| 歐洲股神安東尼波頓(圖右上)及幾位職業炒家，同大家分享投資心得。 | next 1/1 pre |
 | |
| 全職炒家 Pasu。 | next 1/1 pre |
 | |
| next 1/1 pre | |
 | |
| next 1/1 pre | |
 | |
| next 1/1 pre | |
 | |
| next 1/1 pre | |
 | |
| 歐洲股神安東尼波頓 | next 1/1 pre |
香港全民皆股，散戶一街都係，股友有冇幻想過自己有成為職業炒家嘅一日？着住睡衣喺屋企輕鬆賺幾球？孖妹蒲盡港九、新界魚缸，發現由普通散戶升呢做職業炒家嘅股友都有一啲共通點，首要係跌過、痛過都要唔怕死！繼續發掘獨門炒股術，不如睇吓以下三位職業炒家是如何煉成的？仲有歐洲股神安東尼波頓同大家現身說法，講吓股神點樣做投資。
P：全職炒家 Pasu
彩兒：你98年讀預科開始上堂撳股票機，仲用利是錢炒股，炒股之路一直一帆風順？
P：最初只係識上網睇新聞，靠自己同家人貼士揀股，完全唔識股票升跌原理，輸唔少利是錢！大學畢業後入咗銀行做前線Sales，接觸多咗投資產品，開始睇基金經理前瞻、銀行分析報告等。到06年買咗隻A股基金，翌年撞正大時代高位沽貨，持貨不足一年賺兩倍，其後辭工去考CFA（特許金融分析師）資歷同讀財務碩士。進修時試過迷信股王中移(00941)，喺130元接貨，去到90元先肯沽，最終輸咗100萬元，令我深明止蝕嘅重要性。
09年繼承父業返內地做廠，親身體驗內地製造業市道，熟悉國情，而且自己多咗用手機炒股，用App監測股票，令自己對股票嘅觸覺提升唔少，亦開始衝出港股市場，炒埋美股，睇埋股票以外嘅投資工具，如債券及外匯。
Kitty：你今年內炒股回報有1.1倍，當中有血有淚？
P：我年初起全職炒股，現時投資組合係30%美股、25%歐股、25%港股，另A股、日股及澳股共佔20%，由於係專業投資者，只要係幫到交易嘅都會不惜工本，早兩個月送咗份生日禮物畀自己，就係Bloomberg機，連同一啲訂閱，兩年使費近50萬元；為加快網上交易速度、一旦連線有故障都有後備，又特意安裝兩間公司嘅寬頻線。股海學無止境，我會自製持續專業進修計劃，例如參加投資講座及工作坊，不時仲網購外國投資書自學。
近月主打運用Beta投資法，環球股市8月大跌市後反彈，我當時先沽空後撈底，主力靠蘋果公司（AAPL）同Tesla（TSLA）認沽期權食胡，一隻期權賺幅動輒八倍，現時主力持有facebook（FB）及阿里巴巴（BABA）正股；早前趁福士（德股：VOW）傳出醜聞於104歐元撈底，此役賺幅21%，淨賺約80萬元，近期因應歐洲難民潮及量寬政策，預計當地建築及發展商將率先受惠，所以10月初喺78歐元買入Hochtief（德股：HOT），帳面賺逾一成。因應港股投資氣氛薄弱，內地一時間太多政策出台，令投資者麻木，所以歐美股對我嚟講好幫到手。
梁：專業投資者 梁帥聰（Clement）
Kitty：以我所知，你初入股壇交唔少學費喎。
梁：我大學畢業後係做電子商貿公司嘅市場推廣，只係聽同事講就買入股票純粹等升，完全冇股市機制概念，試過持貨兩日淨賺八千，以當時一萬蚊左右嘅人工嚟講已經好滿足，2000年愈炒愈大膽，用大半副身家喺16元高追中國聯通(00762)，跌到15元朋友叫我止蝕，但眼白白睇住佢跌到3元，最終坐足8年貨，好彩令我了解到股壇遊戲本質。
當時開始不斷睇書自學技術分析，幾乎書局最普遍有嘅入門書都睇勻晒，幫到自己掌控股價去向，亦開始報讀投資班了解人哋炒股取態，同時學睇上市公司年報，撞過好多次板之後發覺，業務賺唔賺錢反而唔難睇到，數字並非重點，而公司發展前景先重要。例如要睇：主席講嘅發展路向、公司虧損收窄或由虧轉盈主因係咪一次過的收益、會唔會簽咗重要訂單令增長有保證，令公司擺脫陰霾。
彩兒：我知你最叻就係從上市公司通告中「搵飯食」，究竟係點搵投資主題？
