【太陽報專訊】與洪永城戀情浮面的唐詩詠，最近卻與馬國明傳出「兄妹戀」，兩位「情敵」昨日在台慶劇記者會上首次碰面，不僅沒有芥蒂，反而好似糖黐豆搭晒膊頭，馬國明更笑言「贏硬」洪永城。
無綫昨日在將軍澳電視城舉行《TVB 48周年台慶劇記者會》，宣傳四大台慶劇《張保仔》、《無雙譜》、《東坡家事》及《梟雄》，有份出席的《張》劇演員洪永城（Tony）與唐詩詠的戀情近期出現暗湧，「第三者」竟然是唐詩詠的「哥哥」馬國明，因馬國明多次被拍得與她食飯，「兄妹戀」緋聞甚囂塵上。不過，兩位「情敵」昨日首度碰面，卻沒有尷尬，反而似糖黐豆，期間洪永城更主動搭實馬國明膊頭影相。其後，兩人影合照時便輪到馬國明搭着洪永城膊頭，看似十分老友。
搭晒膊頭影合照
馬國明受訪時被問到與洪永城碰面會否尷尬？他說：「冇尷尬！我仲同佢講笑，我哋《梟雄》一定贏佢《張保仔》囉！（有冇同洪永城解釋﹖）唔使解釋，大家喺呢個圈咁耐得啖笑喇！」這邊廂與唐詩詠仍傳緋聞，那邊廂馬國明又傳與黃心穎撻着，他笑說：「依家傳到我都唔知同邊個喇！本嚟今日係準備答同唐詩詠嘅嘢，點知嚟到變咗黃心穎，下星期都唔知變咗邊個！」洪永城則對「情敵」馬國明愛錫有加，不時黐到實，談及排位時他說：「有位咪企埋去囉！唔諗咁多，事前冇排過位，馬國明近期咁紅，梗係黐埋去叨吓光！（唔企黃心穎隔籬？）我鍾意馬國明多啲！」
岑麗香低V撐場
同場的陳展鵬昨日因要訓練而急急離去，事後接受電話訪問時表示今年絕大機會以《張》劇或《天眼》角逐視帝，並自言《天》劇中演反派是一路想演的角色，希望給觀眾訊息及新鮮感。提到合演《張》劇的洪永城睇好他以《天》劇角色入圍時，展鵬說：「我同Tony關係好密切，佢入嚟TVB同我合作最多，已經三套劇。」
記者會上，眾花旦中以岑麗香的Deep V造型最性感，她笑說：「少少啫！同平時啲Deep V係有啲分別。」提到主演的《無》劇一人分飾兩角，香香表示是自我挑戰：「一個可愛、一個奸！（有冇信心做視后？）我未到呢個Level，睇好《鬼同你OT》嘅田蕊妮同胡定欣。」
文：影視組
相關新聞
|
鍾意就快D Share啦！
|
|
|