網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年11月19日 星期四

平過沈卓盈 陳煒 1000蚊抵用價 [壹週刊 - 1341] 陳煒,沈卓盈,M1,

娛樂偵訊 平過沈卓盈 陳煒 1000蚊抵用價 已過檔無綫超過三年的陳煒,今年有四部劇包括《梟雄》排住隊出街外,更被安排做飲食節目教煮餸;工作量愈來愈多的她,年初以 1,000蚊一騷新人價跟無綫續約五年做親生女,超抵用! ...


娛樂偵訊

平過沈卓盈 陳煒 1000蚊抵用價

已過檔無綫超過三年的陳煒,今年有四部劇包括《梟雄》排住隊出街外,更被安排做飲食節目教煮餸;工作量愈來愈多的她,年初以 1,000蚊一騷新人價跟無綫續約五年做親生女,超抵用!

睇人嚟㩒

曾經是亞視一姐的陳煒,一二年入無綫由《金枝慾孽貳》客串一角開始,打拼三年,已穩坐二線花旦位置,同一時段有兩劇出街的她,正為新劇《火線下的江湖大佬》開工,跟鄭則士合作。

劇接劇,但實質好睇唔好食。

「煒哥年頭做咗親生女之後,先加到一千蚊一個騷,之前佢得幾百蚊一個騷仲冇底薪;不過佢要嘅係機會,如果要靠 TVB份糧,早就餓死。」知情者說。

對手王維基的香港電視流產後,無綫有恃無恐,同藝人傾新約,如非必要,一律有減冇加。

「公司啲騷價出名奀,仲要睇人嚟㩒,好似翟威廉嗰班港男,底薪一萬,騷價八百到九百蚊;出爐港姐底薪八千,騷價七百蚊一個,就算蔡思貝咁多嘢做,都係呢個價。公司覺得港男港姐係無綫一手栽培,俾機會已經皇恩浩蕩,所以根本冇條件同公司講數。就算沈卓盈做咗超過十年,到而家都係千三蚊一個騷,煒哥做埋親生女,由幾百加到盡都係得一千蚊個騷。」一名無綫人說。

在《梟雄》演出,陳煒不單演技受讚,連造型也被網民認為是眾多女角中最神似。

同樣有份演《梟雄》的沈卓盈只是配角,但騷價仲多過戲份重、有冠軍銜頭的陳煒。

升呢後,陳煒有機會拍住視帝黎耀祥,在節目巡禮行紅地氈。

掛名夫妻

同萬綺雯同期簽無綫,陳煒雖然不似對方劇劇孭正女主角,但日踩夜踩,聽話又肯做,機會明顯比過去多。

「煒哥呢年幾真係瞓晒身做嘢,好少時間同老公一齊,佢老公大部分時間喺台灣,有時又要返內地傾生意,煒哥都知有唔少妹妹仔黐埋去,之前傳佢婚姻有問題,雖然煒哥唔認,不過兩公婆聚少離多,點都會有影響,其實大家見佢咁專心做嘢,就知佢冇寄望靠老公。」知情者說。

騷價唔夠 1,000蚊時,陳煒 13年在《東華》慈善騷已經好搏命,出晒力。

陳煒老公顏志行是台灣人, 08年婚後經常中、台兩邊走,早前傳出二人婚變,但遭陳煒否認。

簽做親生女後,陳煒終於有機會做二線花旦,拍鄭則士開新劇。

陳煒的身價跟香港先生冠軍,只得 900蚊一個騷的翟威廉同級。

同時段播出的《東坡家事》扮潑辣河東獅,又搶晒鏡。

不吐不快

冇對手!無綫藝人人工普遍低於市場價,但願打願捱,除了劈炮唔撈或者外援夠膽呻,其他得個忍字。

黃秋生 貼錢打工

還人情,答應好友監製王心慰返無綫拍《梟雄》,雖然待遇非一般,但對大台突然安排到外地取景,連去機場的車費以及助手酒店錢都要自資,黃秋生公開斥無綫要他貼錢打工,好離譜。

陳曼娜 奀過服裝阿姐

甘草演員陳曼娜離開無綫後,直言在大台工作超過二十年,但人工竟然奀過服裝間阿姐,最慘係做唔夠騷要還騷,即做唔夠底薪數目,但要從下年人工扣除差額,十分刻薄。

羅敏莊 浪費青春

在無綫十多年的羅敏莊,試過在坐月期間被召返公司追討騷債,約滿不再留低的她表示在無綫浪費青春得個吉。

撰文、攝影:娛樂組

鍾意就快D Share啦!