真人騷
25歲改 5次名 做歌手先斬後奏 龐景峰：無論叫咩，我就係我！
家家有本難念的經，而龐景峰這一本，似乎特別難念：
母親郭秀雲在他兩歲時和父親錢小豪離婚，後來改嫁給姓龐的繼父。郭秀雲一直與前夫關係普普通通，錢小豪亦一直諸多投訴想見兒子受阻撓……段關係到底有幾普通？你看 25歲人的龐景峰出世至今改名又改姓足足五次，自然明白。
「有五次咁多咩？我印象中四次咋嘛！出世唔記得係浩然定梓宏，跟住四歲改叫麒夫，十四歲要改姓龐，咁你改得姓就要改埋名，跟住龐景峰呢個名就用到𠵱家……」
點解出世叫浩然定梓宏可以連自己都唔記得？邊個話改咗姓就一定要改埋名？答案你估到，龐景峰話：「屋企人選擇，又唔係我選擇，我都冇得揀，只可以聽話……我冇所謂，一個名都係一個身份啫，我始終係我，做緊我自己想做嘅嘢。」
任由大人擺佈改名五次，係人都懷疑，這個男孩子做的事到底有幾多成係自己想？繼續聽他講他的出道路，我開始改觀：「我喺 LA打波識咗個監製，試鏡成功後日頭做銀行、夜晚去受訓，大半年轉 full time trainee至同屋企人講。佢哋打去香港、台灣、大陸，想睇下邊個簽咗我，冇人估到，原來係韓國公司……」
這就是我的重點，這個星二代有點兒不一樣，倒是那些第一時間想打去關照聲的上一代，驚喜欠奉。
先斬後奏，因為唔想懶叻。
點解會去咗韓國受訓？
真係冇諗過……細個就算打算過入娛樂圈，都唔會諗住喺音樂開始……我喺 LA嗰邊讀經濟，你知， LA嗰邊住咗好多韓國人。我同個韓國朋友打籃球識咗個唱片監製，大家打咗幾個星期波，佢話嚟緊有個試鏡，叫我去試下。結果就喺三十幾人入面揀咗三個人，開始 part-time訓練。
件事持續咗幾耐？
一直到我大學畢業入咗銀行做嘢，日頭返工，夜晚繼續培訓，差唔多三個月後，我同屋企人講唔想再做銀行，佢哋問唔做銀行可以做乜，我至話俾佢哋聽，一直以嚟放工我都有做緊呢啲嘢……屋企人好擔心㗎，打咗去台灣、香港、內地行內人，想知邊個照住我……冇人答到佢，冇人估到原來係韓國。
由細到大對慣鏡頭，有冇諗過，自己走唔甩都會做呢行？
又唔係喎，我鍾意車，細個諗過揸的士、揸飛機，或者做醫生，到讀大學讀經濟，正路啲就梗係做銀行啦。但係每日朝八晚五着西裝，真係好期待快啲收工去 studio，做銀行係穩定，但趁後生要搏，時間過咗買都買唔番。
點解受訓咗大半年至同屋企人講？你份人鍾意先斬後奏？
我唱歌唔係叻，冇諗過真係會成事，我個人係咁，十劃都未有一撇，未有把握就唔會講住，唔想懶係叻咁。屋企人全部做戲，武打底，我都係兩歲溜冰、六歲學芭蕾舞，冇人諗過我會喺音樂出道先。
到咗去韓國全職受訓，件事係唔係真係如外界所講咁艱苦？
我又 ok……我兩年前個女朋友係韓國人，已經學咗啲韓文同韓國文化，食飯口味都似，喺 LA好多人以為我係韓國人。受訓，我係肥仔一個，我每日七點起身，做兩個鐘頭運動，唱歌跳舞六個鐘，然後學韓文， ok喎我又覺得。
減咗幾多公斤？
74公斤減到𠵱家 61。
咁你咪唱得好好？咁肥都揀咗你？
好多韓星以前都係肥仔嚟好多韓星都唔係做手術變靚仔，都係減肥咋！
如是者年幾，有冇人工？
冇㗎！除咗住有公司提供，食同用都要自己俾。我開頭日頭仲有份銀行工頂住，儲蓄都叫捱過咗去韓國頭幾個月，之後都要同屋企人出聲：「可唔可以俾啲零用錢我？」𠵱家當然又係自己賺自己使。
當時 24歲大個仔仲開口問屋企人攞錢受訓，佢哋有冇懷疑你？
冇，佢哋好支持我。銀行隨時都可以做得番，三十、四十歲返去都仲得，但入行呢個機會唔係吖嘛，尤其係歌星，有得做就要盡力做。
數臭人，最終樣衰嘅係自己。
練咗咁耐終於正式出歌入行，有冇雄心壯志要幹一番事業俾屋企人睇？
唔係喎，我仲當自己係 trainee，仲想 keep住自己 trainee呢個心態，我覺得呢行要學一世，冇得停，唔好覺得自己好叻。我覺得娛樂圈，越係捱得耐嗰啲人，越係一開始冇人睇好嗰啲人，佢哋特別謙虛、特別肯學，越係覺得自己唔偉大嗰啲人，越係會紅。
屋企人經驗豐富，有冇心得、忠告俾你？
唔使佢哋講，自己由細到大好嘅、唔好嘅都見過，最樣衰都見過……
有咩係最樣衰？
