事隔兩年，品牌終於搵到 Sammi做運動服代言，銷量隨時節節上升。
探熱針
等咗三年 Adidas將 Sammi據為己有
多年來，鄭秀文 keep住「八公里小姐」（日跑八公里）的習慣，形象健康！運動品牌 Adidas早前搵 Sammi拍平面廣告試水溫，見反應理想，於是玩大佢！特別抽出一個從未用過任何代言人的運動服系列，由 Sammi做生招牌，正式將天后收歸旗下。
據為己有
娛圈中跑得嘅，除咗肯亞徐（徐濠縈），還有 Sammi鄭秀文；因為有日跑八公里習慣，而被稱「八公里小姐」，更成為跑鞋的代言人。
兩年前， Sammi同跑鞋合約完結，經過半年過冷河後， Adidas敲門，並先後兩次合作平面廣告，由於反應出乎意料的好，加上 Sammi不時將著住品牌服裝相片上載社交網站，令雙方關係更上一層樓。
去年，品牌贊助「 Touch Mi鄭秀文巡迴演唱會」所有運動服後，便決定要設法將天后「據為己有」。
「之前幾次同 Sammi合作都好愉快，個 brand都知如果唔 hold實 Sammi，隨時會俾競爭對手撬走，但唔同 line嘅代言都已經續新約，所以就決定搵一條從來冇搵過代言嘅 line俾 Sammi做。」一名廣告中介公司職員透露。
據了解，品牌考慮到 Sammi有大批 OL粉絲，於是特別抽出一條主打 OL市場的運動服，作為 Sammi的代言系列。
貪新鮮
上月， Sammi做完好老婆，陪許志安完成「 Come On演唱會 2015」後，隨即開行 turbo投入工作，連跑個唱巡迴澳門及雲頂兩站，緊接埋位內地電影《婚前合約》。
昔日對手離不開劉華、古仔同青雲的 Sammi，近年積極換拍檔求突破，繼張家輝同 Sam哥吳鎮宇後，新片同年紀細一截的台灣男星張孝全合作，夠晒新鮮！
|
鍾意就快D Share啦！
|
|
|
