年十二月中搞雜誌《港股策略王》，初初賣十八蚊，之後減到八蚊，而家咪又加價到十二蚊。所以我未驚過，好多投資者想入股，但唔係有錢就得，你本身盤生意同人脈，係可以幫到報紙落到廣告先有作用。我唔想你一邊揼錢落嚟，一邊又想攞話事權，除非你話投資一億啦吓！
|
鍾意就快D Share啦！
|
|
|