呢啲唔好講喇！好多人背景再好，自己玩死自己都睇唔少，睇得呢啲多，唔使喺自己身上發生，都係一種教訓。
對慣鏡頭都要入行，你覺得私隱俾人當茶餘飯後話題都值？
你都話我由細到大對住鏡頭，都慣咗……其實行得正企得正又怕咩俾人影？我一支煙都未食過，唔食煙就更加唔會掂毒，又唔蒲，做自己應該做嘅嘢，朋友行近啲都預咗記者會諗多咗，咁又有咩好怕？
我試過做你爸爸錢小豪訪問，佢唔只喺一個訪問講過，你媽媽會喺你面前話佢唔好？
嗯……你知啲細路仔好難記到嘢㗎啦，我冇呢啲印象……真係記唔到。
我哋嘅感覺你夾喺兩個中間，好似磨心？
佢哋嘅關係係佢哋嘅事，據我所知，兩邊冇嗌交，我同兩邊都傾好多偈。我大個仔，見媽咪都見得少，爹哋更加成日唔喺香港……
媽媽有冇唔畀你見爸爸？
梗係冇！我想見隨時可以揸車去見佢，爺爺嫲嫲我都成日搵，上個星期我都想搵叔叔（錢嘉樂）㗎，不過打俾佢，佢喺三藩市咋嘛！第時我結婚，當然唔想行到呢一步，但萬一發生，我都一定唔會數臭對方，我成日覺得數臭人，會令自己樣衰多啲！
你最出名係改過五次名（浩然、梓宏、麒夫、景峰， 14歲由姓錢變姓龐），每次改名，有冇問過你意見？
我都唔記得自己有改五次名，有咩？四次咋喎好似！由頭數喇，出世時媽咪未醒、爸爸喺第二度拍緊戲，都要改個名登記先㗎，所以爺爺幫我改咗唔知浩然定梓宏（其實係浩然），當時係爺爺攞個名頂住先，之後爹哋媽咪返嚟喇、得閒喇，至搵個風水師傅幫我改個真名……
改咗咩名？
又係梓宏定浩然其中一個囉（其實係梓宏……），跟住 14歲去英國就係改姓，點解改我唔知，但屋企人決定，我都冇權，都要聽話㗎！改得姓就一定要改名㗎
邊個話改姓就一定要改名？
唔知啦，總之唔係龐錢景峰，係 14歲到𠵱家都係叫龐景峰。
有冇問過媽咪點解要改姓？
呢啲費事問喇，大人決定，我自己做自己嘢。
拖手件事有啲怪囉！
你鍾唔鍾意成日改名，有冇帶嚟唔方便？
景峰嘅名係風水師傅俾我哋，我自己有份做決定，係自己揀。冇乜嘢吖，三、四歲改名叫麒夫，記憶最多，之後再改都冇其他選擇，我十四歲，可以做到啲咩呢？佢哋有選擇，佢哋話改名方便 paper work，我邊有選擇？我覺得冇所謂，改咗個名啫，我都係我，做緊嘅嘢都係自己鍾意，名係一個身份啫。
你嘅愛情觀有冇受父母離婚影響？會唔會有陰影？
唔會喎，我第時，點都會想個家整整齊齊……都係唔好咁早講，我今年 25歲咋！人哋離婚係人哋問題，我就係我，我有問題可以自己改正。
拍過幾多次拖？
我拍過三次拖，三次都係長拖，喺度要澄清下，我三個女朋友都係圈外人，從來冇同過𡃁模拍拖！第一個三年，之後都有年幾兩年，全部都唔短。我自己唔知自己鍾意一個 type，但係朋友睇得出我三個女朋友都係濃眉大眼，好多人問我鍾意咩女仔，最緊要接受到我做呢行，同埋性格保守啲，唔好出街話要拖手……
拖手都唔得？你怕俾人知？
唔係喎，我拍拖唔怕俾人知，但唔使下下咁揚啫，我覺得出街太親密有啲怪囉！
拖手咋喎！拖手有幾親密？
唔使下下拖到實嘅，我份人不嬲都係咁，我覺得出嚟太揚會騷擾人哋。但係拍拖我好專一，朋友話我為咗一個人，咩都可以做得出。
拍拖最瘋狂行徑係？
咁又唔係瘋狂，正常男人做嘅嘢，為女仔喊係正常，互相傷害都係正常，總之我唔係花心嗰啲人。
但係人哋對你花心？
呢啲唔好講喇，人哋啲衰嘢唔好講，講俾你聽我有幾傷，咪即係話俾你聽佢有幾衰？過咗去就算喇，唔想再提。我做咗最壞打算，第時斷估自己都係俾個老婆同個女食住嗰啲人……
利大於弊
我第一次見龐景峰，不過也像千千萬萬個香港市民一樣，睇住龐景峰大。
錢家（龐家）的人我一個也不熟，不過錢家（龐家）的故事我倒是很熟，畢竟新聞讀了不少，就似隔籬屋阿邊個邊嗰個仔，改咗五次名改埋姓都冇知會老竇，個仔仲唔係磨心？
龐景峰話：「都慣咗，自己醒目，就入邊行都一樣，始終星二代利大於弊。」咁又係真，至少新入行就能做專訪的機會不是人人有，就算自己能說的不多，爸媽的恩恩怨怨還是不少人有興趣。
撰文：朱小博
攝影：范仲良
化妝： Mak Tung
髮型： Echo Wan
場地提供：意菲咖啡室
|
鍾意就快D Share啦！
|
|
|