梁：我主要篩選自己大興趣板塊嘅通告睇，例如係互聯網+、電商、中港券商，跨太平洋戰略經濟夥伴關係協議（TTP）相關板塊嘅通告，亦會特別留意半新股上市後首份業績，如果上市費用冇對公司造成大影響，就會較睇好。此外，會揀預示公司動作、盈利預告、收購合併等反映契機嘅通告睇。
我目前投資組合包括60%港股、40%A股，港股核心持倉有網龍(00777)、香港寬頻(01310)及科通芯城(00400)；A股主要持有恒生電子(600570.SH)及用友(600588.SH)，今年較滿意一役係7月以數十萬元於13元買入網龍，之後喺24.25元沽貨，賺幅近九成。
●曾：元朗股神 曾錦安
彩兒：你有30年股齡，有乜風浪你未見過丫？
曾：最初炒股乜都唔識，只係向證券行散戶學習，喺87年膽粗粗用兩萬幾蚊按金學人玩期指，點知撞正股災，當時傻到以為只會輸光兩萬幾蚊本金，點知係要輸凸，一日之間輸晒十幾萬老婆本！遇過呢一劫學精咗，九十年代初鑽研當時係新產品嘅期權，不過當然係不斷交學費先有今日嘅炒功啦，期權亦係我依家嘅好幫手！
2000年科網熱，我曾辭工全職炒股9個月，當年1月份，我喺一個朝早一次過買入80隻細價股，每隻注碼1.5萬元，炒股戶口喺大升市每日都升值十幾萬，可惜細價股股災一嚟，完全出唔切貨，好彩最終打個和，執番身彩。
Kitty：我知道你每逢期指結算就會落證券行，不如分享吓期權炒技？
曾：今年經常外遊，錯失多次入市機會，尤其係大時代！期指結算落行係因為間中可以執死雞或感受市場氣氛，我試過一次買入原值150元嘅看好恒指末日期權，點知大市爆升400點，令期權價值勁升99倍！目前我持倉主要係20隻創業板股，大多係08年持貨至今，普遍累升5至6倍，希望博大浪來臨時走貨。
我心目中「靚」嘅創業板股係要業績差、負債纍纍、官司纏身、主席走佬、有負面新聞，最好係貨源歸邊先易炒，但就要有耐性度過震倉。
睇完香港幾位全職炒家嘅心得，不如轉過頭睇睇有「歐洲股神」之稱的安東尼波頓(Anthony Bolton)喺漫長嘅25年投資生涯中，有乜嘢投資心法。安東尼波頓指出，投資最重要的是能夠抽離，不隨波逐流。
已退休的安東尼波頓最擅長投資歐洲市場，他從1979年至2007年擔任富達特殊情況基金經理，該基金28年間每年平均增長19.5％，累積回報高達約140倍。
他表示，隨着科技發達、資訊愈來愈流通，投資變得比從前困難得多，但成功的要素萬變不離其中，首要的就是能好好控制情緒，免受市場影響。
他又指，成功的投資者須能敢於與其他人持相反意見，熱衷分析，以及有足夠的常識，並忠於自己的直覺。「我認為你要忠於自己，若太情緒化，受潮流影響，不投資也罷。」
對於近年愈見盛行的股東維權，即透過行使股東權利向公司管理層施壓的投資策略，他指這整體來說是好事，但現時不少參與這種行動的基金經理都很短視，並喜歡利用媒體的影響力，讓這些基金主導公司的決定，這令他不太高興。
另外，ETF(交易所買賣基金)等被動式投資工具的普及，令不少人開始質疑基金經理的價值，但他相信愈多資金作被動式投資，反而只會使主動式投資回報更好。他被問及對市場走勢的預測時表示，現時已不會預測市場短期的走勢，但對歐元能否長遠存在，則有所懷疑。
他表示，多年投資生涯中較深刻的事，包括1989年華爾街大跌市，以及2000年科網股泡沫爆破。歐洲市場方面，他指自己有幸見證到蘇聯解體及歐元誕生。「能夠在蘇聯解體時管理一個歐洲股票基金，我感到非常幸運，因為這件事帶來很大轉變，令很多全新的市場出現可供投資。」
他透露，現時遠離了每日忙於檢閱電郵的生活，有更多時間投入在古典音樂的興趣上，早前更灌錄了自己首次創作的管弦樂曲。
安東尼波頓曾主理中國特殊情況基金，惜基金表現一般。他於13年退任該基金經理，並於去年退休，但仍保持富達國際董事兼高級顧問一職。
─ ─ ─ ─ ─ ─ ─ ─ ─ ─ ─ ─
又到交稅季節，點先可以輕輕鬆鬆，安享悠閒「稅」月？想要着數即刻入嚟睇http://bit.ly/20ToU3P
|
鍾意就快D Share啦！
|
|
|
