收入未穩定的 Tony，現時仍與父母同住，一放假就會同哥哥一家飲茶食飯，兩兄弟亦會傾通頂講心事，關係好密切！
真面目
唔靠關係 藝訓班出局入行做男模 王浩信細佬 Tony：阿哥叫我靠自己
入行 10年的王浩信，由歌手開始慢慢捱，到今日受大台力捧，做埋男一。
32歲終於捱出頭，原來王浩信有個細自己 7年、 25歲的細佬王瑋彤（ Tony），無論身高樣貌同把聲都同阿哥餅印一樣。有個男一做大佬，搞到原本在美國讀完 Business的 Tony都心郁郁入行，月前膽粗粗參加藝訓班，可惜第二輪面試被 foul出局，無緣同阿哥做同事。
同大佬感情深厚，成日一齊飲茶做 gym，不過王浩信唔想細佬靠關係入行，「阿哥好贊成我乜都試下，但叫我要靠自己，好似佢當年咁慢慢捱下！」
身高 6呎 2的王瑋彤（ Tony），外形跟王浩信有 9成相似，兩兄弟同樣由美國讀完大學回港，哥哥讀設計、細佬則讀商科。
珍姐都話似
畢業後回港試過做保險同銀行，不過性格外向的王瑋彤唔習慣朝 9晚 5刻板生活，見哥哥撈得掂，同家人商量後決定試一試。鍾意做戲的 Tony，上月到大台面試藝訓班，首輪已有多位高層在場做評審，當時戲劇製作總監兼王浩信伯樂曾勵珍，一見 Tony已經忍唔住話，「嘩，乜你咁似王浩信嘅！」可惜最後都過唔到 second-in，被 foul出局！好在 Tony生得高大有型，做唔成藝員，亦可以向男模發展。現時唔少大牌如 Lancôme、 Michael Kors亦有搵佢出騷。
大佬陪做 gym
大台係阿哥地頭都冇用， Tony話雖然大佬好支持佢入行，但就唔肯出面幫手拉關係，「我成日同哥哥傾偈，佢有同我講當年最霉時係點樣捱，可能佢都係一步一步捱上去嘅人，所以好想我靠自己努力同實力做到成績！」
唔打人情牌唔代表唔錫細佬， Tony話哥哥有介紹其他藝人朋友俾佢認識，「阿哥會帶我見下佢啲朋友，好似黃長興、袁偉豪等等，又會同我一齊做 gym練大隻。佢話做呢行最緊要係有禮貌、對人好，千祈唔好當其他人係敵人，同行唔一定如敵國！」睇王浩信咁多年都冇乜是非，就知佢冇老點細佬
採訪、撰文：娛樂組
攝影：范仲良
|
鍾意就快D Share啦！
|
|
|