14K華喜接受專訪，雖年屆六十五，仍一臉霸氣。
人在江湖
14K最惡大佬：「打過先講！」
現今黑社會，分為新舊兩派，新一派個個爭住做黑色梁粉，期望從政治上撈油水，有錢便有地位。
舊一派仍然信奉拳頭行先，夠惡就可以紮職，江湖響朵打咗先講，手起刀落乃家常便飯。
在七、八十年代，江湖聞 14K大佬「華喜」二字色變，只因他夠惡夠瘋癲，對任何大佬都冇面俾，就算是由同門盤據，有「惡人谷」之稱的深水埗九江街，華喜都夠膽踩入，而𡃁仔一輩，為了上位，爭住自稱「我係華喜嘅人」。
昔日，華喜與不少幫派結下仇怨，只不過江湖事江湖了，舊派的人如何橫蠻，性格依舊豪爽，大家都識英雄重英雄。
本月初，華喜擺下六十五歲壽宴，江湖猛人雲集，三杯落肚，大家攬頭攬頸，幾十年腥風血雨，都付笑談中。
反黑監視
江湖猛人向來在五星級酒店設宴，凸顯身份，唯獨 14K「最惡大佬」華喜口味與別不同，他在根據地石硤尾設宴，附近公共屋邨林立，壽宴的地點是「多彩皇宮酒樓」，邨內街坊喜愛幫襯酒樓，早上歎一盅兩件，晚上斬料加餸。
壽宴在本月五號舉行，當晚大批黑幫分子集結酒樓，警方為表示能夠控制場面，西九反黑組總督察黃志成帶領整隊探員監視，場外亦有俗稱「狗仔隊」的刑事情報科探員駐守。
黑白兩道在狹小的南昌街相逢，氣氛緊張，警方當晚緊盯黑幫頭目的一舉一動，原來為部署翌日的拘捕行動， O記搗破販運人蛇集團，拘捕全港九 14K多名骨幹成員。
當晚不少石硤尾街坊看見如此大陣仗，阿伯竊竊私語：「係唔係拍緊電影，個鏡頭喺邊？」
惡形惡相
全名吳華喜的華喜，六十五歲生日，筵開超過六十席，進入會場，隨即傳來經典金曲，包括徐小鳳《喜氣洋洋》、劉德華的《鴿子情緣》，場內盡是懷舊擺設，恍如重回八十年代的中式飲宴。
人稱「佛爺」的華喜，身穿黃色恤衫，右手臂刻有紋身兇神惡煞，忙於在場內招呼來賓，「喜哥，精神！祝你福如東海！」華喜笑笑口接收對方的人情。
記者上前邀約訪問，他聲大夾惡地說：「喂！你大聲啲！」繼而碌大雙眼掘着記者。記者不禁打了個突，華喜才笑笑口說：「呢度好嘈，坐低飲杯茶慢慢傾。」
惹火先上位
記者唔識死直接問：「點解江湖個個都話你惡死？你脾氣係咪好差？」華喜打個突，亦快人快語：「喺嗰個年代，你唔惹火，根本冇人會認識你，好難搵飯食㗎。」江湖生存之道，猶如《古惑仔》電影情節，一定要夠惹火夠出位。
「講真，我唔會主動惹人，但你惹着我，打過先講囉！」華喜呷一口茶，眉宇之間惡氣再現。
雖然曾經拳霸江湖，但華喜強調絕不沾染毒品和馬檻，他認為自己是講原則：「我點樣惹火都好，你睇吓我以前啲記錄，我唔賣白粉，我又唔搞黃色事業，我靠睇賭檔，仲有夜總會做『保安』。」有傳油尖旺馬仔跟他搵食的人過千。
但在江湖人士的角度，華喜是「死咕咕」不懂變通：「佢飲酒使好多錢，做得大哥又要充撐場面，斟茶灌水在所難免，所以華喜使錢好似倒水咁樣，佢又唔識開拓瓣數搵錢，仲邊度有黑社會單靠霸地盤、收保護費咁落後？」
越南撈賭
現實終歸現實，新一派的黑社會搵錢至上，仲點會攞條命同你搏，華喜似乎也明白單靠武力，難以搵食。
華喜說：「睇你有冇錢啫，而家『最大』係李嘉誠，你講咩（拳頭）都冇用。」
近年澳門疊碼仔飽和，華喜說澳門賭業難有起色：「大陸官員，甚至係有身份的人，都唔敢去澳門賭啦，驚中央會調查他們。」
有傳華喜轉戰越南 MGM賭廳：「我啲老友喺越南開賭廳，好多台灣、大陸朋友都過去玩，咁我就過去賺佣金。」他指賭場位於越南頭頓，賭場由拉斯維加斯集團管理，華喜幽自己一默：「外資集團管理，唔係靠惡，靠黑社會背景就入到去。
「我而家成日要飛去越南，好少喺香港，都係得閒先返嚟同班老友飲酒。」華喜早已志不在香港。
不打不相識
壽宴當晚各大單位的猛人也俾面到賀，包括同門 14K鬍鬚勇和立章、新義安「總管」林江、勝和老叔父「大飛」，曾經叱咤澳門的「摩頂平」，也專程由澳門過大海飲喜酒。
立章與華喜不斷碰杯，整杯白蘭地一啖落肚，依然面不改容，但原來兩人曾因爭地盤而大打出手。
據 14K資深成員根叔透露：「七十年代， 14K『孝』字堆最有名，『九江街話事人』立章同劉安屬於孝字，當時根本無人夠膽行入九江街『惡人谷』，估唔到華喜嫌石硤尾細，要擴大版圖，想去九江街插旗，真係太歲頭上動土！
「華喜無非都係顯示自己嘅地位，佢同立章、劉安多次講數，對方見華喜又惡又癲，都係惹不過，於是俾華喜在九江街插旗。」
如今「仇人」見面，沒有當年火爆場面，華喜和立章反而是江湖豪邁擁抱，其他人都說是七、八十年代老江湖寫照。
勝和元老開拖
八十年代中期，華喜個名在江湖上已是響噹噹，翻查一九八六年的法庭新聞，牽涉一單黑社會的案件，其中有 14K背景的被告供稱，只要「撻朵」說：「我是華喜的人，警探便會放人。」
隨着華喜的野心愈來愈大，他拖馬殺出油尖旺，負責多間夜總會睇場工作，包括最大間的大富豪。據 14K資深成員根叔說：「華喜脾氣臭，有一次佢喺有份睇場嘅東方皇宮夜總會飲醉酒，誤傷勝和某元老太太。」
雙方初則口角，繼而動武，勝和元老隨即動員過百人包圍華喜，拳頭夠硬淨的華喜衝出重圍，才能化險為夷。該名勝和元老，以及他的兄弟和徒孫，多年來都沒有出席華喜的壽宴。
問及華喜當年的「戰績」，華喜卻不願多談：「我後生嗰陣比較『頑皮』，我老喇，而家嘅世界，留番俾後生喇。」只見他一臉沉醉在懷舊金曲，與一眾江湖老叔父劈酒猜枚，江湖的事，今晚統統拋諸腦後。
再惡的人也會老去，又有新的惡人上位，這就是江湖。
|
鍾意就快D Share啦！
|
|
|
