林祖輝指創業雖然忙碌，但由於時間彈性，故有更多時間可以陪伴仔女，有時落鋪，也會帶老婆姚嘉妮及一對仔女同行。
壹盤生意
放低身段 藝人轉型賣潮牌
你以為藝人做生意，用知名度打響頭炮，傳媒爭相採訪，最後一定名利雙收？曾做亞視《今日睇真 D》主持的林祖輝，卻說這個身份：「其實仲衰！」
前年他和太太、現客串《愛•回家》的姚嘉妮，經營童裝生意，代理 Levi's、 Air Jordan等運動牌子的童裝衫，於香港商場發售。向美國代理商申請香港代理權，足足花了一年，最後寫了一百份建議書才成功。租鋪呢？兩公婆一同揀鋪，人家見你是藝人，租金更「大咬」。
藝人身份又如何？零售業界面對的「責貨」問題，林祖輝一樣要諗計面對。
上月林祖輝的童裝店 Rookie，開賣「潮鞋」 Air Jordan 11童裝版，每對售價六百多元，依然吸引大批市民排隊，最早的顧客凌晨二時已經到達。「嗰位係十零歲妹妹仔嚟，見佢排咗咁耐，我都送咗啲小禮物俾佢！」林祖輝稱早在半年前，已預訂數十雙「潮鞋」：「我哋係向總公司直接拎貨，所以數量比較多，賣行貨又唔使驚係假。好多人買完鞋又會買埋其他衫褲，單日已經做咗六位數字生意！」在旁人眼中，藝人獲得大品牌青睞，看似是理所當然的事，但林祖輝說完全無着數：「美國嗰邊都唔知我哋係乜誰！」
一百份 proposal
在亞視十多年，去過有線電視，半紅不黑，林祖輝於是由幕前走到幕後，曾在無綫藝員科擔任經理，後來有朋友介紹他到北京非凡中國（ 8032）任職，專責管理國家運動員的廣告，他即決定離開電視圈：「我好鍾意打籃球，聽到有關國家運動員嘅工作，就好有興趣。」離開香港，一去便兩年，太太姚嘉妮說：「大女成日見唔到爹哋，有次我哋準備去 party，個女知道爹哋又去唔到好唔開心，祖輝自己都喺房偷偷地喊。」老婆三年前有了第二胎，林祖輝為了有更多時間陪家人，決定回港「搵食」，他說：「返到嚟見老婆買衫俾仔女，款式大多係『公主裝』，原來香港無乜運動牌子童裝。」
他在國內工作期間，認識在行內打滾多年的 partner，從他口中知道美國有間專代理運動品牌 Converse、 Air Jordan及 Levi's童裝的公司 Haddad，於是冒昧找對方批貨，他寫下一份「滿腹大計」的建議書，怎料被對方認為不切實際，「我見沙田新城市多小朋友行，就寫到要喺嗰度開過千呎嘅鋪，每年做好多錢生意，美國嗰邊一睇就知唔得。」被打回頭後，他才細心想，「係喎，一年要做三千萬生意先維到本，以一件衫幾百蚊計梗係無可能！」林祖輝於是熟讀上市公司年報，「睇吓人哋做啲咩研究，原來要知道香港每年出生人口，小學每級有幾多學生，男仔多定女仔多，咩都有得研究。有資料仲要分析，點樣可以成功吸引小朋友嘅爹哋媽咪來買嘢。」花了一年時間，建議書不斷被彈回頭，前前後後修改近百次，最後才獲得 Haddad垂青。成功拿得代理權，他還主動設計了一對用 Levi's布料造的熊仔，出擊打好關係，「美國嗰邊好鍾意， Levi's仲問我哋攞熊仔在當地出 show。」
改款為品牌增值
生意的另一個難題是去貨，美國代理要求林祖輝一年要向他們拿最少數百萬元的貨，而且要半年前預先訂貨，一經落單更不得修改，因此入貨眼光要十分準繩，他唯有請忙於拍劇的老婆幫手，他說：「平時仔女衫都係佢揀，太太試過揀中一款印花 T-shirt，印咗工人褲嘅圖案上去，佢第一眼就話好靚，結果成個系列賣咗幾百件。」姚嘉妮說：「 Levi's、 Converse喺美國唔算係貴價牌子，嚟到亞洲會賣貴咗。」為提升「性價比」，她會向該牌子的設計師反映意見，「同一個花紋，可以要求由印花改成縫製，睇落去會高級少少，諗埋辦法幫牌子『增值』。」
