自從無綫鬧小生花旦荒之後，唔少一線藝員都選擇離巢，大家都唔難發現無綫推緊一大堆二、三線小生小花上位，希望呢班新力軍盡快入屋，彌補人才流失。而最新被力捧上位嘅就有網民勁buy、做狐狸精做到出晒名嘅李佳芯（Ali）。
深得網民愛戴嘅Ali喺12年離開有線轉投無綫，主持節目《學是學非》。憑著標緻外貌開始被人留意。佢曾經話好希望可以拍劇，所以無綫都俾咗好多機會佢.......做狐狸精。
首先喺官網宣傳片《姨太太的後現代生活》中露臍短裙嘅打扮，成功引起網民注意。佢更有機會喺劇集《名門暗戰》擔演小三，同黃浩然有連場激咀床戰。之後，佢又喺劇集《倩女喜相逢》中演九尾狐入型入格，網民對佢嘅演技更加有讚冇彈，成功上位。
做小三做到人見人愛嘅Ali，喺播完無耐嘅《無雙譜》中飾演段素四（田蕊妮飾）嘅婢女摘仙，雖然唔係重要角色，但仍然引起網民熱烈討論同瘋狂cap圖。
喺待播劇《波士早晨》入面，Ali飾演秘書去勾引洪永城，形象完全深入民心，成功取代梁政珏同許亦妮，成為新一代狐狸精。勢估唔到由喺街俾師奶鬧嘅佢，竟然俾余詠珊發掘力捧上位。梗係啦，大家都係有線出身嘛。
2016無綫節目巡禮中，來年會播嘅15套劇集當中，有三套搵到Ali嘅蹤影，分別係重頭劇《律政強人》、《潮流教主》及《巨輪II》。12月開拍嘅《律政強人》更加係Ali第一次擔正做第一女主角，仲搵嚟好戲之人方中信及廖啟智夥拍Ali，喺劇中飾演初級律師(未知係咪小三啦)，相信網民都好期待佢嘅演出。
|
鍾意就快D Share啦！
|
|
|
