【太陽報專訊】呂方在個唱上遭兩位天后級嘉賓輪流玩謝，先被汪明荃嘲笑是零肌肉「飯桶」，練得一舊豬腩肉「凸」襲紅館，其後再被徐小鳳誤當成電話騙徒，以為他要索取2,000萬「嘉賓費」！席上，有粉絲竟然高呼其舊愛鄭裕玲（DoDo）的名字，認真唔識「Do」！
文：音樂組
攝：司徒國榮
呂方一連兩場的《呂方代表演唱會》前晚假紅館開鑼，全晚請來多位重量級嘉賓助陣，他介紹第一位嘉賓出場時指對方多年前已是心中的女神，有不識趣的觀眾竟大叫「鄭裕玲」，聽到舊愛的名字後，他嬲爆爆說：「你再咁講我真係嬲，我勁小器，雖然同好多阿姐有緣，但呢個世界上有好多阿姐，其實嗰個係汪明荃！」
汪明荃落Order見家長
手持面具出場的汪明荃又唱又跳，其後催呂方帶女友「見家長」：「前幾日練歌，咁我生日佢哋奏咗首歌，點知畀我發現佢捧住……」此時有觀眾高呼「女人！」汪明荃續說：「乜成日講女人！你幾時帶嚟見我？」呂方笑說：「你咪我女人！」但汪明荃未領情，反而踢爆呂方的肌肉「六神合體」：「係捧住個飯盒！你仲食飯？人哋開騷幾舊肌肉，你得一Pat竟然夠膽上紅館，梗係Sell靚聲！」
倫永亮嘲「絕種殭屍」
另一位嘉賓徐小鳳以招牌波點長裙登場，提到最近發生不少電話騙案，原來她當初收到呂方的電話邀請時亦誤以為「中招」：「我心諗做嘉賓使唔使畀2,000萬你呀？」她又打趣稱得知呂方最近積極操肌，擔心他會以三角褲上陣：「好彩你冇！你四四方方幾好呀！雖然唔高大，但聲音似巨人！」
呂方先後被兩位天后及粉絲玩謝，連音樂總監倫永亮亦加入戰團，取笑呂方唱歌時乸口乸面，行路似足殭屍，開玩笑指政府應將他列為「面臨絕種」！呂方感謝倫永亮鼎力幫忙，笑稱要玩「HeHe」結婚，又自爆十多歲時疑似遇上騙徒：「約咗同學個妹去公園玩，佢問我借筆，借咗就冇見過佢啦，支嘢幾百蚊！」
|
鍾意就快D Share啦！
|
|
|