早前大台節目巡禮，已安排新舊《愛•回家》演員一齊出場，預告一班舊人會回歸。
探熱針
馬家軍回家救亡 新舊《愛．回家》大混亂
無綫新一輯《愛•回家》抽走劉丹為首的馬家後，變成由班「愛瑜伽」奀星龔嘉欣、張振朗、坤哥吳業坤等人孭飛，拖死收視更劣評如潮。
死期已定！《愛•回家》明年五月做夠一千集正式收檔，但尚有成一百集要「獻世」，為防收視愈插愈深，搏攞番個尾彩的大台，失驚無神急召馬家全家歸隊，搞到台前幕後陣腳大亂，搞到「家變」。
新不如舊
第一輯《愛•回家》去年七月打柴後，無綫原本有意推出另一部處境劇接棒，可惜新劇陣容包括黃翠如、張繼聰、龔嘉欣、吳業坤及麥長青等唔夠力， call唔到廣告，最後被迫換湯不換藥，改番做《愛•回家》，但新不如舊，由四個新人龔嘉欣、坤哥、張振朗及何君誠做主線，觀眾勁唔 like，收視亦由之前平均廿五、六點，插落廿點至廿二點間徘徊。
雖然大台已決定，一千集就摺埋，但距離「死期」還有一百集，惟有搵救兵幫手吊命，下令重召馬家（劉丹、徐榮、黎諾懿、林漪娸及蔣家旻）返屋企助陣，主線亦由班新人轉移到馬家。據了解，「馬家軍」將於九百集開始再出場，但由於兩輯《愛•回家》幕後班底，包括導演、監製及編劇都不同人，臨時臨急要將故事重心「大挪移」，劇組陣腳大亂。
一人分飾兩角
「新嗰班編劇根本就唔知上一輯個古仔講乜，連啲人物性格同關係都完全唔了解，突然間要加番馬家嘅人，真係好高難度囉！萬一有啲乜嘢連接唔到或者搞錯，到時肯定俾觀眾插爆，最弊係有啲演員係兩輯都有份做，好似龔嘉欣，上一輯係馬柔（郭少芸）男友裘亞城（黃德斌）個細妹，但新一輯就已經變咗另一個新角色，之後又會同馬柔有對手戲，咁究竟龔嘉欣會以邊個身份出現，劇情究竟點交代？班編劇而家都𢱑爆頭。」一名幕後工作人員說。
除了有演員分飾兩角問題外，兩輯劇情如何銜接也是一大問題。上一輯的《愛•回家》結局，馬子仁（羅天宇）被交代與高秀蘋（阮兒）結了婚，今次回歸名單中，阮兒最初沒有份，因為新一批編劇，根本不知道馬子仁已經結婚，後來被演員提起，編劇才即時補入。
馬家拆散晒
人物關係大混亂，布景方面一樣出現災難。
「上一輯拍完之後，馬家個主景已經拆晒，冇諗過會用得番，所以啲嘢散咗去唔同地方，依家想搭番個同以前一模一樣嘅景，根本冇乜可能，仲要諗吓使唔使喺劇情交代吓點解個家唔同咗樣，所以喺馬家回歸初期頭十幾集，都唔會有屋企劇情，等道具部有多啲時間重建馬家。」一名工作人員說。
撰文、攝影、攝錄：娛樂組
|
鍾意就快D Share啦！
|
|
|