吳綺莉之女卓林日前接受周刊訪問，分享母女之間同成長經歷，自揭在上海校園遭同學欺凌，以及從前同媽媽之間有豐富物質卻缺乏心靈溝通等。吳綺莉今日喺灣仔dbc電台開咪時，話自己冇睇訪問，但就承認小龍女讀書時，的確有俾同學蝦。
吳綺莉話：「曾經同同學有啲嘢，但唔係好大鑊，發生喺上海讀書嗰陣，係外籍同學，個女日日返學，功課、書包、飯盒都唔見，作為媽咪要了解下，亦有同對方家長見面溝通，始終幾騷擾。」在周刊訪問中，吳綺莉憶述當時啲同學係將佢個女嘅物品塞晒落水箱後面，而嗰陣嘅卓林又唔識反抗，仲調番轉頭同媽媽講唔想傷害其他人感受，激到吳綺莉死死下。
阿女太細個唔識反抗，阿媽識。一次忍無可忍，同對方家長理論。學生係黑人，阿媽都生得好高大，但潮州人吳綺莉全無懼色。
依家卓林已經大個女，識得照顧同保護媽咪。佢受訪時指以前同媽媽關係較疏離。吳綺莉話：「因為佢唔鍾意講嘢，亦可能唔知報警會搞到要去差館，經歷件事大家對大家尊重咗，我亦會對阿囡尊重恭敬。」
不過卓林就覺得自己報警拉媽咪冇做錯，吳綺莉聽到後即大笑：「哈哈哈....我冇意見，最緊要向前望，唔好再發生。」吳綺莉覺得以前一直當囡囡BB咁湊，經過母女大吵一場醒覺自己經一事長一智，仍在學習做母親中，現時每日都會爭取時間同卓林傾偈。
至於卓林中性扮被質疑性取向，吳綺莉話：「我現時最緊要係同阿女溝通開心，其他唔諗太多，亦冇得控制，自己當然希望佢搵個好男仔結婚，有幸福家庭，我可以湊下孫啦，但控制唔到。」
另外，林曉峰今日接受吳綺莉節目訪問，原來二人相識17載，當年拍劇時吳綺莉飾演林曉峰家姐，但今日始知林曉峰年紀還大過吳綺莉。林曉峰近日登台搵錢，內地曾有不少真人騷誠邀一家出動拍攝，因時間就唔啱損失搵巨額人仔機會，林曉峰話：「等兩個小朋友讀完書回饋，依家我跑住數先。」
林曉峰同吳綺莉相識17載。 
吳綺莉現時每日都會爭取時間同卓林傾偈。