不過，香港賣運動品牌，最煩是水貨、假貨一街都係，價錢平款式多。記者於淘寶發現不少商戶有售 NIKE等童裝，價錢與 Rookie相若；也有網上商店做代購，對林祖輝的生意造成直接威脅。他亦處於「頭痕」狀態，記者見其貨倉存貨不少：「我哋一般預賣到八至九成，其餘一至兩成賣唔出嘅話，會在下一個季度之前審視番。如果係大路款同埋齊碼，就繼續用正價賣，其餘嘅七折出貨。」他指假貨問題，現正尋求法律解決，「試過網上有間直情叫 Rookie，有唔少衫外形做到好真，但係質素比較差。有客嚟問我點解啲衫質地咁差，睇番先知原來買咗假貨，對我哋品牌形象都有影響。」
明星揀鋪無着數
以前做藝人，林祖輝甚少行商場，但為搵鋪，要逐個商場行。他說：「假期前後人流分別、車位多唔多、有無兒童洗手間、 food court啲嘢食啱唔啱小朋友，都要睇清楚，真係每間商場企足幾日，數吓每個鐘有幾多架 BB車，如果一個鐘有三十架先合乎我哋要求。」最終他揀選了尖沙咀 iSQUARE及 MegaBox等非一線商場開鋪。不過他亦曾險當「羊牯」，「曾經同老婆一齊睇鋪，有啲商場見我哋出開鏡，就覺得我哋好有錢，開到個價好高。」幸好，他有做過功課，知道市價。現時為免麻煩，他找來同事出面代為洽談。
過往林祖輝走在前線，都有不少人在背後替他工作，讓他省卻不少麻煩。但現時他要親自兼「瞓身」工作，即使是遇到投訴，都親自接招，他說：「當聽意見。佢哋投訴得你，表示佢哋對公司仲有要求。有位客人覺得我哋服務唔夠好，我了解過都覺得有進步空間，最後我就送咗張 coupon俾佢下次嚟幫襯。」他說，早已放下身段，他一語中的說：「又唔係咩大明星！」對他來說，經營這盤生意，令他能夠做回一個稱職的爸爸，與一對仔女相處時間亦增加：「始終打工時間都有限制，而家幾時開工收工，自己都調校到。生意上咗軌道，可以再放多啲時間喺屋企。其實，同佢哋相處，了解到小朋友有咩諗法，對盤生意都有利㗎！」
開業資料（ 12/13）
租金：$250,000
裝修：$500,000
代理費及入貨：$900,000
雜費：$200,000
總投資：$1,850,000
MegaBox分店
*兩個月按金，一個月上期
營業資料（ 04/15）
營業額：$600,000
租金：$100,000
入貨：$200,000
人工：$70,000
雜費：$30,000
盈利：$200,000
＃ 2個全職， 2個兼職
尖沙咀 iSQUARE分店
一點意見
本刊找來前 Mirabell國際董事及副總經理吳民傑（ Lawrence），對 Thomas的生意提出意見：
留意入貨準則
林祖輝每日都會查看經營數據，如發現較受歡迎的貨品，就會向代理商補貨，但就嘗試過補回的貨品銷量下降，令他覺得顧客的喜好難以捉摸。
Lawrence：「不要只參考自己店的銷售數據來補貨，要多參考不同童裝品牌的銷情，如一開始較不好賣的貨品到季末銷售可能會提升，到時便會錯失營銷機會。」
建立 VIP資料庫
林祖輝的店設有顧客 VIP服務，購物滿一定消費就有優惠， VIP每年都會自動續期。
Lawrence：「只局限於享有折扣優惠並不夠，現時資訊發達，每位客人都想享有獨特的服務，可建立 VIP資料庫，了解每位客人的購物傾向，再以短訊等方式向客人提供感興趣的廣告，鞏固客人對品牌的忠誠。」
|
鍾意就快D Share啦！
|
|
|
