熱爆娛樂: 3,500萬買相連獨立屋　佘詩曼資產成功破億 [壹週刊

2015年6月18日星期四

3,500萬買相連獨立屋　佘詩曼資產成功破億 [壹週刊 - 1319] 佘詩曼,M1,

手揸過億物業，難怪早前阿佘辭演新劇，唔想再捱。

探熱針

3,500萬買相連獨立屋　佘詩曼資產成功破億

賺完人仔再高價返娘家的佘詩曼，去年憑回巢劇《使徒行者》成雙料視后，加上電影一部接一部，獎品獎金，全擸！進賬多，換磚頭，出手鋪鋪過千萬。今年初，阿佘斥資三千五百多萬購入西貢相連獨立屋；手揸五個物業的她，資產已累計過億。

買樓如辦年貨

屬於穩陣派的佘詩曼，過去十年因為買磚頭，將身家愈滾愈大。一○年開始返內地賺人仔後，戶口「水浸」，彈藥足夠的她，出手吓吓過千萬，包括現居畢架山帝景峰，是一一年以一千八百多萬購入。

之後，阿佘就好似辦年貨一樣，幾乎每年都有郁手。據地產界消息指，阿佘於一二及一三年間，分別以三千多萬買入跑馬地紀雲峰一個千呎單位，以及幾近八百萬的紅磡昇御門，截至去年，手持的物業賬面值接近七千萬。

侍母至孝的阿佘，送給母親佘陳鳳蓮的大屋值一千七百四十八萬。

早前有傳阿佘與好姊妹周家怡為爭仔（新加坡富豪）而反目，但二人立即把飯局相放上網打破謠言。

大台半億留人

億元關口在望，去年憑《使徒行者》中「釘姐」一角，成雙料視后的阿佘，目標明確，賺幾多錢，換幾多磚頭。今年初，她一口氣以三千五百多萬，買下屬於西貢優質地段之一，位於南山的兩幢相連獨立屋，一間送阿媽，一間獎勵自己。

「佢哋幾姊弟係媽咪獨力養大，所以阿佘好孝順媽媽，揀相連獨立屋除咗方便自己偶然可以去住吓，投資價值亦會高啲，所以阿佘其實好叻。」知情者說。

獨立屋是新落成，位置雖然較偏僻，但自成一國，重點是背山面海好風水，地下的花園面積有近二千呎；相連獨立屋現正裝修中，預計年底可以入伙。

資產逾億，阿佘成功達陣，全因財來有方。有指今年底約滿無綫的她，早已被明年四月開台的港娛睇上眼，不斷有所動作，希望從無綫手中撬走這個一姐，大台不容有失，不惜一擲半億成功留人。

今年二月，她擲三千多萬買下的西貢南山相連獨立屋，現正趕工裝修。

屋內花園超大，近二千呎。

南山新屋位置雖然偏僻，但露台睇到成個西貢海景。

有租收冇壓力

雖然愈來愈有，但阿佘收埋富貴，從不炫富。

「阿佘同好多圈中人一樣，買嘢唔一定用自己名。好似之前買跑馬地同紅磡嗰兩個單位，都係用秘書公司 hold，所以冇乜人知。而家跑馬地個單位收緊八萬租，所以阿佘冇乜供樓壓力；之前佢推咗《呂后傳》，都係因為要戴住十幾磅古裝頭套，隨時會令佢頸椎舊患復發，阿佘話錢賺唔晒，無謂搵命搏。」知情者說。

有籌碼就有數講，揸住過億磚頭的阿佘，自然健康優先。