爆壹爆
老新水房小販區惡戰
屯門雖然係清一色新義安，但老新仔都唔係惡晒。早幾日，一班水房古惑仔就夠薑踩入屯門，仲同一班陀地老新仔喺街頭紮行馬講數添，原因係為小販擺檔問題。
屯門良景邨每晚都有十幾檔小販，係由新義安小頭目「生菜」負責睇場。生菜係乜水？咪就係屯門猛人阿牛門生囉。每一檔小販，每月都要向「生菜」上繳五千蚊保護費，先可以相安無事做生意。由於呢度人流旺，一班小販都願意交保護費。
不過講開就奇，近日除咗有商場職員想趕走呢班小販外，幾日前另有人吹雞，召來十幾名戴上口罩、有水房背景嘅金毛古惑仔到場，大聲呼喝一班小販，將佢哋趕到另一邊人流唔太多嘅位置。小販見對方兇神惡煞，乖乖就範，一方面奇怪黑社會做埋食環份工，另方面暗中撥輪通知「生菜」投訴，「生菜」立即 call齊門生到場，場面緊張嚇親唔少街坊。
不過「生菜」門生可能未食晚飯，到場後不斷喺其中一檔篤魚蛋開餐。原來，班老新仔一向有個規矩，就係「魚蛋免費食 陀地任篤」，所以班老新仔老實不客氣，魚蛋篤完一串又一串，班水房仔見到都陰陰嘴笑，認真失禮。之後，兩方人馬走埋一邊密密斟，冇幾耐各自散 band。爆哥收到風，有人一定要小販絕跡，但一班陀地有錢收兼魚蛋任食當然唔肯讓步。而之後數晚，每當小販開檔後，一班老新陀地都會在附近戒備，以防有人搞事趕小販走。
高登肥仔 臭名遠播
高登呢排好熱鬧，因為好多巴打絲打都講緊一個網名叫樂富肥仔嘅仁兄。究竟呢個肥仔係乜水，唔通係富二代大把錢？錯喇，只係好多人話佢專門喺高登兜售壞咗嘅二手電話。好多人投訴，話手機底板通常用兩日就燒，又或係 speaker失靈，總之就問題多多。由於多數在港鐵交收，買家冇乜時間 check機，所以好多人中招。
有巴打同爆哥講，肥仔喺高登有好多個身份換來換去，所以雖然已經活躍幾年，都仍然有人上當。而佢每呃完一個客，就會失蹤一排，等件事丟淡再出來搵食，好鬼蠱惑。有朋友早排就用八嚿水，同肥仔買咗部二手機，點知返到屋企先發現 speaker用唔到，想肥仔回水，但佢已經熄機睬你有味。朋友根據張單據上地址去問佢，點知間鋪原來長期拉閘冇開門。朋友之後攞部機去整，手機鋪都話個盒同配件都係流嘢，而部機零件已好殘破，絕對唔值八嚿水。朋友聽完，嬲到想掟爛部機。
澳門圍剿崩牙駒
《壹》仔上期爆料，曾在澳門呼風喚雨的「崩牙駒」尹國駒，上月廿九日，喺漁人碼頭筵開二百席，創立「世界洪門歷史文化協會」，崩牙駒出任台灣洪門組織副主席之位，又喺澳門以洪門會友，但政治色彩甚濃，台灣國民黨高層朱立倫、洪秀柱更親筆題字祝賀。
崩牙駒搞洪門，無非是加入共產黨統一台灣戰線，理應是為國出力，而據聞事後也得到中共讚賞，仲有共產黨高層喺北京親自接見佢，都算巴閉。佢咁愛國，但偏偏澳門司警唔俾面，擺酒當晚反而如臨大敵，成班警察持槍在門外候命，更逐個影低來客全相，恐嚇意味甚濃。而香港江湖中人不少收到請帖，當晚都約埋過大海赴宴，點知全部喺碼頭關口被人截住，唔俾入境。因乜事搞到要封殺崩牙駒呢？江湖中人估計，澳門司警可能唔 like佢搭通中央關係喎，為免日後唔俾面，所以先俾個下馬威佢睇吓。
爆哥乜料
金融界撈家，穿梭黑白政商界，朋友遍布旺角至中環，每星期都八到
唔同料，同《壹》仔讀者過吓癮！
|
鍾意就快D Share啦！
|
|
|